เมนู

‘‘‘อเนกสตกฺขตฺตุญฺจ , ราชา รฏฺเฐ ภวิสฺสติ;

อุคฺคโต นาม นาเมน, จกฺกวตฺตี ภวิสฺสติฯ

[63]

‘‘‘สมฺปตฺติํ อนุโภตฺวาน, สุกฺกมูเลน โจทิโต;

โคตมสฺส ภควโต, สาสเนภิรมิสฺสติ’ฯ

[64]

‘‘ปธานปหิตตฺโตมฺหิ, อุปสนฺโต นิรูปธิ;

ธาเรมิ อนฺติมํ เทหํ, สมฺมาสมฺพุทฺธสาสเนฯ

[65]

‘‘เอกปญฺญาสสหสฺเส, กปฺเป อุคฺคตสวฺหโย [สวฺหยา (สฺยา.)];

ปญฺญาสสตสหสฺเส, ขตฺติโย เมฆสวฺหโย [ขตฺติยา เขมสวฺหยา (สฺยา.)]

[66]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ธชทายโก เถโร อิมา คาถาโย อภาสิตฺถาติฯ

ธชทายกตฺเถรสฺสาปทานํ อฏฺฐมํฯ

9. ปทุมตฺเถรอปทานํ

[67]

‘‘จตุสจฺจํ ปกาเสนฺโต, วรธมฺมปฺปวตฺตโก;

วสฺสเต [วสฺเสติ (?)] อมตํ วุฏฺฐิํ, นิพฺพาเปนฺโต มหาชนํฯ

[68]

‘‘สธชํ [สทณฺฑํ (สี.)] ปทุมํ คยฺห, อฑฺฒโกเส ฐิโต อหํ;

ปทุมุตฺตรมุนิสฺส, ปหฏฺโฐ อุกฺขิปิมมฺพเรฯ

[69]

‘‘อาคจฺฉนฺเต จ ปทุเม, อพฺภุโต อาสิ ตาวเท;

มม สงฺกปฺปมญฺญาย, ปคฺคณฺหิ วทตํ วโรฯ

[70]

‘‘กรเสฏฺเฐน ปคฺคยฺห, ชลชํ ปุปฺผมุตฺตมํ;

ภิกฺขุสงฺเฆ ฐิโต สตฺถา, อิมา คาถา อภาสถฯ

[71]

‘‘‘เยนิทํ ปทุมํ ขิตฺตํ, สพฺพญฺญุมฺหิ วินายเก [สพฺพญฺญุตมนายเก (สฺยา. ก.)];

ตมหํ กิตฺตยิสฺสามิ, สุณาถ มม ภาสโตฯ

[72]

‘‘‘ติํสกปฺปานิ เทวินฺโท, เทวรชฺชํ กริสฺสติ;

ปถพฺยา รชฺชํ สตฺตสตํ, วสุธํ อาวสิสฺสติฯ

[73]

‘‘‘ตตฺถ ปตฺตํ คเณตฺวาน, จกฺกวตฺตี ภวิสฺสติ;

อากาสโต ปุปฺผวุฏฺฐิ, อภิวสฺสิสฺสตี ตทาฯ

[74]

‘‘‘กปฺปสตสหสฺสมฺหิ, โอกฺกากกุลสมฺภโว;

โคตโม นาม นาเมน, สตฺถา โลเก ภวิสฺสติฯ

[75]

‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;

สพฺพาสเว ปริญฺญาย, นิพฺพายิสฺสตินาสโว’ฯ

[76]

‘‘นิกฺขมิตฺวาน กุจฺฉิมฺหา, สมฺปชาโน ปติสฺสโต;

ชาติยา ปญฺจวสฺโสหํ, อรหตฺตํ อปาปุณิํฯ

[77]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปทุโม เถโร อิมา คาถาโย อภาสิตฺถาติฯ

ปทุมตฺเถรสฺสาปทานํ นวมํฯ

10. อสนโพธิยตฺเถรอปทานํ

[78]

‘‘ชาติยา สตฺตวสฺโสหํ, อทฺทสํ โลกนายกํ;

ปสนฺนจิตฺโต สุมโน, อุปคจฺฉิํ นรุตฺตมํฯ

[79]

‘‘ติสฺสสฺสาหํ ภควโต, โลกเชฏฺฐสฺส ตาทิโน;

หฏฺโฐ หฏฺเฐน จิตฺเตน, โรปยิํ โพธิมุตฺตมํฯ

[80]

‘‘อสโน นามเธยฺเยน, ธรณีรุหปาทโป;

ปญฺจวสฺเส ปริจริํ, อสนํ โพธิมุตฺตมํฯ

[81]

‘‘ปุปฺผิตํ ปาทปํ ทิสฺวา, อพฺภุตํ โลมหํสนํ;

สกํ กมฺมํ ปกิตฺเตนฺโต, พุทฺธเสฏฺฐํ อุปาคมิํฯ

[82]

‘‘ติสฺโส ตทา โส สมฺพุทฺโธ, สยมฺภู อคฺคปุคฺคโล;

ภิกฺขุสงฺเฆ นิสีทิตฺวา, อิมา คาถา อภาสถฯ

[83]