2. สุทสฺสนตฺเถรอปทานํ

[10]

‘‘วินตา นทิยา [วิตฺถตาย นทิยา (สฺยา.)] ตีเร, ปิลกฺขุ [ปิลกฺโข (สี. เถรคาถา อฏฺฐ.)] ผลิโต อหุ;

ตาหํ รุกฺขํ คเวสนฺโต, อทฺทสํ โลกนายกํฯ

[11]

‘‘เกตกํ ปุปฺผิตํ ทิสฺวา, วณฺเฏ เฉตฺวานหํ ตทา;

พุทฺธสฺส อภิโรเปสิํ, สิขิโน โลกพนฺธุโนฯ

[12]

‘‘เยน ญาเณน ปตฺโตสิ, อจฺจุตํ อมตํ ปทํ;

ตํ ญาณํ อภิปูเชมิ, พุทฺธเสฏฺฐ มหามุนิฯ

[13]

‘‘ญาณมฺหิ ปูชํ กตฺวาน, ปิลกฺขุมทฺทสํ อหํ;

ปฏิลทฺโธมฺหิ ตํ ปญฺญํ [ตํ สญฺญํ (สฺยา.), ตํ ปุญฺญํ (ก.)], ญาณปูชายิทํ ผลํฯ

[14]

‘‘เอกตฺติํเส อิโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, ญาณปูชายิทํ ผลํฯ

[15]

‘‘อิโต เตรสกปฺปมฺหิ, ทฺวาทสาสุํ ผลุคฺคตา;

สตฺตรตนสมฺปนฺนา, จกฺกวตฺตี มหปฺผลาฯ

[16]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สุทสฺสโน เถโร อิมา คาถาโย อภาสิตฺถาติฯ

สุทสฺสนตฺเถรสฺสาปทานํ ทุติยํฯ

3. จนฺทนปูชนกตฺเถรอปทานํ

[17]

‘‘จนฺทภาคานทีตีเร, อโหสิํ กินฺนโร ตทา;

ปุปฺผภกฺโข จหํ อาสิํ, ปุปฺผานิวสโน ตถา [ปุปฺผานํ วสโน อหํ (สฺยา.)]ฯ

[18]

‘‘อตฺถทสฺสี ตุ ภควา, โลกเชฏฺโฐ นราสโภ;

วิปินคฺเคน นิยฺยาสิ, หํสราชาว อมฺพเรฯ

[19]

‘‘นโม เต ปุริสาชญฺญ, จิตฺตํ เต สุวิโสธิตํ;

ปสนฺนมุขวณฺโณสิ, วิปฺปสนฺนมุขินฺทฺริโยฯ

[20]

‘‘โอโรหิตฺวาน อากาสา, ภูริปญฺโญ สุเมธโส;

สงฺฆาฏิํ ปตฺถริตฺวาน, ปลฺลงฺเกน อุปาวิสิฯ

[21]

‘‘วิลีนํ จนฺทนาทาย, อคมาสิํ ชินนฺติกํ;

ปสนฺนจิตฺโต สุมโน, พุทฺธสฺส อภิโรปยิํฯ

[22]

‘‘อภิวาเทตฺวาน สมฺพุทฺธํ, โลกเชฏฺฐํ นราสภํ;

ปาโมชฺชํ ชนยิตฺวาน, ปกฺกามิํ อุตฺตรามุโขฯ

[23]

‘‘อฏฺฐารเส กปฺปสเต, จนฺทนํ ยํ อปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[24]

‘‘จตุทฺทเส กปฺปสเต, อิโต อาสิํสุ เต ตโย;

โรหณี นาม [โรหิตา นาม (สี.), โรหิณี นาม (สฺยา.)] นาเมน, จกฺกวตฺตี มหพฺพลาฯ

[25]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา จนฺทนปูชนโก เถโร อิมา คาถาโย อภาสิตฺถาติ;

จนฺทนปูชนกตฺเถรสฺสาปทานํ ตติยํฯ

อฏฺฐมภาณวารํฯ

4. ปุปฺผจฺฉทนิยตฺเถรอปทานํ

[26]

‘‘สุนนฺโท นาม นาเมน, พฺราหฺมโณ มนฺตปารคู;

อชฺฌายโก ยาจโยโค, วาชเปยฺยํ อยาชยิฯ

[27]

‘‘ปทุมุตฺตโร โลกวิทู, อคฺโค การุณิโก อิสิ;

ชนตํ อนุกมฺปนฺโต, อมฺพเร จงฺกมี ตทาฯ

[28]

‘‘จงฺกมิตฺวาน สมฺพุทฺโธ, สพฺพญฺญู โลกนายโก;

เมตฺตาย อผริ สตฺเต, อปฺปมาเณ [อปฺปมาณํ (สี. สฺยา.)] นิรูปธิฯ

[29]

‘‘วณฺเฏ เฉตฺวาน ปุปฺผานิ, พฺราหฺมโณ มนฺตปารคู;

สพฺเพ สิสฺเส สมาเนตฺวา, อากาเส อุกฺขิปาปยิฯ

[30]