‘‘ปฏิคฺคเหสิ ภควา, กปฺปิยํ สยนาสนํ;
อุฏฺฐาย สยนา [อาสนา (สี.)] ตมฺหา, เวหาสํ อุคฺคมี ชิโนฯ
[90]
‘‘จตุนฺนวุติโต กปฺเป, ยํ สยนมทาสหํ;
ทุคฺคติํ นาภิชานามิ, สยนสฺส อิทํ ผลํฯ
[91]
‘‘เอกปญฺญาสิโต กปฺเป, วรโก [วรุโณ (สี. สฺยา.)] เทวสวฺหโย;
สตฺตรตนสมฺปนฺโน, จกฺกวตฺตี มหพฺพโลฯ
[92]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สยนทายโก เถโร อิมา คาถาโย อภาสิตฺถาติฯ
สยนทายกตฺเถรสฺสาปทานํ สตฺตมํฯ
8. จงฺกมนทายกตฺเถรอปทานํ
[93]
‘‘อตฺถทสฺสิสฺส มุนิโน, โลกเชฏฺฐสฺส ตาทิโน;
อิฏฺฐกาหิ จินิตฺวาน, จงฺกมํ การยิํ อหํฯ
[94]
‘‘อุจฺจโต ปญฺจรตนํ, จงฺกมํ สาธุมาปิตํ;
อายามโต หตฺถสตํ, ภาวนียฺยํ มโนรมํฯ
[95]
‘‘ปฏิคฺคเหสิ ภควา, อตฺถทสฺสี นรุตฺตโม;
หตฺเถน ปุลินํ คยฺห, อิมา คาถา อภาสถฯ
[96]
‘‘‘อิมินา ปุลินทาเนน, จงฺกมํ สุกเตน จ;
สตฺตรตนสมฺปนฺนํ, ปุลินํ อนุโภสฺสติฯ
[97]
‘‘‘ตีณิ กปฺปานิ เทเวสุ, เทวรชฺชํ กริสฺสติ;
อนุโภสฺสติ สมฺปตฺติํ, อจฺฉราหิ ปุรกฺขโตฯ
[98]
‘‘‘มนุสฺสโลกมาคนฺตฺวา , ราชา รฏฺเฐ ภวิสฺสติ;
ติกฺขตฺตุํ จกฺกวตฺตี จ, มหิยา โส ภวิสฺสติ’ฯ
[99]
‘‘อฏฺฐารเส กปฺปสเต, ยํ กมฺมมกริํ ตทา;
ทุคฺคติํ นาภิชานามิ, จงฺกมสฺส อิทํ ผลํฯ
[100]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา จงฺกมนทายโก เถโร อิมา คาถาโย อภาสิตฺถาติฯ
จงฺกมนทายกตฺเถรสฺสาปทานํ อฏฺฐมํฯ
9. สุภทฺทตฺเถรอปทานํ
[101]
‘‘ปทุมุตฺตโร โลกวิทู, อาหุตีนํ ปฏิคฺคโห;
ชนตํ อุทฺธริตฺวาน, นิพฺพายติ มหายโสฯ
[102]
‘‘นิพฺพายนฺเต จ สมฺพุทฺเธ, ทสสหสฺสิ กมฺปถ;
ชนกาโย มหา อาสิ, เทวา สนฺนิปตุํ ตทาฯ
[103]
‘‘จนฺทนํ ปูรยิตฺวาน, ตครามลฺลิกาหิ จ;
หฏฺโฐ หฏฺเฐน จิตฺเตน, อาโรปยิํ [อาเลเปสิํ (สี.), อาโรเปสิํ (สฺยา.)] นรุตฺตมํฯ
[104]
‘‘มม สงฺกปฺปมญฺญาย, สตฺถา โลเก อนุตฺตโร;
นิปนฺนโกว สมฺพุทฺโธ, อิมา คาถา อภาสถฯ
[105]
‘‘‘โย เม ปจฺฉิมเก กาเล, คนฺธมาเลน [คนฺธมลฺเลน (สฺยา. ก.) นปุํสเกกตฺตํ มนสิกาตพฺพํ] ฉาทยิ;
ตมหํ กิตฺตยิสฺสามิ, สุณาถ มม ภาสโตฯ
[106]
‘‘‘อิโต จุโต อยํ โปโส, ตุสิตกายํ คมิสฺสติ;
ตตฺถ รชฺชํ กริตฺวาน, นิมฺมานํ โส คมิสฺสติฯ
[107]
‘‘‘เอเตเนว อุปาเยน, ทตฺวา มาลํ [มลฺยํ (สี.), มลฺลํ (สฺยา. ก.)] วรุตฺตมํ;
สกกมฺมาภิรทฺโธ โส, สมฺปตฺติํ อนุโภสฺสติฯ
[108]
‘‘‘ปุนาปิ ตุสิเต กาเย, นิพฺพตฺติสฺสติยํ นโร;
ตมฺหา กายา จวิตฺวาน, มนุสฺสตฺตํ คมิสฺสติฯ
[109]
‘‘‘สกฺยปุตฺโต มหานาโค, อคฺโค โลเก สเทวเก;
โพธยิตฺวา พหู สตฺเต, นิพฺพายิสฺสติ จกฺขุมาฯ
[110]