เมนู

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา คนฺธมาลิโย เถโร อิมา คาถาโย อภาสิตฺถาติฯ

คนฺธมาลิยตฺเถรสฺสาปทานํ ปญฺจมํฯ

6. ติปุปฺผิยตฺเถรอปทานํ

[31]

‘‘มิคลุทฺโท ปุเร อาสิํ, อรญฺเญ กานเน อหํ [พฺรหา (สฺยา.)];

ปาฏลิํ หริตํ ทิสฺวา, ตีณิ ปุปฺผานิ โอกิริํฯ

[32]

‘‘ปติตปตฺตานิ [สตฺตปตฺตานิ (สี.), สตปตฺตานิ (ก.), สุกฺขปณฺณานิ (สฺยา.)] คณฺหิตฺวา, พหิ ฉฑฺเฑสหํ ตทา;

อนฺโตสุทฺธํ พหิสุทฺธํ, สุวิมุตฺตํ อนาสวํฯ

[33]

‘‘สมฺมุขา วิย สมฺพุทฺธํ, วิปสฺสิํ โลกนายกํ;

ปาฏลิํ อภิวาเทตฺวา, ตตฺถ กาลงฺกโต อหํฯ

[34]

‘‘เอกนวุติโต กปฺเป, ยํ โพธิมภิปูชยิํ;

ทุคฺคติํ นาภิชานามิ, โพธิปูชายิทํ ผลํฯ

[35]

‘‘สมนฺตปาสาทิกา นาม, เตรสาสิํสุ ราชิโน;

อิโต เตตฺติํสกปฺปมฺหิ [ติํสติกปฺปมฺหิ (สฺยา.)], จกฺกวตฺตี มหพฺพลาฯ

[36]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ติปุปฺผิโย เถโร อิมา คาถาโย อภาสิตฺถาติฯ

ติปุปฺผิยตฺเถรสฺสาปทานํ ฉฏฺฐํฯ

7. มธุปิณฺฑิกตฺเถรอปทานํ

[37]

‘‘วิปิเน [วิวเน (สฺยา. อฏฺฐ.)] กานเน ทิสฺวา, อปฺปสทฺเท นิรากุเล;

สิทฺธตฺถํ อิสินํ เสฏฺฐํ, อาหุตีนํ ปฏิคฺคหํฯ

[38]

‘‘นิพฺพุตตฺตํ [นิพฺพุตคฺคํ (ก.), นิพฺพูติกํ (สฺยา.)] มหานาคํ, นิสภาชานิยํ ยถา;

โอสธิํว วิโรจนฺตํ, เทวสงฺฆนมสฺสิตํฯ

[39]

‘‘วิตฺติ มมาหุ ตาวเท [วิตฺติ เม ปาหุนา ตาว (สี. สฺยา.)], ญาณํ อุปฺปชฺชิ ตาวเท;

วุฏฺฐิตสฺส สมาธิมฺหา, มธุํ ทตฺวาน สตฺถุโนฯ

[40]

‘‘วนฺทิตฺวา สตฺถุโน ปาเท, ปกฺกามิํ ปาจินามุโข;

จตุตฺติํสมฺหิ กปฺปมฺหิ, ราชา อาสิํ สุทสฺสโนฯ

[41]

‘‘มธุ ภิเสหิ สวติ, โภชนมฺหิ จ ตาวเท;

มธุวสฺสํ ปวสฺสิตฺถ, ปุพฺพกมฺมสฺสิทํ ผลํฯ

[42]

‘‘จตุนฺนวุติโต กปฺเป, ยํ มธุํ อททิํ ตทา;

ทุคฺคติํ นาภิชานามิ, มธุทานสฺสิทํ ผลํฯ

[43]

‘‘จตุตฺติํเส อิโต กปฺเป, จตฺตาโร เต สุทสฺสนา;

สตฺตรตนสมฺปนฺนา, จกฺกวตฺตี มหพฺพลาฯ

[44]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา มธุปิณฺฑิโก เถโร อิมา คาถาโย อภาสิตฺถาติฯ

มธุปิณฺฑิกตฺเถรสฺสาปทานํ สตฺตมํฯ

8. เสนาสนทายกตฺเถรอปทานํ

[45]

‘‘สิทฺธตฺถสฺส ภควโต, อทาสิํ ปณฺณสนฺถรํ;

สมนฺตา อุปหารญฺจ, กุสุมํ โอกิริํ อหํฯ

[46]

‘‘ปาสาเทวํ คุณํ รมฺมํ [ปาสาเท จ คุหํ รมฺมํ (สฺยา.)], อนุโภมิ มหารหํ;

มหคฺฆานิ จ ปุปฺผานิ, สยเนภิสวนฺติ เมฯ

[47]

‘‘สยเนหํ ตุวฏฺฏามิ, วิจิตฺเต ปุปฺผสนฺถเต;

ปุปฺผวุฏฺฐิ จ สยเน, อภิวสฺสติ ตาวเทฯ

[48]