เมนู

4. สนฺนิฏฺฐาปกตฺเถรอปทานํ

[70]

‘‘อรญฺเญ กุฏิกํ กตฺวา, วสามิ ปพฺพตนฺตเร;

ลาภาลาเภน สนฺตุฏฺโฐ, ยเสน อยเสน จฯ

[71]

‘‘ปทุมุตฺตโร โลกวิทู, อาหุตีนํ ปฏิคฺคโห;

วสีสตสหสฺเสหิ [ภิกฺขุสตสหสฺเสหิ (สฺยา.)], อาคจฺฉิ มม สนฺติกํฯ

[72]

‘‘อุปาคตํ มหานาคํ [มหาวีรํ (สี.)], ชลชุตฺตมนามกํ;

ติณสนฺถรํ [ติณตฺถรํ (ก.)] ปญฺญาเปตฺวา, อทาสิํ สตฺถุโน อหํฯ

[73]

‘‘ปสนฺนจิตฺโต สุมโน, อามณฺฑํ ปานียญฺจหํ;

อทาสิํ อุชุภูตสฺส, วิปฺปสนฺเนน เจตสาฯ

[74]

‘‘สตสหสฺสิโต กปฺเป [สตสหสฺเส อิโต กปฺเป (สี.)], ยํ ทานมททิํ ตทา;

ทุคฺคติํ นาภิชานามิ, อามณฺฑสฺส อิทํ ผลํฯ

[75]

‘‘เอกตาลีสกปฺปมฺหิ, เอโก อาสิํ อรินฺทโม;

สตฺตรตนสมฺปนฺโน, จกฺกวตฺตี มหพฺพโลฯ

[76]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สนฺนิฏฺฐาปโก [สนฺนิธาปโก (สี.)] เถโร อิมา คาถาโย อภาสิตฺถาติฯ

สนฺนิฏฺฐาปกตฺเถรสฺสาปทานํ จตุตฺถํฯ

5. ปญฺจหตฺถิยตฺเถรอปทานํ

[77]

‘‘สุเมโธ นาม สมฺพุทฺโธ, คจฺฉเต อนฺตราปเณ;

โอกฺขิตฺตจกฺขุ [ขิตฺตจกฺขุ (ก. สี. ก.)] มิตภาณี, สติมา สํวุตินฺทฺริโยฯ

[78]

‘‘ปญฺจ อุปฺปลหตฺถานิ, อาเวฬตฺถํ อหํสุ เม;

เตน พุทฺธํ อปูเชสิํ, ปสนฺโน เสหิ ปาณิภิฯ

[79]

‘‘อาโรปิตา จ เต ปุปฺผา, ฉทนํ อสฺสุ สตฺถุโน;

สมาธิํสุ [สํสาวิํสุ (สี.)] มหานาคํ, สิสฺสา อาจริยํ ยถาฯ

[80]

‘‘ติํสกปฺปสหสฺสมฺหิ , ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[81]

‘‘อิโต วีสกปฺปสเต, อเหสุํ ปญฺจ ขตฺติยา;

หตฺถิยา นาม นาเมน, จกฺกวตฺตี มหพฺพลาฯ

[82]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปญฺจหตฺถิโย เถโร อิมา คาถาโย อภาสิตฺถาติฯ

ปญฺจหตฺถิยตฺเถรสฺสาปทานํ ปญฺจมํฯ

6. ปทุมจฺฉทนิยตฺเถรอปทานํ

[83]

‘‘นิพฺพุเต โลกนาถมฺหิ, วิปสฺสิมฺหคฺคปุคฺคเล;

สุผุลฺลปทุมํ คยฺห, จิตมาโรปยิํ อหํฯ

[84]

‘‘อาโรปิเต จ จิตเก, เวหาสํ นภมุคฺคมิ;

อากาเส ฉทนํ [อากาสจฺฉทนํ (สี.)] กตฺวา, จิตกมฺหิ อธารยิฯ

[85]

‘‘เอกนวุติโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[86]

‘‘สตฺตตาลีสิโต กปฺเป, ปทุมิสฺสรนามโก;

จาตุรนฺโต วิชิตาวี, จกฺกวตฺตี มหพฺพโลฯ

[87]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปทุมจฺฉทนิโย เถโร อิมา คาถาโย อภาสิตฺถาติ;

ปทุมจฺฉทนิยตฺเถรสฺสาปทานํ ฉฏฺฐํฯ

7. สยนทายกตฺเถรอปทานํ

[88]

‘‘สิทฺธตฺถสฺส ภควโต, เมตฺตจิตฺตสฺส ตาทิโน;

สยนคฺคํ มยา ทินฺนํ, ทุสฺสภณฺเฑหิ [ทุสฺสภณฺเฑน (สฺยา.)] อตฺถตํฯ

[89]