เมนู

8. ทุสฺสทายกตฺเถรอปทานํ

[38]

‘‘ติวรายํ ปุเร รมฺเม, ราชปุตฺโตสหํ [ราชปุตฺโต อหํ (สี. สฺยา.)] ตทา;

ปณฺณาการํ ลภิตฺวาน, อุปสนฺตสฺสทาสหํฯ

[39]

‘‘อธิวาเสสิ ภควา, วตฺถํ [นวํ (ก.)] หตฺเถน อามสิ;

สิทฺธตฺโถ อธิวาเสตฺวา, เวหาสํ นภมุคฺคมิฯ

[40]

‘‘พุทฺธสฺส คจฺฉมานสฺส, ทุสฺสา ธาวนฺติ ปจฺฉโต;

ตตฺถ จิตฺตํ ปสาเทสิํ, พุทฺโธ โน อคฺคปุคฺคโลฯ

[41]

‘‘จตุนฺนวุติโต กปฺเป, ยํ ทุสฺสมททิํ ตทา;

ทุคฺคติํ นาภิชานามิ, ทุสฺสทานสฺสิทํ ผลํฯ

[42]

‘‘สตฺตสฏฺฐิมฺหิโต กปฺเป, จกฺกวตฺตี ตทา อหุ;

ปริสุทฺโธติ นาเมน, มนุชินฺโท มหพฺพโลฯ

[43]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ทุสฺสทายโก เถโร อิมา คาถาโย อภาสิตฺถาติฯ

ทุสฺสทายกตฺเถรสฺสาปทานํ อฏฺฐมํฯ

9. สมาทปกตฺเถรอปทานํ

[44]

‘‘นคเร พนฺธุมติยา, มหาปูคคโณ อหุ;

เตสาหํ ปวโร อาสิํ, มม พทฺธจรา [ปฏฺฐจรา (สฺยา.)] จ เตฯ

[45]

‘‘สพฺเพ เต สนฺนิปาเตตฺวา, ปุญฺญกมฺเม สมาทยิํ;

มาฬํ กสฺสาม สงฺฆสฺส, ปุญฺญกฺเขตฺตํ อนุตฺตรํฯ

[46]

‘‘สาธูติ เต ปฏิสฺสุตฺวา, มม ฉนฺทวสานุคา;

นิฏฺฐาเปตฺวา จ ตํ มาฬํ, วิปสฺสิสฺส อทมฺหเสฯ

[47]

‘‘เอกนวุติโต กปฺเป, ยํ มาฬมททิํ ตทา;

ทุคฺคติํ นาภิชานามิ, มาฬทานสฺสิทํ ผลํฯ

[48]

‘‘เอกูนสตฺตติกปฺเป [เอกูนสฏฺฐิกปฺปมฺหิ (สี. สฺยา.)],

เอโก อาสิ ชนาธิโปฯ

อาเทยฺโย นาม นาเมน, จกฺกวตฺตี มหพฺพโลฯ

[49]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สมาทปโก เถโร อิมา คาถาโย อภาสิตฺถาติฯ

สมาทปกตฺเถรสฺสาปทานํ นวมํฯ

10. ปญฺจงฺคุลิยตฺเถรอปทานํ

[50]

‘‘ติสฺโส นามาสิ ภควา, โลกเชฏฺโฐ นราสโภ;

ปวิสติ คนฺธกุฏิํ, วิหารกุสโล มุนิฯ

[51]

‘‘สุคนฺธมาลมาทาย, อคมาสิํ ชินนฺติกํ;

อปสทฺโท จ สมฺพุทฺเธ, ปญฺจงฺคุลิมทาสหํฯ

[52]

‘‘ทฺเวนวุเต อิโต กปฺเป, ยํ คนฺธมภิโรปยิํ;

ทุคฺคติํ นาภิชานามิ, ปญฺจงฺคุลิสฺสิทํ [ปญฺจงฺคุลิยิทํ (สี.)] ผลํฯ

[53]

‘‘ทฺเวสตฺตติมฺหิโต กปฺเป, ราชา อาสิํ สยมฺปโภ;

สตฺตรตนสมฺปนฺโน, จกฺกวตฺตี มหพฺพโลฯ

[54]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปญฺจงฺคุลิโย เถโร อิมา คาถาโย อภาสิตฺถาติ;

ปญฺจงฺคุลิยตฺเถรสฺสาปทานํ ทสมํฯ

สุปาริจริยวคฺโค สตฺตรสโมฯ

ตสฺสุทฺทานํ –

สุปาริจริ กณเวรี, ขชฺชโก เทสปูชโก;

กณิกาโร สปฺปิทโท, ยูถิโก ทุสฺสทายโก;

มาโฬ จ ปญฺจงฺคุลิโก, จตุปญฺญาส คาถกาติฯ

18. กุมุทวคฺโค