1. ภิกฺขทายกตฺเถรอปทานํ
[1]
‘‘สุวณฺณวณฺณํ สมฺพุทฺธํ, อาหุตีนํ ปฏิคฺคหํ;
ปวรา [ปวนา (สฺยา.)] อภินิกฺขนฺตํ, วนา นิพฺพนมาคตํ [วานา นิพฺพานมาคตํ (สฺยา.)]ฯ
[2]
‘‘กฏจฺฉุภิกฺขํ ปาทาสิํ, สิทฺธตฺถสฺส มเหสิโน;
ปญฺญาย อุปสนฺตสฺส, มหาวีรสฺส ตาทิโนฯ
[3]
‘‘ปเทนานุปทายนฺตํ [ปเทนานุปทายนฺโต (สี. สฺยา.)], นิพฺพาเปนฺเต มหาชนํ;
อุฬารา วิตฺติ เม ชาตา, พุทฺเธ อาทิจฺจพนฺธุเน [วิตฺติ เม ปาหุนา ตาว, พุทฺธสฺสาทิจฺจพนฺธุโน (สฺยา.)]ฯ
[4]
‘‘จตุนฺนวุติโต กปฺเป, ยํ ทานมททิํ ตทา;
ทุคฺคติํ นาภิชานามิ, ภิกฺขาทานสฺสิทํ ผลํฯ
[5]
‘‘สตฺตาสีติมฺหิโต กปฺเป, มหาเรณุ สนามกา;
สตฺตรตนสมฺปนฺนา, สตฺเตเต จกฺกวตฺติโนฯ
[6]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา ภิกฺขทายโก เถโร อิมา คาถาโย อภาสิตฺถาติฯ
ภิกฺขทายกตฺเถรสฺสาปทานํ ปฐมํฯ
2. ญาณสญฺญิกตฺเถรอปทานํ
[7]
‘‘สุวณฺณวณฺณํ สมฺพุทฺธํ, นิสภาชานิยํ ยถา;
ติธาปภินฺนํ มาตงฺคํ, กุญฺชรํว มเหสินํฯ
[8]
‘‘โอภาเสนฺตํ ทิสา สพฺพา, อุฬุราชํว ปูริตํ;
รถิยํ ปฏิปชฺชนฺตํ, โลกเชฏฺฐํ อปสฺสหํฯ
[9]
‘‘ญาเณ จิตฺตํ ปสาเทตฺวา, ปคฺคเหตฺวาน อญฺชลิํ;
ปสนฺนจิตฺโต สุมโน, สิทฺธตฺถมภิวาทยิํฯ
[10]
‘‘จตุนฺนวุติโต กปฺเป, ยํ กมฺมมกริํ ตทา;
ทุคฺคติํ นาภิชานามิ, ญาณสญฺญายิทํ ผลํฯ
[11]
‘‘เตสตฺตติมฺหิโต กปฺเป, โสฬสาสุํ นรุตฺตมา;
สตฺตรตนสมฺปนฺนา, จกฺกวตฺตี มหพฺพลาฯ
[12]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ญาณสญฺญิโก เถโร อิมา คาถาโย อภาสิตฺถาติฯ
ญาณสญฺญิกตฺเถรสฺสาปทานํ ทุติยํฯ
3. อุปฺปลหตฺถิยตฺเถรอปทานํ
[13]
‘‘ติวรายํ นิวาสีหํ, อโหสิํ มาลิโก ตทา;
อทฺทสํ วิรชํ พุทฺธํ, สิทฺธตฺถํ โลกปูชิตํ [โลกนายกํ (สี.)]ฯ
[14]
‘‘ปสนฺนจิตฺโต สุมโน, ปุปฺผหตฺถมทาสหํ;
ยตฺถ ยตฺถุปปชฺชามิ, ตสฺส กมฺมสฺส วาหสาฯ
[15]
‘‘อนุโภมิ ผลํ อิฏฺฐํ, ปุพฺเพ สุกตมตฺตโน;
ปริกฺขิตฺโต สุมลฺเลหิ, ปุปฺผทานสฺสิทํ ผลํฯ
[16]
‘‘จตุนฺนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, ปุปฺผปูชายิทํ [พุทฺธปูชายิทํ (สี.)] ผลํฯ
[17]
‘‘จตุนฺนวุตุปาทาย, ฐเปตฺวา วตฺตมานกํ;
ปญฺจราชสตา ตตฺถ, นชฺชสมสนามกา [นชฺชุปมสนามกา (สี. สฺยา.)]ฯ
[18]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อุปฺปลหตฺถิโย เถโร อิมา คาถาโย อภาสิตฺถาติฯ
อุปฺปลหตฺถิยตฺเถรสฺสาปทานํ ตติยํฯ