‘‘เอกตฺติํเส อิโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, จิตปูชายิทํ ผลํฯ

[55]

‘‘เอกูนติํสกปฺปมฺหิ, อิโต โสฬส ราชาโน;

อุคฺคตา นาม นาเมน, จกฺกวตฺตี มหพฺพลาฯ

[56]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา จิตกปูชโก เถโร อิมา คาถาโย อภาสิตฺถาติฯ

จิตกปูชกตฺเถรสฺสาปทานํ ฉฏฺฐํฯ

7. พุทฺธสญฺญกตฺเถรอปทานํ

[57]

‘‘ยทา วิปสฺสี โลกคฺโค, อายุสงฺขารโมสฺสชิ;

ปถวี สมฺปกมฺปิตฺถ, เมทนี ชลเมขลาฯ

[58]

‘‘โอตตํ วิตฺถตํ [โอตตํ วิตตํ (สฺยา.)] มยฺหํ, สุวิจิตฺตวฏํสกํ [สุจิจิตฺตํ ปปญฺจกํ (สฺยา.)];

ภวนมฺปิ ปกมฺปิตฺถ, พุทฺธสฺส อายุสงฺขเยฯ

[59]

‘‘ตาโส มยฺหํ สมุปฺปนฺโน, ภวเน สมฺปกมฺปิเต;

อุปฺปาโท [อุปฺปาโต (?)] นุ กิมตฺถาย, อาโลโก วิปุโล อหุฯ

[60]

‘‘เวสฺสวโณ อิธาคมฺม, นิพฺพาเปสิ มหาชนํ;

ปาณภูเต [ปาณภุตํ (สฺยา.), ปาณภูนํ (สี. ก.)] ภยํ นตฺถิ, เอกคฺคา โหถ สํวุตา [สคารวา (สฺยา.)]ฯ

[61]

‘‘อโห พุทฺโธ อโห ธมฺโม, อโห โน สตฺถุ สมฺปทา;

ยสฺมิํ อุปฺปชฺชมานมฺหิ, ปถวี [ปฐวี (สี. สฺยา.)] สมฺปกมฺปติฯ

[62]

‘‘พุทฺธานุภาวํ กิตฺเตตฺวา, กปฺปํ สคฺคมฺหิ โมทหํ;

อวเสเสสุ กปฺเปสุ, กุสลํ จริตํ [กริตํ (สี. สฺยา.), การิตํ (ก.)] มยาฯ

[63]

‘‘เอกนวุติโต กปฺเป, ยํ สญฺญมลภิํ ตทา;

ทุคฺคติํ นาภิชานามิ, พุทฺธสญฺญายิทํ ผลํฯ

[64]

‘‘อิโต จุทฺทสกปฺปมฺหิ, ราชา อาสิํ ปตาปวา;

สมิโต นาม นาเมน, จกฺกวตฺตี มหพฺพโลฯ

[65]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา พุทฺธสญฺญโก เถโร อิมา คาถาโย อภาสิตฺถาติฯ

พุทฺธสญฺญกตฺเถรสฺสาปทานํ สตฺตมํฯ

8. มคฺคสญฺญกตฺเถรอปทานํ

[66]

‘‘ปทุมุตฺตรพุทฺธสฺส, สาวกา วนจาริโน;

วิปฺปนฏฺฐา พฺรหารญฺเญ, อนฺธาว อนุสุยฺยเร [อนุสุยเร (สี.)]ฯ

[67]

‘‘อนุสฺสริตฺวา สมฺพุทฺธํ, ปทุมุตฺตรนายกํ;

ตสฺส เต มุนิโน ปุตฺตา, วิปฺปนฏฺฐา มหาวเนฯ

[68]

‘‘ภวนา โอรุหิตฺวาน, อคมิํ ภิกฺขุสนฺติกํ;

เตสํ มคฺคญฺจ อาจิกฺขิํ, โภชนญฺจ อทาสหํฯ

[69]

‘‘เตน กมฺเมน ทฺวิปทินฺท, โลกเชฏฺฐ นราสภ;

ชาติยา สตฺตวสฺโสหํ, อรหตฺตมปาปุณิํฯ

[70]

‘‘สจกฺขู นาม นาเมน, ทฺวาทส จกฺกวตฺติโน;

สตฺตรตนสมฺปนฺนา, ปญฺจกปฺปสเต อิโตฯ

[71]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา มคฺคสญฺญโก เถโร อิมา คาถาโย อภาสิตฺถาติฯ

มคฺคสญฺญกตฺเถรสฺสาปทานํ อฏฺฐมํฯ

9. ปจฺจุปฏฺฐานสญฺญกตฺเถรอปทานํ

[72]

‘‘อตฺถทสฺสิมฺหิ สุคเต, นิพฺพุเต สมนนฺตรา;

ยกฺขโยนิํ อุปปชฺชิํ, ยสํ ปตฺโต จหํ ตทาฯ

[73]