4. สูจิทายกตฺเถรอปทานํ

[19]

‘‘กมฺมาโรหํ ปุเร อาสิํ, พนฺธุมายํ ปุรุตฺตเม;

สูจิทานํ มยา ทินฺนํ, วิปสฺสิสฺส มเหสิโนฯ

[20]

‘‘วชิรคฺคสมํ ญาณํ, โหติ กมฺเมน ตาทิสํ;

วิราโคมฺหิ วิมุตฺโตมฺหิ [วิภโวมฺหิ วิภตฺโตมฺหิ (ก.)], ปตฺโตมฺหิ อาสวกฺขยํฯ

[21]

‘‘อตีเต จ ภเว สพฺเพ, วตฺตมาเน จนาคเต [อตีตา จ ภวา สพฺเพ, วตฺตมานา จ’นาคตา (สฺยา. ก.)];

ญาเณน วิจินิํ สพฺพํ, สูจิทานสฺสิทํ ผลํฯ

[22]

‘‘เอกนวุติโต กปฺเป, สตฺตาสุํ วชิรวฺหยา;

สตฺตรตนสมฺปนฺนา, จกฺกวตฺตี มหพฺพลาฯ

[23]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สูจิทายโก เถโร อิมา คาถาโย อภาสิตฺถาติฯ

สูจิทายกตฺเถรสฺสาปทานํ จตุตฺถํฯ

5. คนฺธมาลิยตฺเถรอปทานํ

[24]

‘‘สิทฺธตฺถสฺส ภควโต, คนฺธถูปํ อกาสหํ;

สุมเนหิ ปฏิจฺฉนฺนํ, พุทฺธานุจฺฉวิกํ กตํฯ

[25]

‘‘กญฺจนคฺฆิยสงฺกาสํ, พุทฺธํ โลกคฺคนายกํ;

อินฺทีวรํว ชลิตํ, อาทิตฺตํว หุตาสนํฯ

[26]

‘‘พฺยคฺฆูสภํว ปวรํ, อภิชาตํว เกสริํ;

นิสินฺนํ สมณานคฺคํ, ภิกฺขุสงฺฆปุรกฺขตํฯ

[27]

‘‘วนฺทิตฺวา สตฺถุโน ปาเท, ปกฺกามิํ อุตฺตรามุโข;

จตุนฺนวุติโต กปฺเป, คนฺธมาลํ ยโต อทํฯ

[28]

‘‘พุทฺเธ กตสฺส การสฺส, ผเลนาหํ วิเสสโต;

ทุคฺคติํ นาภิชานามิ, พุทฺธปูชายิทํ ผลํฯ

[29]

‘‘จตฺตารีสมฺหิ เอกูเน, กปฺเป อาสิํสุ โสฬส;

เทวคนฺธสนามา เต, ราชาโน จกฺกวตฺติโนฯ

[30]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา คนฺธมาลิโย เถโร อิมา คาถาโย อภาสิตฺถาติฯ

คนฺธมาลิยตฺเถรสฺสาปทานํ ปญฺจมํฯ

6. ติปุปฺผิยตฺเถรอปทานํ

[31]

‘‘มิคลุทฺโท ปุเร อาสิํ, อรญฺเญ กานเน อหํ [พฺรหา (สฺยา.)];

ปาฏลิํ หริตํ ทิสฺวา, ตีณิ ปุปฺผานิ โอกิริํฯ

[32]

‘‘ปติตปตฺตานิ [สตฺตปตฺตานิ (สี.), สตปตฺตานิ (ก.), สุกฺขปณฺณานิ (สฺยา.)] คณฺหิตฺวา, พหิ ฉฑฺเฑสหํ ตทา;

อนฺโตสุทฺธํ พหิสุทฺธํ, สุวิมุตฺตํ อนาสวํฯ

[33]

‘‘สมฺมุขา วิย สมฺพุทฺธํ, วิปสฺสิํ โลกนายกํ;

ปาฏลิํ อภิวาเทตฺวา, ตตฺถ กาลงฺกโต อหํฯ

[34]

‘‘เอกนวุติโต กปฺเป, ยํ โพธิมภิปูชยิํ;

ทุคฺคติํ นาภิชานามิ, โพธิปูชายิทํ ผลํฯ

[35]

‘‘สมนฺตปาสาทิกา นาม, เตรสาสิํสุ ราชิโน;

อิโต เตตฺติํสกปฺปมฺหิ [ติํสติกปฺปมฺหิ (สฺยา.)], จกฺกวตฺตี มหพฺพลาฯ

[36]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ติปุปฺผิโย เถโร อิมา คาถาโย อภาสิตฺถาติฯ

ติปุปฺผิยตฺเถรสฺสาปทานํ ฉฏฺฐํฯ

7. มธุปิณฺฑิกตฺเถรอปทานํ

[37]

‘‘วิปิเน [วิวเน (สฺยา. อฏฺฐ.)] กานเน ทิสฺวา, อปฺปสทฺเท นิรากุเล;

สิทฺธตฺถํ อิสินํ เสฏฺฐํ, อาหุตีนํ ปฏิคฺคหํฯ

[38]