‘‘สตฺตรเส กปฺปสเต, ราชา อาสิ มหีปติ;
อมิตฺตตาปโน นาม, จกฺกวตฺตี มหพฺพโลฯ
[59]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เอกปสาทนิโย เถโร อิมา คาถาโย อภาสิตฺถาติฯ
เอกปสาทนิยตฺเถรสฺสาปทานํ อฏฺฐมํฯ
9. สาลปุปฺผทายกตฺเถรอปทานํ
[60]
‘‘มิคราชา ตทา อาสิํ, อภิชาโต สุเกสรี;
คิริทุคฺคํ คเวสนฺโต, อทฺทสํ โลกนายกํฯ
[61]
‘‘อยํ นุ โข มหาวีโร, นิพฺพาเปติ มหาชนํ;
ยํนูนาหํ อุปาเสยฺยํ, เทวเทวํ นราสภํฯ
[62]
‘‘สาขํ สาลสฺส ภญฺชิตฺวา, สโกสํ ปุปฺผมาหริํ;
อุปคนฺตฺวาน สมฺพุทฺธํ, อทาสิํ ปุปฺผมุตฺตมํฯ
[63]
‘‘เอกนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, ปุปฺผทานสฺสิทํ ผลํฯ
[64]
‘‘อิโต จ นวเม กปฺเป, วิโรจนสนามกา;
ตโย อาสิํสุ ราชาโน, จกฺกวตฺตี มหพฺพลาฯ
[65]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สาลปุปฺผทายโก เถโร อิมา คาถาโย อภาสิตฺถาติฯ
สาลปุปฺผทายกตฺเถรสฺสาปทานํ นวมํฯ
10. ปิยาลผลทายกตฺเถรอปทานํ
[66]
‘‘ปาราวโต [ปโรธโก (สฺยา.)] ตทา อาสิํ, ปรํ อนุปโรธโก;
ปพฺภาเร เสยฺยํ กปฺเปมิ, อวิทูเร สิขิสตฺถุโนฯ
[67]
‘‘สายํ ปาตญฺจ ปสฺสามิ, พุทฺธํ โลกคฺคนายกํ;
เทยฺยธมฺโม จ เม นตฺถิ, ทฺวิปทินฺทสฺส ตาทิโนฯ
[68]
‘‘ปิยาลผลมาทาย , อคมํ พุทฺธสนฺติกํ;
ปฏิคฺคเหสิ ภควา, โลกเชฏฺโฐ นราสโภฯ
[69]
‘‘ตโต ปรํ อุปาทาย, ปริจาริํ วินายกํ;
เตน จิตฺตปฺปสาเทน, ตตฺถ กาลงฺกโต อหํฯ
[70]
‘‘เอกตฺติํเส อิโต กปฺเป, ยํ ผลํ อททิํ อหํ;
ทุคฺคติํ นาภิชานามิ, ผลทานสฺสิทํ ผลํฯ
[71]
‘‘อิโต ปนฺนรเส กปฺเป, ตโย อาสุํ ปิยาลิโน;
สตฺตรตนสมฺปนฺนา, จกฺกวตฺตี มหพฺพลาฯ
[72]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปิยาลผลทายโก เถโร อิมา คาถาโย อภาสิตฺถาติฯ
ปิยาลผลทายกตฺเถรสฺสาปทานํ ทสมํฯ
โสภิตวคฺโค จุทฺทสโมฯ
ตสฺสุทฺทานํ –
โสภิตสุทสฺสโน จ, จนฺทโน ปุปฺผฉทโน;
รโห จมฺปกปุปฺผี จ, อตฺถสนฺทสฺสเกน จฯ
เอกปสาที [เอกรํสิ (สฺยา.)] สาลทโท, ทสโม ผลทายโก;
คาถาโย สตฺตติ ทฺเว จ, คณิตาโย วิภาวิภิฯ
15. ฉตฺตวคฺโค