‘‘อิโต ปญฺจมเก กปฺเป, ปญฺเจวาสุํ มหาสิขา;
สตฺตรตนสมฺปนฺนา, จกฺกวตฺตี มหพฺพลาฯ
[21]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา นิปนฺนญฺชลิโก เถโร อิมา คาถาโย อภาสิตฺถาติฯ
นิปนฺนญฺชลิกตฺเถรสฺสาปทานํ ตติยํฯ
4. อโธปุปฺผิยตฺเถรอปทานํ
[22]
‘‘อภิภู นาม โส ภิกฺขุ, สิขิโน อคฺคสาวโก;
มหานุภาโว เตวิชฺโช, หิมวนฺตํ อุปาคมิฯ
[23]
‘‘อหมฺปิ หิมวนฺตมฺหิ, รมณียสฺสเม อิสิ;
วสามิ อปฺปมญฺญาสุ, อิทฺธีสุ จ ตทา วสีฯ
[24]
‘‘ปกฺขิชาโต วิยากาเส, ปพฺพตํ อธิวตฺตยิํ [อภิปตฺถยิํ (สฺยา.), อภิมตฺถยิํ (ก.), อธิวตฺถยินฺติ ปพฺพตสฺส อุปริ คจฺฉินฺติอตฺโถ];
อโธปุปฺผํ คเหตฺวาน, อาคจฺฉิํ [อคจฺฉิํ (ก.)] ปพฺพตํ อหํฯ
[25]
‘‘สตฺต ปุปฺผานิ คณฺหิตฺวา, มตฺถเก โอกิริํ อหํ;
อาโลกิเต [อาโลกิโต (สฺยา.)] จ วีเรน, ปกฺกามิํ ปาจินามุโขฯ
[26]
‘‘อาวาสํ อภิสมฺโภสิํ, ปตฺวาน อสฺสมํ อหํ;
ขาริภารํ คเหตฺวาน, ปายาสิํ [ปาวิสิํ (สี.)] ปพฺพตนฺตรํฯ
[27]
‘‘อชคโร มํ ปีเฬสิ, โฆรรูโป มหพฺพโล;
ปุพฺพกมฺมํ สริตฺวาน, ตตฺถ กาลงฺกโต อหํฯ
[28]
‘‘เอกตฺติํเส อิโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, ปุปฺผปูชายิทํ ผลํฯ
[29]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อโธปุปฺผิโย เถโร อิมา คาถาโย อภาสิตฺถาติฯ
อโธปุปฺผิยตฺเถรสฺสาปทานํ จตุตฺถํฯ
5. รํสิสญฺญกตฺเถรอปทานํ
[30]
‘‘ปพฺพเต หิมวนฺตมฺหิ, วาสํ กปฺเปสหํ ปุเร;
อชินุตฺตรวาโสหํ, วสามิ ปพฺพตนฺตเรฯ
[31]
‘‘สุวณฺณวณฺณํ สมฺพุทฺธํ, สตรํสิํว ภาณุมํ;
วนนฺตรคตํ ทิสฺวา, สาลราชํว ปุปฺผิตํฯ
[32]
‘‘รํสฺยา [รํเส (สฺยา. ก.)] จิตฺตํ ปสาเทตฺวา, วิปสฺสิสฺส มเหสิโน;
ปคฺคยฺห อญฺชลิํ วนฺทิํ, สิรสา อุกฺกุฏี [สิรสา อุกฺกุฏิโก (สฺยา.), สิรสุกฺกุฏิโก (ก.)] อหํฯ
[33]
‘‘เอกนวุติโต กปฺเป, ยํ กมฺมมกริํ ตทา;
ทุคฺคติํ นาภิชานามิ, รํสิสญฺญายิทํ ผลํฯ
[34]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา รํสิสญฺญโก เถโร อิมา คาถาโย อภาสิตฺถาติฯ
รํสิสญฺญกตฺเถรสฺสาปทานํ ปญฺจมํฯ
6. ทุติยรํสิสญฺญกตฺเถรอปทานํ
[35]
‘‘ปพฺพเต หิมวนฺตมฺหิ, วากจีรธโร อหํ;
จงฺกมญฺจ สมารูฬฺโห, นิสีทิํ ปาจินามุโขฯ
[36]
‘‘ปพฺพเต สุคตํ ทิสฺวา, ผุสฺสํ ฌานรตํ ตทา;
อญฺชลิํ ปคฺคเหตฺวาน, รํสฺยา จิตฺตํ ปสาทยิํฯ
[37]
‘‘ทฺเวนวุเต อิโต กปฺเป, ยํ สญฺญมลภิํ ตทา;
ทุคฺคติํ นาภิชานามิ, รํสิสญฺญายิทํ ผลํฯ
[38]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา รํสิสญฺญโก เถโร อิมา คาถาโย อภาสิตฺถาติฯ
ทุติยรํสิสญฺญกตฺเถรสฺสาปทานํ ฉฏฺฐํฯ