‘‘เตน กมฺเมน ทฺวิปทินฺท, โลกเชฏฺฐ นราสภ;

สนฺนิพฺพาเปมิ [สนฺทิฏฺฐาเปมิ (ก.)] อตฺตานํ, ภวา สพฺเพ สมูหตาฯ

[50]

‘‘อฏฺฐารสกปฺปสเต, ยํ ทานมททิํ ตทา;

ทุคฺคติํ นาภิชานามิ, สีหาสนสฺสิทํ ผลํฯ

[51]

‘‘อิโต สตฺตกปฺปสเต, สนฺนิพฺพาปก [สนฺนิฏฺโฐ นาม (ก.)] ขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[52]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อาสนุปฏฺฐาหโก เถโร อิมา คาถาโย อภาสิตฺถาติฯ

อาสนุปฏฺฐาหกตฺเถรสฺสาปทานํ อฏฺฐมํฯ

9. พิฬาลิทายกตฺเถรอปทานํ

[53]

‘‘หิมวนฺตสฺสาวิทูเร , วสามิ ปณฺณสนฺถเร;

ฆาเสสุ เคธมาปนฺโน, เสยฺยสีโล จหํ [เสยสีโลวหํ (สฺยา. ก.)] ตทาฯ

[54]

‘‘ขณนฺตาลุ [ขณมาลุ (สฺยา.)] กลมฺพานิ, พิฬาลิตกฺกลานิ จ;

โกลํ ภลฺลาตกํ พิลฺลํ, อาหตฺวา ปฏิยาทิตํฯ

[55]

‘‘ปทุมุตฺตโร โลกวิทู, อาหุตีนํ ปฏิคฺคโห;

มม สงฺกปฺปมญฺญาย, อาคจฺฉิ มม สนฺติกํฯ

[56]

‘‘อุปาคตํ มหานาคํ, เทวเทวํ นราสภํ;

พิฬาลิํ ปคฺคเหตฺวาน, ปตฺตมฺหิ โอกิริํ อหํฯ

[57]

‘‘ปริภุญฺชิ มหาวีโร, โตสยนฺโต มมํ ตทา;

ปริภุญฺชิตฺวาน สพฺพญฺญู, อิมํ คาถํ อภาสถฯ

[58]

‘‘‘สกํ จิตฺตํ ปสาเทตฺวา, พิฬาลิํ เม อทา ตุวํ;

กปฺปานํ สตสหสฺสํ, ทุคฺคติํ นุปปชฺชสิ’ฯ

[59]