‘‘เสฏฺฐิปุตฺโต ตทา อาสิํ, สุขุมาโล สุเขธิโต;
อุจฺฉงฺเค ปาฏลิปุปฺผํ, กตฺวาน [กตฺวา ตํ (สี. สฺยา.)] อภิสํหริํฯ
[38]
‘‘หฏฺโฐ หฏฺเฐน จิตฺเตน, ปุปฺเผหิ อภิปูชยิํ;
ติสฺสํ โลกวิทุํ นาถํ, นรเทวํ นมสฺสหํฯ
[39]
‘‘ทฺเวนวุเต อิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, ปุปฺผปูชายิทํ ผลํฯ
[40]
‘‘อิโต เตสฏฺฐิกปฺปมฺหิ, อภิสมฺมตนามโก;
สตฺตรตนสมฺปนฺโน, จกฺกวตฺตี มหพฺพโลฯ
[41]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปาฏลิปุปฺผิโย เถโร อิมา คาถาโย อภาสิตฺถาติฯ
ปาฏลิปุปฺผิยตฺเถรสฺสาปทานํ อฏฺฐมํฯ
9. ฐิตญฺชลิยตฺเถรอปทานํ
[42]
‘‘มิคลุทฺโท ปุเร อาสิํ, อรญฺเญ กานเน อหํ;
ตตฺถ อทฺทสํ [ตตฺถทฺทสาสิํ (สี. สฺยา.)] สมฺพุทฺธํ, พาตฺติํสวรลกฺขณํฯ
[43]
‘‘ตตฺถาหํ อญฺชลิํ กตฺวา, ปกฺกามิํ ปาจินามุโข;
อวิทูเร นิสินฺนสฺส, นิยเก ปณฺณสนฺถเรฯ
[44]
‘‘ตโต เม อสนีปาโต, มตฺถเก นิปตี ตทา;
โสหํ มรณกาลมฺหิ, อกาสิํ ปุนรญฺชลิํฯ
[45]
‘‘ทฺเวนวุเต อิโต กปฺเป, อญฺชลิํ อกริํ ตทา;
ทุคฺคติํ นาภิชานามิ, อญฺชลิสฺส อิทํ ผลํฯ
[46]
‘‘จตุปณฺณาสกปฺปมฺหิ, มิคเกตุสนามโก;
สตฺตรตนสมฺปนฺโน, จกฺกวตฺตี มหพฺพโลฯ
[47]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ฐิตญฺชลิโย เถโร อิมา คาถาโย อภาสิตฺถาติฯ
ฐิตญฺชลิยตฺเถรสฺสาปทานํ นวมํฯ
10. ติปทุมิยตฺเถรอปทานํ
[48]
‘‘ปทุมุตฺตโร นาม ชิโน, สพฺพธมฺมาน ปารคู;
ทนฺโต ทนฺตปริวุโต, นครา นิกฺขมี ตทาฯ
[49]
‘‘นคเร หํสวติยํ, อโหสิํ มาลิโก ตทา;
ยํ ตตฺถ อุตฺตมํ โตณิ, ปทฺมปุปฺผานิ [อุตฺตมํ ปุปฺผํ, ตีณิ ปุปฺผานิ (สี.)] อคฺคหิํฯ
[50]
‘‘อทฺทสํ วิรชํ พุทฺธํ, ปฏิมคฺคนฺตราปเณ;
สห [โสหํ (สี.)] ทิสฺวาน สมฺพุทฺธํ, เอวํ จินฺเตสหํ ตทาฯ
[51]
‘‘กิํ เม อิเมหิ ปุปฺเผหิ, รญฺโญ อุปนิเตหิ เม;
คามํ วา คามเขตฺตํ วา, สหสฺสํ วา ลเภยฺยหํฯ
[52]
‘‘อทนฺตทมนํ วีรํ, สพฺพสตฺตสุขาวหํ;
โลกนาถํ ปูชยิตฺวา, ลจฺฉามิ อมตํ ธนํฯ
[53]
‘‘เอวาหํ จินฺตยิตฺวาน, สกํ จิตฺตํ ปสาทยิํ;
ตีณิ โลหิตเก คยฺห, อากาเส อุกฺขิปิํ ตทาฯ
[54]
‘‘มยา อุกฺขิตฺตมตฺตมฺหิ, อากาเส ปตฺถริํสุ เต;
ธาริํสุ มตฺถเก ตตฺถ, อุทฺธํวณฺฏา อโธมุขาฯ
[55]
‘‘เย เกจิ มนุชา ทิสฺวา, อุกฺกุฏฺฐิํ สมฺปวตฺตยุํ;
เทวตา อนฺตลิกฺขมฺหิ, สาธุการํ ปวตฺตยุํฯ
[56]
‘‘อจฺเฉรํ โลเก อุปฺปนฺนํ, พุทฺธเสฏฺฐสฺส วาหสา;
สพฺเพ ธมฺมํ สุณิสฺสาม, ปุปฺผานํ วาหสา มยํฯ
[57]
‘‘ปทุมุตฺตโร โลกวิทู, อาหุตีนํ ปฏิคฺคโห;
วีถิยญฺหิ ฐิโต สนฺโต, อิมา คาถา อภาสถฯ
[58]
‘‘‘โย โส พุทฺธํ อปูเชสิ, รตฺตปทฺเมหิ [รตฺตปทุเมหิ (สี. สฺยา.)] มาณโว;
ตมหํ กิตฺตยิสฺสามิ, สุณาถ มม ภาสโตฯ
[59]
‘‘‘ติํสกปฺปสหสฺสานิ, เทวโลเก รมิสฺสติ;
ติํสกปฺปานิ [ติํสกฺขตฺตุญฺจ (สฺยา.)] เทวินฺโท, เทวรชฺชํ กริสฺสติฯ
[60]