เมนู

‘‘อชฺเชว ทานิ ปพฺพชฺชา, อชฺเชว อุปสมฺปทา;

อชฺเชว ปรินิพฺพานํ, สมฺมุขา ทฺวิปทุตฺตเมฯ

[124]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สุภทฺโท เถโร อิมา คาถาโย อภาสิตฺถาติฯ

สุภทฺทตฺเถรสฺสาปทานํ นวมํฯ

10. จุนฺทตฺเถรอปทานํ

[125]

‘‘สิทฺธตฺถสฺส ภควโต, โลกเชฏฺฐสฺส ตาทิโน;

อคฺฆิยํ การยิตฺวาน, ชาติปุปฺเผหิ ฉาทยิํฯ

[126]

‘‘นิฏฺฐาเปตฺวาน ตํ ปุปฺผํ, พุทฺธสฺส อุปนามยิํ;

ปุปฺผาวเสสํ ปคฺคยฺห, พุทฺธสฺส อภิโรปยิํฯ

[127]

‘‘กญฺจนคฺฆิยสงฺกาสํ , พุทฺธํ โลกคฺคนายกํ;

ปสนฺนจิตฺโต สุมโน, ปุปฺผคฺฆิยมุปานยิํฯ

[128]

‘‘วิติณฺณกงฺโข สมฺพุทฺโธ, ติณฺโณเฆหิ ปุรกฺขโต;

ภิกฺขุสงฺเฆ นิสีทิตฺวา, อิมา คาถา อภาสถฯ

[129]

‘‘‘ทิพฺพคนฺธํ ปวายนฺตํ, โย เม ปุปฺผคฺฆิยํ อทา;

ตมหํ กิตฺตยิสฺสามิ, สุณาถ มม ภาสโตฯ

[130]

‘‘‘อิโต จุโต อยํ โปโส, เทวสงฺฆปุรกฺขโต;

ชาติปุปฺเผหิ ปริกิณฺโณ, เทวโลกํ คมิสฺสติฯ

[131]

‘‘‘อุพฺพิทฺธํ ภวนํ ตสฺส, โสวณฺณญฺจ มณีมยํ;

พฺยมฺหํ ปาตุภวิสฺสติ, ปุญฺญกมฺมปฺปภาวิตํฯ

[132]

‘‘‘จตุสตฺตติกฺขตฺตุํ โส, เทวรชฺชํ กริสฺสติ;

อนุโภสฺสติ สมฺปตฺติํ, อจฺฉราหิ ปุรกฺขโตฯ

[133]

‘‘‘ปถพฺยา รชฺชํ ติสตํ, วสุธํ อาวสิสฺสติ;

ปญฺจสตฺตติกฺขตฺตุญฺจ, จกฺกวตฺตี ภวิสฺสติฯ

[134]

‘‘‘ทุชฺชโย นาม นาเมน, เหสฺสติ มนุชาธิโป;

อนุโภตฺวาน ตํ ปุญฺญํ, สกกมฺมํ อปสฺสิโต [สกกมฺมูปสํหิโต (สฺยา.)]

[135]

‘‘‘วินิปาตํ อคนฺตฺวาน, มนุสฺสตฺตํ คมิสฺสติ;

หิรญฺญํ ตสฺส [หิรญฺญสฺส จ (สี. ก.)] นิจิตํ, โกฏิสตมนปฺปกํฯ

[136]

‘‘‘นิพฺพตฺติสฺสติ โยนิมฺหิ, พฺราหฺมเณ โส ภวิสฺสติ;

วงฺคนฺตสฺส สุโต ธีมา, สาริยา โอรโส ปิโยฯ

[137]

‘‘‘โส จ ปจฺฉา ปพฺพชิตฺวา, องฺคีรสสฺส สาสเน;

จูฬจุนฺโทติ [จูลจุนฺโทติ (สี.)] นาเมน, เหสฺสติ สตฺถุ สาวโกฯ

[138]

‘‘‘สามเณโรว โส สนฺโต, ขีณาสโว ภวิสฺสติ;

สพฺพาสเว ปริญฺญาย, นิพฺพายิสฺสตินาสโว’ฯ

[139]

‘‘อุปฏฺฐหิํ มหาวีรํ, อญฺเญ จ เปสเล พหู;

ภาตรํ เม จุปฏฺฐาสิํ, อุตฺตมตฺถสฺส ปตฺติยาฯ

[140]

‘‘ภาตรํ เม อุปฏฺฐิตฺวา, ธาตุํ ปตฺตมฺหิ โอหิย [โอปิย (สี.), โอจิย (สฺยา.)];

สมฺพุทฺธํ อุปนาเมสิํ, โลกเชฏฺฐํ นราสภํฯ

[141]

‘‘อุโภ หตฺเถหิ ปคฺคยฺห, พุทฺโธ โลเก สเทวเก;

สนฺทสฺสยนฺโต ตํ ธาตุํ, กิตฺตยิ อคฺคสาวกํฯ

[142]

‘‘จิตฺตญฺจ สุวิมุตฺตํ เม, สทฺธา มยฺหํ ปติฏฺฐิตา;

สพฺพาสเว ปริญฺญาย, วิหรามิ อนาสโวฯ

[143]

‘‘ปฏิสมฺภิทานุปฺปตฺตา, วิโมกฺขาปิ จ ผสฺสิตา [ปฏิสมฺภิทา จตสฺโส, วิโมกฺขาปิ จ อฏฺฐิเม (สฺยา.)];

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา จุนฺโท เถโร อิมา คาถาโย อภาสิตฺถาติฯ

จุนฺทตฺเถรสฺสาปทานํ ทสมํฯ

อุปาลิวคฺโค ปญฺจโมฯ

ตสฺสุทฺทานํ –

อุปาลิ โสโณ ภทฺทิโย, สนฺนิฏฺฐาปกหตฺถิโย;

ฉทนํ เสยฺยจงฺกมํ, สุภทฺโท จุนฺทสวฺหโย;

คาถาสตํ สตาลีสํ [จ ตาลีสํ (สี. สฺยา.)], จตสฺโส จ ตทุตฺตริฯ

6. พีชนิวคฺโค