เมนู

‘‘เอกตาลีสิโต กปฺเป, พุทฺโธ นามาสิ ขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[34]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปายสทายโก [ปายาสทายโก (สฺยา. ก.)] เถโร อิมา คาถาโย อภาสิตฺถาติฯ

ปายสทายกตฺเถรสฺสาปทานํ ตติยํฯ

4. คนฺโธทกิยตฺเถรอปทานํ

[35]

‘‘นิสชฺช ปาสาทวเร, วิปสฺสิํ อทฺทสํ ชินํ;

กกุธํ วิลสนฺตํว, สพฺพญฺญุํ ตมนาสกํ [สพฺพญฺญุตฺตมนายกํ (สฺยา.), สพฺพญฺญุตมนาสวํ (ก.)]

[36]

‘‘ปาสาทสฺสาวิทูเร จ, คจฺฉติ โลกนายโก;

ปภา นิทฺธาวเต ตสฺส, ยถา จ สตรํสิโนฯ

[37]

‘‘คนฺโธทกญฺจ ปคฺคยฺห, พุทฺธเสฏฺฐํ สโมกิริํ;

เตน จิตฺตปฺปสาเทน, ตตฺถ กาลงฺกโต อหํฯ

[38]

‘‘เอกนวุติโต กปฺเป, ยํ คนฺโธทกมากิริํ;

ทุคฺคติํ นาภิชานามิ, พุทฺธปูชายิทํ ผลํฯ

[39]

‘‘เอกตฺติํเส อิโต กปฺเป, สุคนฺโธ นาม ขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[40]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา คนฺโธทกิโย เถโร อิมา คาถาโย อภาสิตฺถาติฯ

คนฺโธทกิยตฺเถรสฺสาปทานํ จตุตฺถํฯ

5. สมฺมุขาถวิกตฺเถรอปทานํ

[41]

‘‘ชายมาเน วิปสฺสิมฺหิ, นิมิตฺตํ พฺยากริํ อหํ;

‘นิพฺพาปยิญฺจ [นิพฺพาปยํ จ (สี. สฺยา.), นิพฺพาปยนฺโต (?)] ชนตํ, พุทฺโธ โลเก ภวิสฺสติฯ

[42]