‘‘นิพฺพุตตฺตํ [นิพฺพุตคฺคํ (ก.), นิพฺพูติกํ (สฺยา.)] มหานาคํ, นิสภาชานิยํ ยถา;
โอสธิํว วิโรจนฺตํ, เทวสงฺฆนมสฺสิตํฯ
[39]
‘‘วิตฺติ มมาหุ ตาวเท [วิตฺติ เม ปาหุนา ตาว (สี. สฺยา.)], ญาณํ อุปฺปชฺชิ ตาวเท;
วุฏฺฐิตสฺส สมาธิมฺหา, มธุํ ทตฺวาน สตฺถุโนฯ
[40]
‘‘วนฺทิตฺวา สตฺถุโน ปาเท, ปกฺกามิํ ปาจินามุโข;
จตุตฺติํสมฺหิ กปฺปมฺหิ, ราชา อาสิํ สุทสฺสโนฯ
[41]
‘‘มธุ ภิเสหิ สวติ, โภชนมฺหิ จ ตาวเท;
มธุวสฺสํ ปวสฺสิตฺถ, ปุพฺพกมฺมสฺสิทํ ผลํฯ
[42]
‘‘จตุนฺนวุติโต กปฺเป, ยํ มธุํ อททิํ ตทา;
ทุคฺคติํ นาภิชานามิ, มธุทานสฺสิทํ ผลํฯ
[43]
‘‘จตุตฺติํเส อิโต กปฺเป, จตฺตาโร เต สุทสฺสนา;
สตฺตรตนสมฺปนฺนา, จกฺกวตฺตี มหพฺพลาฯ
[44]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มธุปิณฺฑิโก เถโร อิมา คาถาโย อภาสิตฺถาติฯ
มธุปิณฺฑิกตฺเถรสฺสาปทานํ สตฺตมํฯ
8. เสนาสนทายกตฺเถรอปทานํ
[45]
‘‘สิทฺธตฺถสฺส ภควโต, อทาสิํ ปณฺณสนฺถรํ;
สมนฺตา อุปหารญฺจ, กุสุมํ โอกิริํ อหํฯ
[46]
‘‘ปาสาเทวํ คุณํ รมฺมํ [ปาสาเท จ คุหํ รมฺมํ (สฺยา.)], อนุโภมิ มหารหํ;
มหคฺฆานิ จ ปุปฺผานิ, สยเนภิสวนฺติ เมฯ
[47]
‘‘สยเนหํ ตุวฏฺฏามิ, วิจิตฺเต ปุปฺผสนฺถเต;
ปุปฺผวุฏฺฐิ จ สยเน, อภิวสฺสติ ตาวเทฯ
[48]
‘‘จตุนฺนวุติโต กปฺเป, อทาสิํ ปณฺณสนฺถรํ;
ทุคฺคติํ นาภิชานามิ, สนฺถรสฺส อิทํ ผลํฯ
[49]
‘‘ติณสนฺถรกา นาม, สตฺเตเต จกฺกวตฺติโน;
อิโต เต ปญฺจเม กปฺเป, อุปฺปชฺชิํสุ ชนาธิปาฯ
[50]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เสนาสนทายโก เถโร อิมา คาถาโย อภาสิตฺถาติฯ
เสนาสนทายกตฺเถรสฺสาปทานํ อฏฺฐมํฯ
9. เวยฺยาวจฺจกตฺเถรอปทานํ
[51]
‘‘วิปสฺสิสฺส ภควโต, มหาปูคคโณ อหุ;
เวยฺยาวจฺจกโร อาสิํ, สพฺพกิจฺเจสุ วาวโฏ [พฺยาวโฏ (สี. สฺยา.)]ฯ
[52]
‘‘เทยฺยธมฺโม จ เม นตฺถิ, สุคตสฺส มเหสิโน;
อวนฺทิํ สตฺถุโน ปาเท, วิปฺปสนฺเนน เจตสาฯ
[53]
‘‘เอกนวุติโต กปฺเป, เวยฺยาวจฺจํ อกาสหํ;
ทุคฺคติํ นาภิชานามิ, เวยฺยาวจฺจสฺสิทํ ผลํฯ
[54]
‘‘อิโต จ อฏฺฐเม กปฺเป, ราชา อาสิํ สุจินฺติโต;
สตฺตรตนสมฺปนฺโน, จกฺกวตฺตี มหพฺพโลฯ
[55]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เวยฺยาวจฺจโก เถโร อิมา คาถาโย อภาสิตฺถาติฯ
เวยฺยาวจฺจกตฺเถรสฺสาปทานํ นวมํฯ
10. พุทฺธุปฏฺฐากตฺเถรอปทานํ
[56]
‘‘วิปสฺสิสฺส ภควโต, อโหสิํ สงฺขธมฺมโก;
นิจฺจุปฏฺฐานยุตฺโตมฺหิ, สุคตสฺส มเหสิโนฯ
[57]
