เมนู

‘‘จตุนฺนวุติโต กปฺเป, อทาสิํ ปณฺณสนฺถรํ;

ทุคฺคติํ นาภิชานามิ, สนฺถรสฺส อิทํ ผลํฯ

[49]

‘‘ติณสนฺถรกา นาม, สตฺเตเต จกฺกวตฺติโน;

อิโต เต ปญฺจเม กปฺเป, อุปฺปชฺชิํสุ ชนาธิปาฯ

[50]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เสนาสนทายโก เถโร อิมา คาถาโย อภาสิตฺถาติฯ

เสนาสนทายกตฺเถรสฺสาปทานํ อฏฺฐมํฯ

9. เวยฺยาวจฺจกตฺเถรอปทานํ

[51]

‘‘วิปสฺสิสฺส ภควโต, มหาปูคคโณ อหุ;

เวยฺยาวจฺจกโร อาสิํ, สพฺพกิจฺเจสุ วาวโฏ [พฺยาวโฏ (สี. สฺยา.)]

[52]

‘‘เทยฺยธมฺโม จ เม นตฺถิ, สุคตสฺส มเหสิโน;

อวนฺทิํ สตฺถุโน ปาเท, วิปฺปสนฺเนน เจตสาฯ

[53]

‘‘เอกนวุติโต กปฺเป, เวยฺยาวจฺจํ อกาสหํ;

ทุคฺคติํ นาภิชานามิ, เวยฺยาวจฺจสฺสิทํ ผลํฯ

[54]

‘‘อิโต จ อฏฺฐเม กปฺเป, ราชา อาสิํ สุจินฺติโต;

สตฺตรตนสมฺปนฺโน, จกฺกวตฺตี มหพฺพโลฯ

[55]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เวยฺยาวจฺจโก เถโร อิมา คาถาโย อภาสิตฺถาติฯ

เวยฺยาวจฺจกตฺเถรสฺสาปทานํ นวมํฯ

10. พุทฺธุปฏฺฐากตฺเถรอปทานํ

[56]

‘‘วิปสฺสิสฺส ภควโต, อโหสิํ สงฺขธมฺมโก;

นิจฺจุปฏฺฐานยุตฺโตมฺหิ, สุคตสฺส มเหสิโนฯ

[57]

‘‘อุปฏฺฐานผลํ ปสฺส, โลกนาถสฺส ตาทิโน;

สฏฺฐิตูริยสหสฺสานิ, ปริวาเรนฺติ มํ สทาฯ

[58]

‘‘เอกนวุติโต กปฺเป, อุปฏฺฐหิํ มหาอิสิํ;

ทุคฺคติํ นาภิชานามิ, อุปฏฺฐานสฺสิทํ ผลํฯ

[59]

‘‘จตุวีเส [จตุนวุเต (สฺยา.)] อิโต กปฺเป, มหานิคฺโฆสนามกา;

โสฬสาสิํสุ ราชาโน, จกฺกวตฺตี มหพฺพลาฯ

[60]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา พุทฺธุปฏฺฐาโก เถโร อิมา คาถาโย อภาสิตฺถาติฯ

พุทฺธุปฏฺฐากตฺเถรสฺสาปทานํ ทสมํฯ

สุธาวคฺโค ทสโมฯ

ตสฺสุทฺทานํ –

สุธา สุจินฺติ เจฬญฺจ, สูจี จ คนฺธมาลิโย;

ติปุปฺผิโย มธุเสนา, เวยฺยาวจฺโจ จุปฏฺฐโก;

สมสฏฺฐิ จ คาถาโย, อสฺมิํ วคฺเค ปกิตฺติตาฯ

อถ วคฺคุทฺทานํ –

พุทฺธวคฺโค หิ ปฐโม, สีหาสนิ สุภูติ จ;

กุณฺฑธาโน อุปาลิ จ, พีชนิสกจินฺติ จฯ

นาคสมาโล ติมิโร, สุธาวคฺเคน เต ทส;

จตุทฺทสสตา คาถา, ปญฺจปญฺญาสเมว จฯ

พุทฺธวคฺคทสกํฯ

ปฐมสตกํ สมตฺตํฯ

11. ภิกฺขทายิวคฺโค