1. สุเมธาเถรีคาถา
[450]
มนฺตาวติยา นคเร, รญฺโญ โกญฺจสฺส อคฺคมเหสิยา;
ธีตา อาสิํ สุเมธา, ปสาทิตา สาสนกเรหิฯ
[451]
สีลวตี จิตฺตกถา, พหุสฺสุตา พุทฺธสาสเน วินีตา;
มาตาปิตโร อุปคมฺม, ภณติ ‘‘อุภโย นิสาเมถฯ
[452]
‘‘นิพฺพานาภิรตาหํ, อสสฺสตํ ภวคตํ ยทิปิ ทิพฺพํ;
กิมงฺคํ ปน [กิมงฺค ปน (สี. สฺยา.), กิํ ปน (?)] ตุจฺฉา กามา, อปฺปสฺสาทา พหุวิฆาตาฯ
[453]
‘‘กามา กฏุกา อาสีวิสูปมา, เยสุ มุจฺฉิตา พาลา;
เต ทีฆรตฺตํ นิรเย, สมปฺปิตา หญฺญนฺเต ทุกฺขิตา [หญฺญเร ทุขิตา (?)]ฯ
[454]
‘‘โสจนฺติ ปาปกมฺมา, วินิปาเต ปาปวทฺธิโน สทา;
กาเยน จ วาจาย จ, มนสา จ อสํวุตา พาลาฯ
[455]
‘‘พาลา เต ทุปฺปญฺญา, อเจตนา ทุกฺขสมุทโยรุทฺธา;
เทสนฺเต อชานนฺตา, น พุชฺฌเร อริยสจฺจานิฯ
[456]
‘‘สจฺจานิ อมฺม พุทฺธวรเทสิตานิ, เต พหุตรา อชานนฺตา เย;
อภินนฺทนฺติ ภวคตํ, ปิเหนฺติ เทเวสุ อุปปตฺติํฯ
[457]
‘‘เทเวสุปิ อุปปตฺติ, อสสฺสตา ภวคเต อนิจฺจมฺหิ;
น จ สนฺตสนฺติ พาลา, ปุนปฺปุนํ ชายิตพฺพสฺสฯ
[458]
‘‘จตฺตาโร วินิปาตา, ทุเว [ทฺเว (สพฺพตฺถ)] จ คติโย กถญฺจิ ลพฺภนฺติ;
น จ วินิปาตคตานํ, ปพฺพชฺชา อตฺถิ นิรเยสุฯ
[459]
‘‘อนุชานาถ มํ อุภโย, ปพฺพชิตุํ ทสพลสฺส ปาวจเน;
อปฺโปสฺสุกฺกา ฆฏิสฺสํ, ชาติมรณปฺปหานายฯ
[460]
‘‘กิํ ภวคเต [ภวคเตน (สฺยา.)] อภินนฺทิเตน, กายกลินา อสาเรน;
ภวตณฺหาย นิโรธา, อนุชานาถ ปพฺพชิสฺสามิฯ
[461]
‘‘พุทฺธานํ อุปฺปาโท วิวชฺชิโต, อกฺขโณ ขโณ ลทฺโธ;
สีลานิ พฺรหฺมจริยํ, ยาวชีวํ น ทูเสยฺยํ’’ฯ
[462]
เอวํ ภณติ สุเมธา, มาตาปิตโร ‘‘น ตาว อาหารํ;
อาหริสฺสํ [อาหริยามิ (สี.), อาหาริสํ (?)] คหฏฺฐา, มรณวสํ คตาว เหสฺสามิ’’ฯ
[463]
มาตา ทุกฺขิตา โรทติ ปิตา จ, อสฺสา สพฺพโส สมภิหโต;
ฆเฏนฺติ สญฺญาเปตุํ, ปาสาทตเล ฉมาปติตํฯ
[464]
‘‘อุฏฺเฐหิ ปุตฺตก กิํ โสจิเตน, ทินฺนาสิ วารณวติมฺหิ;
ราชา อนีกรตฺโต [อณีกทตฺโต (สี. สฺยา.)], อภิรูโป ตสฺส ตฺวํ ทินฺนาฯ
[465]
‘‘อคฺคมเหสี ภวิสฺสสิ, อนิกรตฺตสฺส ราชิโน ภริยา;
สีลานิ พฺรหฺมจริยํ, ปพฺพชฺชา ทุกฺกรา ปุตฺตกฯ
[466]
‘‘รชฺเช อาณาธนมิสฺสริยํ, โภคา สุขา ทหริกาสิ;
ภุญฺชาหิ กามโภเค, วาเรยฺยํ โหตุ เต ปุตฺต’’ฯ
[467]
อถ เน ภณติ สุเมธา, ‘‘มา เอทิสิกานิ ภวคตมสารํ;
ปพฺพชฺชา วา โหหิติ, มรณํ วา เม น เจว วาเรยฺยํฯ
[468]
‘‘กิมิว ปูติกายมสุจิํ, สวนคนฺธํ ภยานกํ กุณปํ;
อภิสํวิเสยฺยํ ภสฺตํ, อสกิํ ปคฺฆริตํ อสุจิปุณฺณํฯ
[469]
‘‘กิมิว ตาหํ ชานนฺตี, วิกุลกํ มํสโสณิตุปลิตฺตํ;
กิมิกุลาลยํ สกุณภตฺตํ, กเฬวรํ กิสฺส ทิยฺยติฯ
[470]
‘‘นิพฺพุยฺหติ สุสานํ, อจิรํ กาโย อเปตวิญฺญาโณ;
ฉุทฺโธ [ฉฑฺฑิโต (สฺยา.), ฉุฏฺโฐ (ก.)] กฬิงฺครํ วิย, ชิคุจฺฉมาเนหิ ญาตีหิฯ
[471]
‘‘ฉุทฺธูน [ฉฑฺฑูน (สฺยา.), ฉุฏฺฐูน (ก.)] นํ สุสาเน, ปรภตฺตํ นฺหายนฺติ [นฺหายเร (?)] ชิคุจฺฉนฺตา;
นิยกา มาตาปิตโร, กิํ ปน สาธารณา ชนตาฯ
[472]
‘‘อชฺโฌสิตา อสาเร, กเฬวเร อฏฺฐินฺหารุสงฺฆาเต;
เขฬสฺสุจฺจารสฺสว, ปริปุณฺเณ [เขฬสฺสุจฺจารปสฺสวปริปุณฺเณ (สี.)] ปูติกายมฺหิฯ
[473]
‘‘โย นํ วินิพฺภุชิตฺวา, อพฺภนฺตรมสฺส พาหิรํ กยิรา ;
คนฺธสฺส อสหมานา, สกาปิ มาตา ชิคุจฺเฉยฺยฯ
[474]
‘‘ขนฺธธาตุอายตนํ, สงฺขตํ ชาติมูลกํ ทุกฺขํ;
โยนิโส อนุวิจินนฺตี, วาเรยฺยํ กิสฺส อิจฺเฉยฺยํฯ
[475]
‘‘ทิวเส ทิวเส ติสตฺติ, สตานิ นวนวา ปเตยฺยุํ กายมฺหิ;
วสฺสสตมฺปิ จ ฆาโต, เสยฺโย ทุกฺขสฺส เจวํ ขโยฯ
[476]
‘‘อชฺฌุปคจฺเฉ ฆาตํ, โย วิญฺญาเยวํ สตฺถุโน วจนํ;
‘ทีโฆ เตสํ [โว (ก.)] สํสาโร, ปุนปฺปุนํ หญฺญมานานํ’ฯ
[477]
‘‘เทเวสุ มนุสฺเสสุ จ, ติรจฺฉานโยนิยา อสุรกาเย;
เปเตสุ จ นิรเยสุ จ, อปริมิตา ทิสฺสเร ฆาตาฯ
[478]
‘‘ฆาตา นิรเยสุ พหู, วินิปาตคตสฺส ปีฬิยมานสฺส [กิลิสฺสมานสฺส (สฺยา. ก.)];
เทเวสุปิ อตฺตาณํ, นิพฺพานสุขา ปรํ นตฺถิฯ
[479]
‘‘ปตฺตา เต นิพฺพานํ, เย ยุตฺตา ทสพลสฺส ปาวจเน;
อปฺโปสฺสุกฺกา ฆเฏนฺติ, ชาติมรณปฺปหานายฯ
[480]
‘‘อชฺเชว ตาตภินิกฺขมิสฺสํ, โภเคหิ กิํ อสาเรหิ;
นิพฺพินฺนา เม กามา, วนฺตสมา ตาลวตฺถุกตา’’ฯ
[481]
สา เจวํ ภณติ ปิตรมนีกรตฺโต จ ยสฺส สา ทินฺนา;
อุปยาสิ วารณวเต, วาเรยฺยมุปฏฺฐิเต กาเลฯ
[482]
อถ อสิตนิจิตมุทุเก, เกเส ขคฺเคน ฉินฺทิย สุเมธา;
ปาสาทํ ปิทหิตฺวา [ปิเธตฺวา (สี. สฺยา.), ปิธิตฺวา (ก.)], ปฐมชฺฌานํ สมาปชฺชิฯ
[483]
สา จ ตหิํ สมาปนฺนา, อนีกรตฺโต จ อาคโต นครํ;
ปาสาเท จ [ปาสาเทว (สี. สฺยา.)] สุเมธา, อนิจฺจสญฺญํ [อนิจฺจสญฺญา (สพฺพตฺถ)] สุภาเวติฯ
[484]
สา จ มนสิ กโรติ, อนีกรตฺโต จ อารุหี ตุริตํ;
มณิกนกภูสิตงฺโค, กตญฺชลี ยาจติ สุเมธํฯ
[485]
‘‘รชฺเช อาณาธนมิสฺสริยํ, โภคา สุขา ทหริกาสิ;
ภุญฺชาหิ กามโภเค, กามสุขา ทุลฺลภา โลเกฯ
[486]
‘‘นิสฺสฏฺฐํ เต รชฺชํ, โภเค ภุญฺชสฺสุ เทหิ ทานานิ;
มา ทุมฺมนา อโหสิ, มาตาปิตโร เต ทุกฺขิตา’’ [มาตาปิตโร จ เต ทุขิตา (?)]ฯ
[487]
ตํ ตํ ภณติ สุเมธา, กาเมหิ อนตฺถิกา วิคตโมหา;
‘‘มา กาเม อภินนฺทิ, กาเมสฺวาทีนวํ ปสฺสฯ
[488]
‘‘จาตุทฺทีโป ราชา มนฺธาตา, อาสิ กามโภคิน มคฺโค;
อติตฺโต กาลงฺกโต, น จสฺส ปริปูริตา อิจฺฉาฯ
[489]
‘‘สตฺต รตนานิ วสฺเสยฺย, วุฏฺฐิมา ทสทิสา สมนฺเตน;
น จตฺถิ ติตฺติ กามานํ, อติตฺตาว มรนฺติ นราฯ
[490]
‘‘อสิสูนูปมา กามา, กามา สปฺปสิโรปมา;
อุกฺโกปมา อนุทหนฺติ, อฏฺฐิกงฺกล [กงฺขล (สี.)] สนฺนิภาฯ
[491]
‘‘อนิจฺจา อทฺธุวา กามา, พหุทุกฺขา มหาวิสา;
อโยคุโฬว สนฺตตฺโต, อฆมูลา ทุขปฺผลาฯ
[492]
‘‘รุกฺขปฺผลูปมา กามา, มํสเปสูปมา ทุขา;
สุปิโนปมา วญฺจนิยา, กามา ยาจิตกูปมาฯ
[493]
‘‘สตฺติสูลูปมา กามา, โรโค คณฺโฑ อฆํ นิฆํ;
องฺคารกาสุสทิสา, อฆมูลํ ภยํ วโธฯ
[494]
‘‘เอวํ พหุทุกฺขา กามา, อกฺขาตา อนฺตรายิกา;
คจฺฉถ น เม ภควเต, วิสฺสาโส อตฺถิ อตฺตโนฯ
[495]
‘‘กิํ มม ปโร กริสฺสติ, อตฺตโน สีสมฺหิ ฑยฺหมานมฺหิ;
อนุพนฺเธ ชรามรเณ, ตสฺส ฆาตาย ฆฏิตพฺพํ’’ฯ
[496]
ทฺวารํ อปาปุริตฺวานหํ [อวาปุริตฺวาหํ (สี.)], มาตาปิตโร อนีกรตฺตญฺจ;
ทิสฺวาน ฉมํ นิสินฺเน, โรทนฺเต อิทมโวจํฯ
[497]
‘‘ทีโฆ พาลานํ สํสาโร, ปุนปฺปุนญฺจ โรทตํ;
อนมตคฺเค ปิตุ มรเณ, ภาตุ วเธ อตฺตโน จ วเธฯ
[498]
‘‘อสฺสุ ถญฺญํ รุธิรํ, สํสารํ อนมตคฺคโต สรถ;
สตฺตานํ สํสรตํ, สราหิ อฏฺฐีนญฺจ สนฺนิจยํฯ
[499]
‘‘สร จตุโรทธี [สรสฺสุ จตุโร อุทธี (?)], อุปนีเต อสฺสุถญฺญรุธิรมฺหิ;
สร เอกกปฺปมฏฺฐีนํ, สญฺจยํ วิปุเลน สมํฯ
[500]
‘‘อนมตคฺเค สํสรโต, มหิํ [มหามหิํ (?)] ชมฺพุทีปมุปนีตํ;
โกลฏฺฐิมตฺตคุฬิกา, มาตา มาตุสฺเวว นปฺปโหนฺติฯ
[501]
‘‘ติณกฏฺฐสาขาปลาสํ [สร ติณกฏฺฐสาขาปลาสํ (สี.)], อุปนีตํ อนมตคฺคโต สร;
จตุรงฺคุลิกา ฆฏิกา, ปิตุปิตุสฺเวว นปฺปโหนฺติฯ
[502]
‘‘สร กาณกจฺฉปํ ปุพฺพสมุทฺเท, อปรโต จ ยุคฉิทฺทํ;
สิรํ [สร (สี.)] ตสฺส จ ปฏิมุกฺกํ, มนุสฺสลาภมฺหิ โอปมฺมํฯ
[503]
‘‘สร รูปํ เผณปิณฺโฑปมสฺส, กายกลิโน อสารสฺส;
ขนฺเธ ปสฺส อนิจฺเจ, สราหิ นิรเย พหุวิฆาเตฯ
[504]
‘‘สร กฏสิํ วฑฺเฒนฺเต, ปุนปฺปุนํ ตาสุ ตาสุ ชาตีสุ;
สร กุมฺภีลภยานิ จ, สราหิ จตฺตาริ สจฺจานิฯ
[505]
‘‘อมตมฺหิ วิชฺชมาเน, กิํ ตว ปญฺจกฏุเกน ปีเตน;
สพฺพา หิ กามรติโย, กฏุกตรา ปญฺจกฏุเกนฯ
[506]
‘‘อมตมฺหิ วิชฺชมาเน, กิํ ตว กาเมหิ เย ปริฬาหา [สปริฬาหา (สี. อฏฺฐ.)];
สพฺพา หิ กามรติโย, ชลิตา กุถิตา กมฺปิตา สนฺตาปิตาฯ
[507]
‘‘อสปตฺตมฺหิ สมาเน, กิํ ตว กาเมหิ เย พหุสปตฺตา;
ราชคฺคิโจรอุทกปฺปิเยหิ, สาธารณา กามา พหุสปตฺตาฯ
[508]
‘‘โมกฺขมฺหิ วิชฺชมาเน, กิํ ตว กาเมหิ เยสุ วธพนฺโธ;
กาเมสุ หิ อสกามา, วธพนฺธทุขานิ อนุโภนฺติฯ
[509]
‘‘อาทีปิตา ติณุกฺกา, คณฺหนฺตํ ทหนฺติ เนว มุญฺจนฺตํ;
อุกฺโกปมา หิ กามา, ทหนฺติ เย เต น มุญฺจนฺติฯ
[510]
‘‘มา อปฺปกสฺส เหตุ, กามสุขสฺส วิปุลํ ชหี สุขํ;
มา ปุถุโลโมว พฬิสํ, คิลิตฺวา ปจฺฉา วิหญฺญสิฯ
[511]
‘‘กามํ กาเมสุ ทมสฺสุ, ตาว สุนโขว สงฺขลาพทฺโธ;
กาหินฺติ ขุ ตํ กามา, ฉาตา สุนขํว จณฺฑาลาฯ
[512]
‘‘อปริมิตญฺจ ทุกฺขํ, พหูนิ จ จิตฺตโทมนสฺสานิ;
อนุโภหิสิ กามยุตฺโต, ปฏินิสฺสช [ปฏินิสฺสร (สี.)] อทฺธุเว กาเมฯ
[513]
‘‘อชรมฺหิ วิชฺชมาเน, กิํ ตว กาเมหิ [เยสุ ชราย จ; มรณพฺยาธิหิ คหิตา (?)] เยสุ ชรา;
มรณพฺยาธิคหิตา [เยสุ ชราย จ; มรณพฺยาธิหิ คหิตา (?)], สพฺพา สพฺพตฺถ ชาติโยฯ
[514]
‘‘อิทมชรมิทมมรํ [อิทํ อชรํ อิทํ อมรํ (?)], อิทมชรามรํ ปทมโสกํ;
อสปตฺตมสมฺพาธํ, อขลิตมภยํ นิรุปตาปํฯ
[515]
‘‘อธิคตมิทํ พหูหิ, อมตํ อชฺชาปิ จ ลภนียมิทํ;
โย โยนิโส ปยุญฺชติ, น จ สกฺกา อฆฏมาเนน’’ฯ
[516]
เอวํ ภณติ สุเมธา, สงฺขารคเต รติํ อลภมานา;
อนุเนนฺตี อนิกรตฺตํ, เกเส จ ฉมํ ขิปิ สุเมธาฯ
[517]
อุฏฺฐาย อนิกรตฺโต, ปญฺชลิโก ยาจิตสฺสา ปิตรํ โส;
‘‘วิสฺสชฺเชถ สุเมธํ, ปพฺพชิตุํ วิโมกฺขสจฺจทสฺสา’’ฯ
[518]
วิสฺสชฺชิตา มาตาปิตูหิ, ปพฺพชิ โสกภยภีตา;
ฉ อภิญฺญา สจฺฉิกตา, อคฺคผลํ สิกฺขมานายฯ
[519]
อจฺฉริยมพฺภุตํ ตํ, นิพฺพานํ อาสิ ราชกญฺญาย;
ปุพฺเพนิวาสจริตํ, ยถา พฺยากริ ปจฺฉิเม กาเลฯ
[520]
‘‘ภควติ โกณาคมเน, สงฺฆารามมฺหิ นวนิเวสมฺหิ;
สขิโย ติสฺโส ชนิโย, วิหารทานํ อทาสิมฺหฯ
[521]
‘‘ทสกฺขตฺตุํ สตกฺขตฺตุํ, ทสสตกฺขตฺตุํ สตานิ จ สตกฺขตฺตุํ;
เทเวสุ อุปฺปชฺชิมฺห, โก ปน วาโท มนุสฺเสสุฯ
[522]
‘‘เทเวสุ มหิทฺธิกา อหุมฺห, มานุสกมฺหิ โก ปน วาโท;
สตฺตรตนสฺส มเหสี, อิตฺถิรตนํ อหํ อาสิํฯ
[523]
‘‘โส เหตุ โส ปภโว, ตํ มูลํ สาว สาสเน ขนฺตี;
ตํ ปฐมสโมธานํ, ตํ ธมฺมรตาย นิพฺพานํ’’ฯ
[524]
เอวํ กโรนฺติ เย สทฺทหนฺติ, วจนํ อโนมปญฺญสฺส;
นิพฺพินฺทนฺติ ภวคเต, นิพฺพินฺทิตฺวา วิรชฺชนฺตีติฯ
อิตฺถํ สุทํ สุเมธา เถรี คาถาโย อภาสิตฺถาติฯ
มหานิปาโต นิฏฺฐิโตฯ
สมตฺตา เถรีคาถาโยฯ
คาถาสตานิ จตฺตาริ, อสีติ ปุน จุทฺทส [คาถาสงฺขฺยา อิธ อนุกฺกมณิกคณนาวเสน ปากฏา];
เถริเยกุตฺตรสตา [เถรีเยกุตฺตรฉสตา (?) ติํสมตฺตาปิ ปญฺจสตมตฺตาปิ เถริโย เอกโต อาคตา มนสิกาตพฺพา], สพฺพา ตา อาสวกฺขยาติฯ
เถรีคาถาปาฬิ นิฏฺฐิตาฯ