‘‘ปทีปทานํ ปาทาสิํ, ปริวาเรตฺวาน โพธิยํ;
สทฺทหนฺโต ปทีปานิ, อกริํ ตาวเท อหํฯ
[52]
‘‘ยํ ยํ โยนุปปชฺชามิ, เทวตฺตํ อถ มานุสํ;
อากาเส อุกฺกํ ธาเรนฺติ, ทีปทานสฺสิทํ ผลํฯ
[53]
‘‘ติโรกุฏฺฏํ ติโรเสลํ, สมติคฺคยฺห ปพฺพตํ;
สมนฺตา โยชนสตํ, ทสฺสนํ อนุโภมหํฯ
[54]
‘‘เตน กมฺมาวเสเสน, ปตฺโตมฺหิ อาสวกฺขยํ;
ธาเรมิ อนฺติมํ เทหํ, ทฺวิปทินฺทสฺส สาสเนฯ
[55]
‘‘จตุตฺติํเส กปฺปสเต, สตจกฺขุสนามกา;
ราชาเหสุํ มหาเตชา, จกฺกวตฺตี มหพฺพลาฯ
[56]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปญฺจทีปโก เถโร อิมา คาถาโย อภาสิตฺถาติฯ
ปญฺจทีปกตฺเถรสฺสาปทานํ สตฺตมํฯ
8. ธชทายกตฺเถรอปทานํ
[57]
‘‘ปทุมุตฺตรพุทฺธสฺส, โพธิยา ปาทปุตฺตเม;
หฏฺโฐ หฏฺเฐน จิตฺเตน, ธชมาโรปยิํ อหํฯ
[58]
‘‘ปติตปตฺตานิ คณฺหิตฺวา, พหิทฺธา ฉฑฺฑยิํ อหํ;
อนฺโตสุทฺธํ พหิสุทฺธํ, อธิมุตฺตมนาสวํฯ
[59]
‘‘สมฺมุขา วิย สมฺพุทฺธํ, อวนฺทิํ โพธิมุตฺตมํ;
ปทุมุตฺตโร โลกวิทู, อาหุตีนํ ปฏิคฺคโหฯ
[60]
‘‘ภิกฺขุสงฺเฆ ฐิโต สตฺถา, อิมา คาถา อภาสถ;
‘‘‘อิมินา ธชทาเนน, อุปฏฺฐาเนน จูภยํฯ
[61]
‘‘‘กปฺปานํ สตสหสฺสํ, ทุคฺคติํ โส น คจฺฉติ;
เทเวสุ เทวโสภคฺยํ, อนุโภสฺสตินปฺปกํฯ
[62]
‘‘‘อเนกสตกฺขตฺตุญฺจ , ราชา รฏฺเฐ ภวิสฺสติ;
อุคฺคโต นาม นาเมน, จกฺกวตฺตี ภวิสฺสติฯ
[63]
‘‘‘สมฺปตฺติํ อนุโภตฺวาน, สุกฺกมูเลน โจทิโต;
โคตมสฺส ภควโต, สาสเนภิรมิสฺสติ’ฯ
[64]
‘‘ปธานปหิตตฺโตมฺหิ, อุปสนฺโต นิรูปธิ;
ธาเรมิ อนฺติมํ เทหํ, สมฺมาสมฺพุทฺธสาสเนฯ
[65]
‘‘เอกปญฺญาสสหสฺเส, กปฺเป อุคฺคตสวฺหโย [สวฺหยา (สฺยา.)];
ปญฺญาสสตสหสฺเส, ขตฺติโย เมฆสวฺหโย [ขตฺติยา เขมสวฺหยา (สฺยา.)]ฯ
[66]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ธชทายโก เถโร อิมา คาถาโย อภาสิตฺถาติฯ
ธชทายกตฺเถรสฺสาปทานํ อฏฺฐมํฯ
9. ปทุมตฺเถรอปทานํ
[67]
‘‘จตุสจฺจํ ปกาเสนฺโต, วรธมฺมปฺปวตฺตโก;
วสฺสเต [วสฺเสติ (?)] อมตํ วุฏฺฐิํ, นิพฺพาเปนฺโต มหาชนํฯ
[68]
‘‘สธชํ [สทณฺฑํ (สี.)] ปทุมํ คยฺห, อฑฺฒโกเส ฐิโต อหํ;
ปทุมุตฺตรมุนิสฺส, ปหฏฺโฐ อุกฺขิปิมมฺพเรฯ
[69]
‘‘อาคจฺฉนฺเต จ ปทุเม, อพฺภุโต อาสิ ตาวเท;
มม สงฺกปฺปมญฺญาย, ปคฺคณฺหิ วทตํ วโรฯ
[70]
‘‘กรเสฏฺเฐน ปคฺคยฺห, ชลชํ ปุปฺผมุตฺตมํ;
ภิกฺขุสงฺเฆ ฐิโต สตฺถา, อิมา คาถา อภาสถฯ
[71]
‘‘‘เยนิทํ ปทุมํ ขิตฺตํ, สพฺพญฺญุมฺหิ วินายเก [สพฺพญฺญุตมนายเก (สฺยา. ก.)];
ตมหํ กิตฺตยิสฺสามิ, สุณาถ มม ภาสโตฯ
[72]
