เมนู

8. ผลกทายกตฺเถรอปทานํ

[37]

‘‘ยานกาโร ปุเร อาสิํ, ทารุกมฺเม สุสิกฺขิโต;

จนฺทนํ ผลกํ กตฺวา, อทาสิํ โลกพนฺธุโนฯ

[38]

‘‘ปภาสติ อิทํ พฺยมฺหํ, สุวณฺณสฺส สุนิมฺมิตํ;

หตฺถิยานํ อสฺสยานํ, ทิพฺพยานํ อุปฏฺฐิตํฯ

[39]

‘‘ปาสาทา สิวิกา เจว, นิพฺพตฺตนฺติ ยทิจฺฉกํ;

อกฺขุพฺภํ [อกฺโขภํ (สี.)] รตนํ มยฺหํ, ผลกสฺส อิทํ ผลํฯ

[40]

‘‘เอกนวุติโต กปฺเป, ผลกํ ยมหํ ททิํ;

ทุคฺคติํ นาภิชานามิ, ผลกสฺส อิทํ ผลํฯ

[41]

‘‘สตฺตปญฺญาสกปฺปมฺหิ, จตุโร นิมฺมิตาวฺหยา;

สตฺตรตนสมฺปนฺนา, จกฺกวตฺตี มหพฺพลาฯ

[42]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ผลกทายโก เถโร อิมา คาถาโย อภาสิตฺถาติฯ

ผลกทายกตฺเถรสฺสาปทานํ อฏฺฐมํฯ

9. วฏํสกิยตฺเถรอปทานํ

[43]

‘‘สุเมโธ นาม นาเมน, สยมฺภู อปราชิโต;

วิเวกมนุพฺรูหนฺโต, อชฺโฌคหิ มหาวนํฯ

[44]

‘‘สฬลํ ปุปฺผิตํ ทิสฺวา, คนฺถิตฺวาน [พนฺธิตฺวาน (สี.)] วฏํสกํ;

พุทฺธสฺส อภิโรเปสิํ, สมฺมุขา โลกนายกํฯ

[45]

‘‘ติํสกปฺปสหสฺสมฺหิ , ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[46]

‘‘อูนวีเส กปฺปสเต, โสฬสาสุํ สุนิมฺมิตา;

สตฺตรตนสมฺปนฺนา, จกฺกวตฺตี มหพฺพลาฯ

[47]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา วฏํสกิโย เถโร อิมา คาถาโย อภาสิตฺถาติฯ

วฏํสกิยตฺเถรสฺสาปทานํ นวมํฯ

10. ปลฺลงฺกทายกตฺเถรอปทานํ

[48]

‘‘สุเมธสฺส ภควโต, โลกเชฏฺฐสฺส ตาทิโน;

ปลฺลงฺโก หิ มยา ทินฺโน, สอุตฺตรสปจฺฉโทฯ

[49]

‘‘สตฺตรตนสมฺปนฺโน , ปลฺลงฺโก อาสิ โส ตทา;

มม สงฺกปฺปมญฺญาย, นิพฺพตฺตติ สทา มมฯ

[50]

‘‘ติํสกปฺปสหสฺสมฺหิ, ปลฺลงฺกมททิํ ตทา;

ทุคฺคติํ นาภิชานามิ, ปลฺลงฺกสฺส อิทํ ผลํฯ

[51]

‘‘วีสกปฺปสหสฺสมฺหิ, สุวณฺณาภา ตโย ชนา;

สตฺตรตนสมฺปนฺนา, จกฺกวตฺตี มหพฺพลาฯ

[52]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปลฺลงฺกทายโก เถโร อิมา คาถาโย อภาสิตฺถาติฯ

ปลฺลงฺกทายกตฺเถรสฺสาปทานํ ทสมํฯ

ฉตฺตวคฺโค ปนฺนรสโมฯ

ตสฺสุทฺทานํ –

ฉตฺตํ ถมฺโภ จ เวทิ จ, ปริวารุมปุปฺผิโย;

อนุเลโป จ มคฺโค จ, ผลโก จ วฏํสโก;

ปลฺลงฺกทายี จ คาถาโย, ฉปฺปญฺญาส ปกิตฺติตาติฯ

16. พนฺธุชีวกวคฺโค