‘‘เอกูนสตฺตติกปฺเป [เอกูนสฏฺฐิกปฺปมฺหิ (สี. สฺยา.)],

เอโก อาสิ ชนาธิโปฯ

อาเทยฺโย นาม นาเมน, จกฺกวตฺตี มหพฺพโลฯ

[49]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สมาทปโก เถโร อิมา คาถาโย อภาสิตฺถาติฯ

สมาทปกตฺเถรสฺสาปทานํ นวมํฯ

10. ปญฺจงฺคุลิยตฺเถรอปทานํ

[50]

‘‘ติสฺโส นามาสิ ภควา, โลกเชฏฺโฐ นราสโภ;

ปวิสติ คนฺธกุฏิํ, วิหารกุสโล มุนิฯ

[51]

‘‘สุคนฺธมาลมาทาย, อคมาสิํ ชินนฺติกํ;

อปสทฺโท จ สมฺพุทฺเธ, ปญฺจงฺคุลิมทาสหํฯ

[52]

‘‘ทฺเวนวุเต อิโต กปฺเป, ยํ คนฺธมภิโรปยิํ;

ทุคฺคติํ นาภิชานามิ, ปญฺจงฺคุลิสฺสิทํ [ปญฺจงฺคุลิยิทํ (สี.)] ผลํฯ

[53]

‘‘ทฺเวสตฺตติมฺหิโต กปฺเป, ราชา อาสิํ สยมฺปโภ;

สตฺตรตนสมฺปนฺโน, จกฺกวตฺตี มหพฺพโลฯ

[54]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปญฺจงฺคุลิโย เถโร อิมา คาถาโย อภาสิตฺถาติ;

ปญฺจงฺคุลิยตฺเถรสฺสาปทานํ ทสมํฯ

สุปาริจริยวคฺโค สตฺตรสโมฯ

ตสฺสุทฺทานํ –

สุปาริจริ กณเวรี, ขชฺชโก เทสปูชโก;

กณิกาโร สปฺปิทโท, ยูถิโก ทุสฺสทายโก;

มาโฬ จ ปญฺจงฺคุลิโก, จตุปญฺญาส คาถกาติฯ

18. กุมุทวคฺโค

1. กุมุทมาลิยตฺเถรอปทานํ

[1]

‘‘ปพฺพเต หิมวนฺตมฺหิ, มหาชาตสฺสโร อหุ;

ตตฺถโช รกฺขโส อาสิํ, โฆรรูโป มหพฺพโลฯ

[2]

‘‘กุมุทํ ปุปฺผเต ตตฺถ, จกฺกมตฺตานิ ชายเร;

โอจินามิ จ ตํ ปุปฺผํ, พลิโน สมิติํ ตทาฯ

[3]

‘‘อตฺถทสฺสี ตุ ภควา, ทฺวิปทินฺโท นราสโภ;

ปุปฺผสงฺโกจิตํ [ปุปฺผํ สงฺโกจิตํ (สี. สฺยา.), ปุปฺผํ สโมจิตํ (?)] ทิสฺวา, อาคจฺฉิ มม สนฺติกํฯ

[4]

‘‘อุปาคตญฺจ สมฺพุทฺธํ, เทวเทวํ นราสภํ;

สพฺพญฺจ ปุปฺผํ ปคฺคยฺห, พุทฺธสฺส อภิโรปยิํฯ

[5]

‘‘ยาวตา หิมวนฺตนฺตา, ปริสา สา [หิมวนฺตสฺมิํ, ยาว มาลา (สฺยา.)] ตทา อหุ;

ตาวจฺฉทนสมฺปนฺโน, อคมาสิ ตถาคโตฯ

[6]

‘‘อฏฺฐารเส กปฺปสเต, ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[7]

‘‘อิโต ปนฺนรเส กปฺเป, สตฺตาเหสุํ ชนาธิปา;

สหสฺสรถนามา เต, จกฺกวตฺตี มหพฺพลาฯ

[8]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา กุมุทมาลิโย เถโร อิมา คาถาโย อภาสิตฺถาติฯ

กุมุทมาลิยตฺเถรสฺสาปทานํ ปฐมํฯ

2. นิสฺเสณิทายกตฺเถรอปทานํ

[9]

‘‘โกณฺฑญฺญสฺส ภควโต, โลกเชฏฺฐสฺส ตาทิโน;

อาโรหตฺถาย ปาสาทํ, นิสฺเสณี การิตา มยาฯ

[10]