1. สุปาริจริยตฺเถรอปทานํ
[1]
‘‘ปทุโม นาม นาเมน, ทฺวิปทินฺโท นราสโภ;
ปวนา อภินิกฺขมฺม, ธมฺมํ เทเสติ จกฺขุมาฯ
[2]
‘‘ยกฺขานํ สมโย อาสิ, อวิทูเร มเหสิโน;
เยน กิจฺเจน สมฺปตฺตา, อชฺฌาเปกฺขิํสุ ตาวเทฯ
[3]
‘‘พุทฺธสฺส คิรมญฺญาย, อมตสฺส จ เทสนํ;
ปสนฺนจิตฺโต สุมโน, อปฺโผเฏตฺวา อุปฏฺฐหิํฯ
[4]
‘‘สุจิณฺณสฺส ผลํ ปสฺส, อุปฏฺฐานสฺส สตฺถุโน;
ติํสกปฺปสหสฺเสสุ, ทุคฺคติํ นุปปชฺชหํฯ
[5]
‘‘อูนติํเส กปฺปสเต, สมลงฺกตนามโก;
สตฺตรตนสมฺปนฺโน, จกฺกวตฺตี มหพฺพโลฯ
[6]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา สุปาริจริโย เถโร อิมา คาถาโย อภาสิตฺถาติฯ
สุปาริจริยตฺเถรสฺสาปทานํ ปฐมํฯ
2. กณเวรปุปฺผิยตฺเถรอปทานํ
[7]
‘‘สิทฺธตฺโถ นาม ภควา, โลกเชฏฺโฐ นราสโภ;
ปุรกฺขโต สาวเกหิ, นครํ ปฏิปชฺชถฯ
[8]
‘‘รญฺโญ อนฺเตปุเร อาสิํ, โคปโก อภิสมฺมโต;
ปาสาเท อุปวิฏฺโฐหํ, อทฺทสํ โลกนายกํฯ
[9]
‘‘กณเวรํ [กรวีรํ (สกฺกตานุโลมํ), กณวีรํ (ปากต)] คเหตฺวาน, ภิกฺขุสงฺเฆ สโมกิริํ;
พุทฺธสฺส วิสุํ กตฺวาน, ตโต ภิยฺโย สโมกิริํฯ
[10]
‘‘จตุนฺนวุติโต กปฺเป, ยํ ปุปฺผมภิปูชยิํ [โรปยิํ (สฺยา.)];
ทุคฺคติํ นาภิชานามิ, พุทฺธปูชายิทํ ผลํฯ
[11]
‘‘สตฺตาสีติมฺหิโต กปฺเป, จตุราสุํ มหิทฺธิกา;
สตฺตรตนสมฺปนฺนา, จกฺกวตฺตี มหพฺพลาฯ
[12]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กณเวรปุปฺผิโย เถโร อิมา คาถาโย อภาสิตฺถาติฯ
กณเวรปุปฺผิยตฺเถรสฺสาปทานํ ทุติยํฯ
3. ขชฺชกทายกตฺเถรอปทานํ
[13]
‘‘ติสฺสสฺส โข ภควโต, ปุพฺเพ ผลมทาสหํ;
นาฬิเกรญฺจ ปาทาสิํ, ขชฺชกํ อภิสมฺมตํฯ
[14]
‘‘พุทฺธสฺส ตมหํ ทตฺวา, ติสฺสสฺส ตุ มเหสิโน;
โมทามหํ กามกามี, อุปปชฺชิํ [กามการี, อุปปชฺชํ (สี.)] ยมิจฺฉกํ [สพฺพตฺถปิ เอวเมว ทิสฺสติ]ฯ
[15]
‘‘ทฺเวนวุเต อิโต กปฺเป, ยํ ทานมททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[16]
‘‘อิโต เตรสกปฺปมฺหิ, ราชา อินฺทสโม อหุ;
สตฺตรตนสมฺปนฺโน, จกฺกวตฺตี มหพฺพโลฯ
[17]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ขชฺชกทายโก เถโร อิมา คาถาโย อภาสิตฺถาติฯ
ขชฺชกทายกตฺเถรสฺสาปทานํ ตติยํฯ
4. เทสปูชกตฺเถรอปทานํ
[18]
‘‘อตฺถทสฺสี ตุ ภควา, โลกเชฏฺโฐ นราสโภ;
อพฺภุคฺคนฺตฺวาน เวหาสํ, คจฺฉเต อนิลญฺชเสฯ
[19]