เมนู

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา คนฺโธทกิโย เถโร อิมา คาถาโย อภาสิตฺถาติฯ

คนฺโธทกิยตฺเถรสฺสาปทานํ จตุตฺถํฯ

5. โอปวยฺหตฺเถรอปทานํ

[33]

‘‘ปทุมุตฺตรพุทฺธสฺส , อาชานียมทาสหํ;

นิยฺยาเทตฺวาน สมฺพุทฺเธ [สมฺพุทฺธํ (สี. ก.)], อคมาสิํ สกํ ฆรํฯ

[34]

‘‘เทวโล นาม นาเมน, สตฺถุโน อคฺคสาวโก;

วรธมฺมสฺส ทายาโท, อาคจฺฉิ มม สนฺติกํฯ

[35]

‘‘สปตฺตภาโร ภควา, อาชาเนยฺโย น กปฺปติ;

ตว สงฺกปฺปมญฺญาย, อธิวาเสสิ จกฺขุมาฯ

[36]

‘‘อคฺฆาเปตฺวา วาตชวํ, สินฺธวํ สีฆวาหนํ;

ปทุมุตฺตรพุทฺธสฺส, ขมนียมทาสหํฯ

[37]

‘‘ยํ ยํ โยนุปปชฺชามิ, เทวตฺตํ อถ มานุสํ [เทเว จ มานุเส ภเว (สี. ก.)];

ขมนียํ วาตชวํ, จิตฺตํ นิพฺพตฺตเต [อาชานียา วาตชวา, วิตฺติ นิพฺพตฺตเร (สฺยา.), ขมนียา วาตชวา, จิตฺตา นิพฺพตฺตเร (สี.)] มมฯ

[38]

‘‘ลาภํ เตสํ สุลทฺธํว, เย ลภนฺตุปสมฺปทํ;

ปุนปิ ปยิรุปาเสยฺยํ, พุทฺโธ โลเก สเจ ภเวฯ

[39]

‘‘อฏฺฐวีสติกฺขตฺตุํหํ, ราชา อาสิํ มหพฺพโล;

จาตุรนฺโต วิชิตาวี, ชมฺพุสณฺฑสฺส [ชมฺพุทีปสฺส (สฺยา.), ชมฺพุมณฺฑสฺส (ก.)] ชมฺพุอิสฺสโรฯ

[40]

‘‘อิทํ ปจฺฉิมกํ มยฺหํ, จริโม วตฺตเต ภโว;

ปตฺโตสฺมิ อจลํ ฐานํ, หิตฺวา ชยปราชยํฯ

[41]

‘‘จตุติํสสหสฺสมฺหิ, มหาเตโชสิ ขตฺติโย;

สตรตนสมฺปนฺโน, จกฺกวตฺตี มหพฺพโลฯ

[42]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โอปวยฺโห เถโร อิมา คาถาโย อภาสิตฺถาติฯ

โอปวยฺหตฺเถรสฺสาปทานํ ปญฺจมํฯ

6. สปริวาราสนตฺเถรอปทานํ

[43]

‘‘ปทุมุตฺตรพุทฺธสฺส, ปิณฺฑปาตํ อทาสหํ;

คนฺตฺวา กิลิฏฺฐกํ ฐานํ [ตํ โภชนฏฺฐานํ (สี.)], มลฺลิกาหิ ปริกฺขิตํ [ปริกฺขิปิํ (สี.)]

[44]

‘‘ตมฺหาสนมฺหิ อาสีโน, พุทฺโธ โลกคฺคนายโก;

อกิตฺตยิ ปิณฺฑปาตํ, อุชุภูโต สมาหิโตฯ

[45]

‘‘ยถาปิ ภทฺทเก เขตฺเต, พีชํ อปฺปมฺปิ โรปิตํ;

สมฺมา ธารํ ปเวจฺฉนฺเต, ผลํ โตเสติ กสฺสกํฯ

[46]

‘‘ตเถวายํ ปิณฺฑปาโต, สุเขตฺเต โรปิโต ตยา;

ภเว นิพฺพตฺตมานมฺหิ, ผลํ เต [นิพฺพตฺตมานํ หิ, ผลโต (สี.)] โตสยิสฺสติ [ตปฺปยิสฺสติ (ก.)]

[47]

‘‘อิทํ วตฺวาน สมฺพุทฺโธ, ชลชุตฺตมนามโก;

ปิณฺฑปาตํ คเหตฺวาน, ปกฺกามิ อุตฺตรามุโขฯ

[48]

‘‘สํวุโต ปาติโมกฺขสฺมิํ, อินฺทฺริเยสุ จ ปญฺจสุ;

ปวิเวกมนุยุตฺโต, วิหรามิ อนาสโวฯ

[49]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สปริวาราสโน เถโร อิมา คาถาโย อภาสิตฺถาติฯ

สปริวาราสนตฺเถรสฺสาปทานํ ฉฏฺฐํฯ

7. ปญฺจทีปกตฺเถรอปทานํ

[50]

‘‘ปทุมุตฺตรพุทฺธสฺส, สพฺพภูตานุกมฺปิโน;

สทฺทหิตฺวาน [สุสณฺฐหิตฺวา (สี.)] สทฺธมฺเม, อุชุทิฏฺฐิ อโหสหํฯ

[51]