เมนู

1. สุธาปิณฺฑิยตฺเถรอปทานํ

[1]

‘‘ปูชารเห ปูชยโต, พุทฺเธ ยทิ ว สาวเก;

ปปญฺจสมติกฺกนฺเต, ติณฺณโสกปริทฺทเวฯ

[2]

‘‘เต ตาทิเส ปูชยโต, นิพฺพุเต อกุโตภเย;

น สกฺกา ปุญฺญํ สงฺขาตุํ, อิเมตฺตมปิ [อิทมฺมตฺตนฺติ (สี.), อิเมตฺถมปิ (ก.)] เกนจิฯ

[3]

‘‘จตุนฺนมปิ ทีปานํ, อิสฺสรํ โยธ การเย;

เอกิสฺสา ปูชนาเยตํ, กลํ นาคฺฆติ โสฬสิํฯ

[4]

‘‘สิทฺธตฺถสฺส นรคฺคสฺส, เจติเย ผลิตนฺตเร;

สุธาปิณฺโฑ มยา ทินฺโน, วิปฺปสนฺเนน เจตสาฯ

[5]

‘‘จตุนฺนวุติโต กปฺเป, ยํ กมฺมมกริํ ตทา;

ทุคฺคติํ นาภิชานามิ, ปฏิสงฺขารสฺสิทํ ผลํฯ

[6]

‘‘อิโต ติํสติกปฺปมฺหิ, ปฏิสงฺขารสวฺหยา;

สตฺตรตนสมฺปนฺนา, เตรส จกฺกวตฺติโนฯ

[7]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา สุธาปิณฺฑิโย เถโร อิมา คาถาโย อภาสิตฺถาติฯ

สุธาปิณฺฑิยตฺเถรสฺสาปทานํ ปฐมํฯ

2. สุจินฺติกตฺเถรอปทานํ

[8]

‘‘ติสฺสสฺส โลกนาถสฺส, สุทฺธปีฐมทาสหํ;

หฏฺโฐ หฏฺเฐน จิตฺเตน, พุทฺธสฺสาทิจฺจพนฺธุโนฯ

[9]

‘‘อฏฺฐารเส [อฏฺฐติํเส (สี. สฺยา.)] อิโต กปฺเป, ราชา อาสิํ มหารุจิ;

โภโค จ วิปุโล อาสิ, สยนญฺจ อนปฺปกํฯ

[10]

‘‘ปีฐํ พุทฺธสฺส ทตฺวาน, วิปฺปสนฺเนน เจตสา;

อนุโภมิ สกํ กมฺมํ, ปุพฺเพ สุกตมตฺตโนฯ

[11]

‘‘ทฺเวนวุเต อิโต กปฺเป, ยํ ปีฐมททิํ ตทา;

ทุคฺคติํ นาภิชานามิ, ปีฐทานสฺสิทํ ผลํฯ

[12]

‘‘อฏฺฐติํเส อิโต กปฺเป, ตโย เต จกฺกวตฺติโน;

รุจิ อุปรุจิ เจว, มหารุจิ ตติยโกฯ

[13]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สุจินฺติโก เถโร อิมา คาถาโย อภาสิตฺถาติฯ

สุจินฺติกตฺเถรสฺสาปทานํ ทุติยํฯ

3. อฑฺฒเจฬกตฺเถรอปทานํ

[14]

‘‘ติสฺสสฺสาหํ ภควโต, อุปฑฺฒทุสฺสมทาสหํ;

ปรมกาปญฺญปตฺโตมฺหิ [ปรมการุญฺญปตฺโตมฺหิ (สฺยา. ก.)], ทุคฺคเตน [ทุคฺคนฺเธน (สี.)] สมปฺปิโตฯ

[15]

‘‘อุปฑฺฒทุสฺสํ ทตฺวาน, กปฺปํ สคฺคมฺหิ โมทหํ;

อวเสเสสุ กปฺเปสุ, กุสลํ การิตํ มยาฯ

[16]

‘‘ทฺเวนวุเต อิโต กปฺเป, ยํ ทุสฺสมททิํ ตทา;

ทุคฺคติํ นาภิชานามิ, ทุสฺสทานสฺสิทํ ผลํฯ

[17]

‘‘เอกูนปญฺญาสกปฺปมฺหิ [เอกปญฺญาสกปฺปมฺหิ (สฺยา.)], ราชาโน จกฺกวตฺติโน;

สมนฺตจฺฉทนา นาม, พาตฺติํสาสุํ [ขตฺติยาสุํ (สฺยา. ก.)] ชนาธิปาฯ

[18]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อฑฺฒเจฬโก เถโร อิมา คาถาโย อภาสิตฺถาติฯ

อฑฺฒเจฬกตฺเถรสฺสาปทานํ ตติยํฯ