‘‘กิเลสา ฌาปิตา มยฺหํ, ภวา สพฺเพ สมูหตา;

สพฺพาสวา ปริกฺขีณา, นตฺถิ ทานิ ปุนพฺภโวฯ

[74]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ติปทุมิโย เถโร อิมา คาถาโย อภาสิตฺถาติฯ

ติปทุมิยตฺเถรสฺสาปทานํ ทสมํฯ

นาคสมาลวคฺโค อฏฺฐโมฯ

ตสฺสุทฺทานํ –

นาคสมาโล ปทสญฺญี, สญฺญกาลุวทายโก;

เอกสญฺญี ติณสนฺถาโร, สูจิปาฏลิปุปฺผิโย;

ฐิตญฺชลี ติปทุมี, คาถาโย ปญฺจสตฺตติฯ

9. ติมิรวคฺโค

1. ติมิรปุปฺผิยตฺเถรอปทานํ

[1]

‘‘จนฺทภาคานทีตีเร , อนุโสตํ วชามหํ;

นิสินฺนํ สมณํ ทิสฺวา, วิปฺปสนฺนมนาวิลํฯ

[2]

‘‘ตตฺถ จิตฺตํ ปสาเทตฺวา [ปสาเทสิํ (สฺยา.)], เอวํ จินฺเตสหํ ตทา;

ตารยิสฺสติ ติณฺโณยํ, ทนฺโตยํ ทมยิสฺสติฯ

[3]

‘‘อสฺสาสิสฺสติ อสฺสตฺโถ, สนฺโต จ สมยิสฺสติ;

โมจยิสฺสติ มุตฺโต จ, นิพฺพาเปสฺสติ นิพฺพุโตฯ

[4]

‘‘เอวาหํ จินฺตยิตฺวาน, สิทฺธตฺถสฺส มเหสิโน;

คเหตฺวา ติมิรปุปฺผํ, มตฺถเก โอกิริํ อหํ [ตทา (สฺยา.)]ฯ

[5]

‘‘อญฺชลิํ ปคฺคเหตฺวาน, กตฺวา จ นํ ปทกฺขิณํ;

วนฺทิตฺวา สตฺถุโน ปาเท, ปกฺกามิํ อปรํ ทิสํฯ

[6]

‘‘อจิรํ คตมตฺตํ มํ, มิคราชา วิเหฐยิ;

ปปาตมนุคจฺฉนฺโต, ตตฺเถว ปปติํ อหํฯ

[7]

‘‘จตุนฺนวุติโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, ปุปฺผปูชายิทํ [พุทฺธปูชายิทํ (สี. สฺยา.)] ผลํฯ

[8]

‘‘ฉปฺปญฺญาสมฺหิ กปฺปมฺหิ, สตฺเตวาสุํ มหายสา [มหารหา (สฺยา. ก.)];

สตฺตรตนสมฺปนฺนา, จกฺกวตฺตี มหพฺพลาฯ

[9]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา ติมิรปุปฺผิโย เถโร อิมา คาถาโย อภาสิตฺถาติฯ

ติมิรปุปฺผิยตฺเถรสฺสาปทานํ ปฐมํฯ