‘‘ปีฐํ พุทฺธสฺส ทตฺวาน, วิปฺปสนฺเนน เจตสา;

อนุโภมิ สกํ กมฺมํ, ปุพฺเพ สุกตมตฺตโนฯ

[11]

‘‘ทฺเวนวุเต อิโต กปฺเป, ยํ ปีฐมททิํ ตทา;

ทุคฺคติํ นาภิชานามิ, ปีฐทานสฺสิทํ ผลํฯ

[12]

‘‘อฏฺฐติํเส อิโต กปฺเป, ตโย เต จกฺกวตฺติโน;

รุจิ อุปรุจิ เจว, มหารุจิ ตติยโกฯ

[13]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สุจินฺติโก เถโร อิมา คาถาโย อภาสิตฺถาติฯ

สุจินฺติกตฺเถรสฺสาปทานํ ทุติยํฯ

3. อฑฺฒเจฬกตฺเถรอปทานํ

[14]

‘‘ติสฺสสฺสาหํ ภควโต, อุปฑฺฒทุสฺสมทาสหํ;

ปรมกาปญฺญปตฺโตมฺหิ [ปรมการุญฺญปตฺโตมฺหิ (สฺยา. ก.)], ทุคฺคเตน [ทุคฺคนฺเธน (สี.)] สมปฺปิโตฯ

[15]

‘‘อุปฑฺฒทุสฺสํ ทตฺวาน, กปฺปํ สคฺคมฺหิ โมทหํ;

อวเสเสสุ กปฺเปสุ, กุสลํ การิตํ มยาฯ

[16]

‘‘ทฺเวนวุเต อิโต กปฺเป, ยํ ทุสฺสมททิํ ตทา;

ทุคฺคติํ นาภิชานามิ, ทุสฺสทานสฺสิทํ ผลํฯ

[17]

‘‘เอกูนปญฺญาสกปฺปมฺหิ [เอกปญฺญาสกปฺปมฺหิ (สฺยา.)], ราชาโน จกฺกวตฺติโน;

สมนฺตจฺฉทนา นาม, พาตฺติํสาสุํ [ขตฺติยาสุํ (สฺยา. ก.)] ชนาธิปาฯ

[18]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อฑฺฒเจฬโก เถโร อิมา คาถาโย อภาสิตฺถาติฯ

อฑฺฒเจฬกตฺเถรสฺสาปทานํ ตติยํฯ

4. สูจิทายกตฺเถรอปทานํ

[19]

‘‘กมฺมาโรหํ ปุเร อาสิํ, พนฺธุมายํ ปุรุตฺตเม;

สูจิทานํ มยา ทินฺนํ, วิปสฺสิสฺส มเหสิโนฯ

[20]

‘‘วชิรคฺคสมํ ญาณํ, โหติ กมฺเมน ตาทิสํ;

วิราโคมฺหิ วิมุตฺโตมฺหิ [วิภโวมฺหิ วิภตฺโตมฺหิ (ก.)], ปตฺโตมฺหิ อาสวกฺขยํฯ

[21]

‘‘อตีเต จ ภเว สพฺเพ, วตฺตมาเน จนาคเต [อตีตา จ ภวา สพฺเพ, วตฺตมานา จ’นาคตา (สฺยา. ก.)];

ญาเณน วิจินิํ สพฺพํ, สูจิทานสฺสิทํ ผลํฯ

[22]

‘‘เอกนวุติโต กปฺเป, สตฺตาสุํ วชิรวฺหยา;

สตฺตรตนสมฺปนฺนา, จกฺกวตฺตี มหพฺพลาฯ

[23]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สูจิทายโก เถโร อิมา คาถาโย อภาสิตฺถาติฯ

สูจิทายกตฺเถรสฺสาปทานํ จตุตฺถํฯ

5. คนฺธมาลิยตฺเถรอปทานํ

[24]

‘‘สิทฺธตฺถสฺส ภควโต, คนฺธถูปํ อกาสหํ;

สุมเนหิ ปฏิจฺฉนฺนํ, พุทฺธานุจฺฉวิกํ กตํฯ

[25]

‘‘กญฺจนคฺฆิยสงฺกาสํ, พุทฺธํ โลกคฺคนายกํ;

อินฺทีวรํว ชลิตํ, อาทิตฺตํว หุตาสนํฯ

[26]

‘‘พฺยคฺฆูสภํว ปวรํ, อภิชาตํว เกสริํ;

นิสินฺนํ สมณานคฺคํ, ภิกฺขุสงฺฆปุรกฺขตํฯ

[27]

‘‘วนฺทิตฺวา สตฺถุโน ปาเท, ปกฺกามิํ อุตฺตรามุโข;

จตุนฺนวุติโต กปฺเป, คนฺธมาลํ ยโต อทํฯ

[28]

‘‘พุทฺเธ กตสฺส การสฺส, ผเลนาหํ วิเสสโต;

ทุคฺคติํ นาภิชานามิ, พุทฺธปูชายิทํ ผลํฯ

[29]

‘‘จตฺตารีสมฺหิ เอกูเน, กปฺเป อาสิํสุ โสฬส;

เทวคนฺธสนามา เต, ราชาโน จกฺกวตฺติโนฯ

[30]