1. เสเรยฺยกตฺเถรอปทานํ

[1]

‘‘อชฺฌายโก มนฺตธโร, ติณฺณํ เวทาน ปารคู;

อพฺโภกาเส ฐิโต สนฺโต, อทฺทสํ โลกนายกํฯ

[2]

‘‘สีหํ ยถา วนจรํ, พฺยคฺฆราชํว นิตฺตสํ;

ติธาปภินฺนมาตงฺคํ, กุญฺชรํว มเหสินํฯ

[3]

‘‘เสเรยฺยกํ คเหตฺวาน, อากาเส อุกฺขิปิํ [นิกฺขิปิํ (ก.)] อหํ;

พุทฺธสฺส อานุภาเวน, ปริวาเรนฺติ สพฺพโส [สพฺพโต (สี.)]ฯ

[4]

‘‘อธิฏฺฐหิ มหาวีโร, สพฺพญฺญู โลกนายโก;

สมนฺตา ปุปฺผจฺฉทนา, โอกิริํสุ นราสภํฯ

[5]

‘‘ตโต สา ปุปฺผกญฺจุกา, อนฺโตวณฺฏา พหิมุขา;

สตฺตาหํ ฉทนํ กตฺวา, ตโต อนฺตรธายถฯ

[6]

‘‘ตญฺจ อจฺฉริยํ ทิสฺวา, อพฺภุตํ โลมหํสนํ;

พุทฺเธ จิตฺตํ ปสาเทสิํ, สุคเต โลกนายเกฯ

[7]

‘‘เตน จิตฺตปฺปสาเทน, สุกฺกมูเลน โจทิโต;

กปฺปานํ สตสหสฺสํ, ทุคฺคติํ นุปปชฺชหํฯ

[8]

‘‘ปนฺนรสสหสฺสมฺหิ , กปฺปานํ ปญฺจวีสติ;

วีตมลา [จิตฺตมาลา (สี.), วิลามาลา (สฺยา.)] สมานา จ, จกฺกวตฺตี มหพฺพลาฯ

[9]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา เสเรยฺยโก เถโร อิมา คาถาโย อภาสิตฺถาติฯ

เสเรยฺยกตฺเถรสฺสาปทานํ ปฐมํฯ

2. ปุปฺผถูปิยตฺเถรอปทานํ

[10]

‘‘หิมวนฺตสฺสาวิทูเร , กุกฺกุโร นาม [กุกฺกุโฏ นาม (สี.)] ปพฺพโต;

เวมชฺเฌ ตสฺส วสติ, พฺราหฺมโณ มนฺตปารคูฯ

[11]

‘‘ปญฺจ สิสฺสสหสฺสานิ, ปริวาเรนฺติ มํ สทา;

ปุพฺพุฏฺฐายี จ เต อาสุํ, มนฺเตสุ จ วิสารทาฯ

[12]

‘‘พุทฺโธ โลเก สมุปฺปนฺโน, ตํ วิชานาถ โน ภวํ;

อสีติพฺยญฺชนานสฺส, พาตฺติํสวรลกฺขณาฯ

[13]

‘‘พฺยามปฺปโภ ชินวโร, อาทิจฺโจว วิโรจติ;

สิสฺสานํ วจนํ สุตฺวา, พฺราหฺมโณ มนฺตปารคูฯ

[14]

‘‘อสฺสมา อภินิกฺขมฺม, ทิสํ ปุจฺฉติ สิสฺสเก [พฺราหฺมโณ (สฺยา.)];

ยมฺหิ เทเส มหาวีโร, วสติ โลกนายโกฯ

[15]

‘‘ตาหํ ทิสํ นมสฺสิสฺสํ, ชินํ อปฺปฏิปุคฺคลํ;

อุทคฺคจิตฺโต สุมโน, ปูเชสิํ ตํ ตถาคตํฯ

[16]

‘‘เอถ สิสฺสา คมิสฺสาม, ทกฺขิสฺสาม ตถาคตํ;

วนฺทิตฺวา สตฺถุโน ปาเท, โสสฺสาม ชินสาสนํฯ

[17]

‘‘เอกาหํ อภินิกฺขมฺม, พฺยาธิํ ปฏิลภิํ อหํ;

พฺยาธินา ปีฬิโต สนฺโต, สาลํ วาสยิตุํ คมิํฯ

[18]

‘‘สพฺเพ สิสฺเส สมาเนตฺวา, อปุจฺฉิํ เต ตถาคตํ;

กีทิสํ โลกนาถสฺส, คุณํ ปรมพุทฺธิโนฯ

[19]

‘‘เต เม ปุฏฺฐา วิยากํสุ, ยถา ทสฺสาวิโน ตถา;

สกฺกจฺจํ พุทฺธเสฏฺฐํ ตํ, เทเสสุํ [ทสฺเสสุํ (สี. สฺยา.)] มม สมฺมุขาฯ

[20]

‘‘เตสาหํ วจนํ สุตฺวา, สกํ จิตฺตํ ปสาทยิํ;

ปุปฺเผหิ ถูปํ กตฺวาน, ตตฺถ กาลงฺกโต อหํฯ

[21]

‘‘เต เม สรีรํ ฌาเปตฺวา, อคมุํ พุทฺธสนฺติกํ;

อญฺชลิํ ปคฺคเหตฺวาน, สตฺถารมภิวาทยุํฯ

[22]

‘‘ปุปฺเผหิ ถูปํ กตฺวาน, สุคตสฺส มเหสิโน;

กปฺปานํ สตสหสฺสํ, ทุคฺคติํ นุปปชฺชหํฯ

[23]