5. รํสิสญฺญกตฺเถรอปทานํ

[30]

‘‘ปพฺพเต หิมวนฺตมฺหิ, วาสํ กปฺเปสหํ ปุเร;

อชินุตฺตรวาโสหํ, วสามิ ปพฺพตนฺตเรฯ

[31]

‘‘สุวณฺณวณฺณํ สมฺพุทฺธํ, สตรํสิํว ภาณุมํ;

วนนฺตรคตํ ทิสฺวา, สาลราชํว ปุปฺผิตํฯ

[32]

‘‘รํสฺยา [รํเส (สฺยา. ก.)] จิตฺตํ ปสาเทตฺวา, วิปสฺสิสฺส มเหสิโน;

ปคฺคยฺห อญฺชลิํ วนฺทิํ, สิรสา อุกฺกุฏี [สิรสา อุกฺกุฏิโก (สฺยา.), สิรสุกฺกุฏิโก (ก.)] อหํฯ

[33]

‘‘เอกนวุติโต กปฺเป, ยํ กมฺมมกริํ ตทา;

ทุคฺคติํ นาภิชานามิ, รํสิสญฺญายิทํ ผลํฯ

[34]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา รํสิสญฺญโก เถโร อิมา คาถาโย อภาสิตฺถาติฯ

รํสิสญฺญกตฺเถรสฺสาปทานํ ปญฺจมํฯ

6. ทุติยรํสิสญฺญกตฺเถรอปทานํ

[35]

‘‘ปพฺพเต หิมวนฺตมฺหิ, วากจีรธโร อหํ;

จงฺกมญฺจ สมารูฬฺโห, นิสีทิํ ปาจินามุโขฯ

[36]

‘‘ปพฺพเต สุคตํ ทิสฺวา, ผุสฺสํ ฌานรตํ ตทา;

อญฺชลิํ ปคฺคเหตฺวาน, รํสฺยา จิตฺตํ ปสาทยิํฯ

[37]

‘‘ทฺเวนวุเต อิโต กปฺเป, ยํ สญฺญมลภิํ ตทา;

ทุคฺคติํ นาภิชานามิ, รํสิสญฺญายิทํ ผลํฯ

[38]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา รํสิสญฺญโก เถโร อิมา คาถาโย อภาสิตฺถาติฯ

ทุติยรํสิสญฺญกตฺเถรสฺสาปทานํ ฉฏฺฐํฯ

7. ผลทายกตฺเถรอปทานํ

[39]

‘‘ปพฺพเต หิมวนฺตมฺหิ, ขราชินธโร อหํ;

ผุสฺสํ ชินวรํ ทิสฺวา, ผลหตฺโถ ผลํ อทํฯ

[40]

‘‘ยมหํ ผลมทาสิํ, วิปฺปสนฺเนน เจตสา;

ภเว นิพฺพตฺตมานมฺหิ, ผลํ นิพฺพตฺตเต มมฯ

[41]

‘‘ทฺเวนวุเต อิโต กปฺเป, ยํ ผลํ อททิํ อหํ;

ทุคฺคติํ นาภิชานามิ, ผลทานสฺสิทํ ผลํฯ

[42]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ผลทายโก เถโร อิมา คาถาโย อภาสิตฺถาติฯ

ผลทายกตฺเถรสฺสาปทานํ สตฺตมํฯ

8. สทฺทสญฺญกตฺเถรอปทานํ

[43]

‘‘ปพฺพเต หิมวนฺตมฺหิ, วสามิ ปณฺณสนฺถเร;

ผุสฺสสฺส ธมฺมํ ภณโต, สทฺเท จิตฺตํ ปสาทยิํฯ

[44]

‘‘ทฺเวนวุเต อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, ปุญฺญกมฺมสฺสิทํ ผลํฯ

[45]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สทฺทสญฺญโก เถโร อิมา คาถาโย อภาสิตฺถาติฯ

สทฺทสญฺญกตฺเถรสฺสาปทานํ อฏฺฐมํฯ

9. โพธิสิญฺจกตฺเถรอปทานํ

[46]

‘‘วิปสฺสิสฺส ภควโต, มหาโพธิมโห อหุ;

ปพฺพชฺชุปคโต สนฺโต, อุปคจฺฉิํ อหํ ตทาฯ

[47]