‘‘ปทโก เวยฺยากรโณ, นิมิตฺตโกวิโท อหํ;
มนฺเต จ สิสฺเส วาเจสิํ, ติณฺณํ เวทาน ปารคูฯ
[67]
‘‘ปญฺจ อุปฺปลหตฺถานิ, ปิฏฺฐิยํ ฐปิตานิ เม;
อาหุติํ ยิฏฺฐุกาโมหํ, ปิตุมาตุสมาคเมฯ
[68]
‘‘ตทา วิปสฺสี ภควา, ภิกฺขุสงฺฆปุรกฺขโต;
โอภาเสนฺโต ทิสา สพฺพา, อาคจฺฉติ นราสโภฯ
[69]
‘‘อาสนํ ปญฺญเปตฺวาน, นิมนฺเตตฺวา มหามุนิํ;
สนฺถริตฺวาน ตํ ปุปฺผํ, อภิเนสิํ สกํ ฆรํฯ
[70]
‘‘ยํ เม อตฺถิ สเก เคเห, อามิสํ ปจฺจุปฏฺฐิตํ;
ตาหํ พุทฺธสฺส ปาทาสิํ, ปสนฺโน เสหิ ปาณิภิฯ
[71]
‘‘ภุตฺตาวิํ กาลมญฺญาย, ปุปฺผหตฺถมทาสหํ;
อนุโมทิตฺวาน สพฺพญฺญู, ปกฺกามิ อุตฺตรามุโขฯ
[72]
‘‘เอกนวุติโต กปฺเป, ยํ ปุปฺผมททิํ ตทา;
ทุคฺคติํ นาภิชานามิ, ปุปฺผทานสฺสิทํ ผลํฯ
[73]
‘‘อนนฺตรํ อิโต กปฺเป, ราชาหุํ วรทสฺสโน;
สตฺตรตนสมฺปนฺโน, จกฺกวตฺตี มหพฺพโลฯ
[74]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กุสุมาสนิโย เถโร อิมา คาถาโย อภาสิตฺถาติฯ
กุสุมาสนิยตฺเถรสฺสาปทานํ ฉฏฺฐํฯ
7. ผลทายกตฺเถรอปทานํ
[75]
‘‘อชฺฌายโก มนฺตธโร, ติณฺณํ เวทาน ปารคู;
หิมวนฺตสฺสาวิทูเร, วสามิ อสฺสเม อหํฯ
[76]
‘‘อคฺคิหุตฺตญฺจ เม อตฺถิ, ปุณฺฑรีกผลานิ จ;
ปุฏเก นิกฺขิปิตฺวาน, ทุมคฺเค ลคฺคิตํ มยาฯ
[77]
‘‘ปทุมุตฺตโร โลกวิทู, อาหุตีนํ ปฏิคฺคโห;
มมุทฺธริตุกาโม โส, ภิกฺขนฺโต มมุปาคมิฯ
[78]
‘‘ปสนฺนจิตฺโต สุมโน, ผลํ พุทฺธสฺสทาสหํ;
วิตฺติสญฺชนโน มยฺหํ, ทิฏฺฐธมฺมสุขาวโหฯ
[79]
‘‘สุวณฺณวณฺโณ สมฺพุทฺโธ, อาหุตีนํ ปฏิคฺคโห;
อนฺตลิกฺเข ฐิโต สตฺถา, อิมํ คาถํ อภาสถฯ
[80]
‘‘‘อิมินา ผลทาเนน, เจตนาปณิธีหิ จ;
กปฺปานํ สตสหสฺสํ, ทุคฺคติํ นุปปชฺชสิ’ฯ
[81]
‘‘เตเนว สุกฺกมูเลน, อนุโภตฺวาน สมฺปทา;
ปตฺโตมฺหิ อจลํ ฐานํ, หิตฺวา ชยปราชยํฯ
[82]
‘‘อิโต สตฺตสเต กปฺเป, ราชา อาสิํ สุมงฺคโล;
สตฺตรตนสมฺปนฺโน จกฺกวตฺตี มหพฺพโลฯ
[83]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ผลทายโก เถโร อิมา คาถาโย อภาสิตฺถาติฯ
ผลทายกตฺเถรสฺสาปทานํ สตฺตมํฯ
8. ญาณสญฺญิกตฺเถรอปทานํ
[84]
‘‘ปพฺพเต หิมวนฺตมฺหิ, วสามิ ปพฺพตนฺตเร;
ปุลินํ โสภนํ ทิสฺวา, พุทฺธเสฏฺฐํ อนุสฺสริํฯ
[85]
‘‘ญาเณ อุปนิธา นตฺถิ, สงฺขารํ [สงฺคามํ (สี. สฺยา.), สงฺขาตํ (เถรคาถา อฏฺฐ.)] นตฺถิ สตฺถุโน;
สพฺพธมฺมํ อภิญฺญาย, ญาเณน อธิมุจฺจติฯ
[86]
‘‘นโม เต ปุริสาชญฺญ, นโม เต ปุริสุตฺตม;
ญาเณน เต สโม นตฺถิ, ยาวตา ญาณมุตฺตมํฯ
[87]
‘‘ญาเณ จิตฺตํ ปสาเทตฺวา, กปฺปํ สคฺคมฺหิ โมทหํ;
อวเสเสสุ กปฺเปสุ, กุสลํ จริตํ [กริตํ (สี. สฺยา.), กิริยํ (ก.)] มยาฯ
[88]