‘‘ธมฺเม จ เย อริยปเวทิเต รตา,
อนุตฺตรา เต วจสา มนสา กมฺมุนา จ;
เต สนฺติโสรจฺจสมาธิสณฺฐิตา,
สุตสฺส ปญฺญาย จ สารมชฺฌคู’’ติฯ
กิํสีลสุตฺตํ นวมํ นิฏฺฐิตํฯ
10. อุฏฺฐานสุตฺตํ
[333]
อุฏฺฐหถ นิสีทถ, โก อตฺโถ สุปิเตน โว;
อาตุรานญฺหิ กา นิทฺทา, สลฺลวิทฺธาน รุปฺปตํฯ
[334]
อุฏฺฐหถ นิสีทถ, ทฬฺหํ สิกฺขถ สนฺติยา;
มา โว ปมตฺเต วิญฺญาย, มจฺจุราชา อโมหยิตฺถ วสานุเคฯ
[335]
ยาย เทวา มนุสฺสา จ, สิตา ติฏฺฐนฺติ อตฺถิกา;
ตรเถตํ วิสตฺติกํ, ขโณ โว [ขโณ เว (ปี. ก.)] มา อุปจฺจคา;
ขณาตีตา หิ โสจนฺติ, นิรยมฺหิ สมปฺปิตาฯ
[336]
ปมาโท รโช ปมาโท, ปมาทานุปติโต รโช;
อปฺปมาเทน วิชฺชาย, อพฺพเห [อพฺพูฬฺเห (สฺยา. ปี.), อพฺพุเห (ก. อฏฺฐ.)] สลฺลมตฺตโนติฯ
อุฏฺฐานสุตฺตํ ทสมํ นิฏฺฐิตํฯ
11. ราหุลสุตฺตํ
[337]
‘‘กจฺจิ อภิณฺหสํวาสา, นาวชานาสิ ปณฺฑิตํ;
อุกฺกาธาโร [โอกฺกาธาโร (สฺยา. ก.)] มนุสฺสานํ, กจฺจิ อปจิโต ตยา’’ [ตว (สี. อฏฺฐ.)]ฯ
[338]
‘‘นาหํ อภิณฺหสํวาสา, อวชานามิ ปณฺฑิตํ;
อุกฺกาธาโร มนุสฺสานํ, นิจฺจํ อปจิโต มยา’’ฯ
[339]