2. คตสญฺญกตฺเถรอปทานํ

[10]

‘‘ชาติยา สตฺตวสฺโสหํ, ปพฺพชิํ อนคาริยํ;

อวนฺทิํ สตฺถุโน ปาเท, วิปฺปสนฺเนน เจตสาฯ

[11]

‘‘สตฺตนงฺคลกีปุปฺเผ, อากาเส อุกฺขิปิํ อหํ;

ติสฺสํ พุทฺธํ สมุทฺทิสฺส, อนนฺตคุณสาครํฯ

[12]

‘‘สุคตานุคตํ มคฺคํ, ปูเชตฺวา หฏฺฐมานโส;

อญฺชลิญฺจ [อญฺชลิสฺส (ก.)] ตทากาสิํ, ปสนฺโน เสหิ ปาณิภิฯ

[13]

‘‘ทฺเวนวุเต อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, พุทฺธปูชายิทํ ผลํฯ

[14]

‘‘อิโต อฏฺฐมเก กปฺเป, ตโย อคฺคิสิขา อหุ;

สตฺตรตนสมฺปนฺนา, จกฺกวตฺตี มหพฺพลาฯ

[15]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา คตสญฺญโก เถโร อิมา คาถาโย อภาสิตฺถาติฯ

คตสญฺญกตฺเถรสฺสาปทานํ ทุติยํฯ

3. นิปนฺนญฺชลิกตฺเถรอปทานํ

[16]

‘‘รุกฺขมูเล นิสินฺโนหํ, พฺยาธิโต ปรเมน จ;

ปรมการุญฺญปตฺโตมฺหิ, อรญฺเญ กานเน อหํฯ

[17]

‘‘อนุกมฺปํ อุปาทาย, ติสฺโส สตฺถา อุเปสิ มํ;

โสหํ นิปนฺนโก สนฺโต, สิเร กตฺวาน อญฺชลิํฯ

[18]

‘‘ปสนฺนจิตฺโต สุมโน, สพฺพสตฺตานมุตฺตมํ;

สมฺพุทฺธํ อภิวาเทตฺวา, ตตฺถ กาลงฺกโต อหํฯ

[19]

‘‘ทฺเวนวุเต อิโต กปฺเป, ยํ วนฺทิํ ปุริสุตฺตมํ;

ทุคฺคติํ นาภิชานามิ, วนฺทนาย อิทํ ผลํฯ

[20]

‘‘อิโต ปญฺจมเก กปฺเป, ปญฺเจวาสุํ มหาสิขา;

สตฺตรตนสมฺปนฺนา, จกฺกวตฺตี มหพฺพลาฯ

[21]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา นิปนฺนญฺชลิโก เถโร อิมา คาถาโย อภาสิตฺถาติฯ

นิปนฺนญฺชลิกตฺเถรสฺสาปทานํ ตติยํฯ

4. อโธปุปฺผิยตฺเถรอปทานํ

[22]

‘‘อภิภู นาม โส ภิกฺขุ, สิขิโน อคฺคสาวโก;

มหานุภาโว เตวิชฺโช, หิมวนฺตํ อุปาคมิฯ

[23]

‘‘อหมฺปิ หิมวนฺตมฺหิ, รมณียสฺสเม อิสิ;

วสามิ อปฺปมญฺญาสุ, อิทฺธีสุ จ ตทา วสีฯ

[24]

‘‘ปกฺขิชาโต วิยากาเส, ปพฺพตํ อธิวตฺตยิํ [อภิปตฺถยิํ (สฺยา.), อภิมตฺถยิํ (ก.), อธิวตฺถยินฺติ ปพฺพตสฺส อุปริ คจฺฉินฺติอตฺโถ];

อโธปุปฺผํ คเหตฺวาน, อาคจฺฉิํ [อคจฺฉิํ (ก.)] ปพฺพตํ อหํฯ

[25]

‘‘สตฺต ปุปฺผานิ คณฺหิตฺวา, มตฺถเก โอกิริํ อหํ;

อาโลกิเต [อาโลกิโต (สฺยา.)] จ วีเรน, ปกฺกามิํ ปาจินามุโขฯ

[26]

‘‘อาวาสํ อภิสมฺโภสิํ, ปตฺวาน อสฺสมํ อหํ;

ขาริภารํ คเหตฺวาน, ปายาสิํ [ปาวิสิํ (สี.)] ปพฺพตนฺตรํฯ

[27]

‘‘อชคโร มํ ปีเฬสิ, โฆรรูโป มหพฺพโล;

ปุพฺพกมฺมํ สริตฺวาน, ตตฺถ กาลงฺกโต อหํฯ

[28]

‘‘เอกตฺติํเส อิโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, ปุปฺผปูชายิทํ ผลํฯ

[29]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อโธปุปฺผิโย เถโร อิมา คาถาโย อภาสิตฺถาติฯ

อโธปุปฺผิยตฺเถรสฺสาปทานํ จตุตฺถํฯ