วตฺถุคาถา
[982]
โกสลานํ ปุรา รมฺมา, อคมา ทกฺขิณาปถํ;
อากิญฺจญฺญํ ปตฺถยาโน, พฺราหฺมโณ มนฺตปารคูฯ
[983]
โส อสฺสกสฺส วิสเย, อฬกสฺส [มุฬกสฺส (สฺยา.), มูฬฺหกสฺส (ก.), มฬกสฺส (นิทฺเทส)] สมาสเน;
วสิ โคธาวรีกูเล, อุญฺเฉน จ ผเลน จฯ
[984]
ตสฺเสว อุปนิสฺสาย, คาโม จ วิปุโล อหุ;
ตโต ชาเตน อาเยน, มหายญฺญมกปฺปยิฯ
[985]
มหายญฺญํ ยชิตฺวาน, ปุน ปาวิสิ อสฺสมํ;
ตสฺมิํ ปฏิปวิฏฺฐมฺหิ, อญฺโญ อาคญฺฉิ พฺราหฺมโณฯ
[986]
อุคฺฆฏฺฏปาโท ตสิโต [ตสฺสิโต (ก.)], ปงฺกทนฺโต รชสฺสิโร;
โส จ นํ อุปสงฺกมฺม, สตานิ ปญฺจ ยาจติฯ
[987]
ตเมนํ พาวรี ทิสฺวา, อาสเนน นิมนฺตยิ;
สุขญฺจ กุสลํ ปุจฺฉิ, อิทํ วจนมพฺรวิฯ
[988]
‘‘ยํ โข มม เทยฺยธมฺมํ, สพฺพํ วิสชฺชิตํ มยา;
อนุชานาหิ เม พฺรหฺเม, นตฺถิ ปญฺจสตานิ เม’’ฯ
[989]
‘‘สเจ เม ยาจมานสฺส, ภวํ นานุปทสฺสติ;
สตฺตเม ทิวเส ตุยฺหํ, มุทฺธา ผลตุ สตฺตธา’’ฯ
[990]
อภิสงฺขริตฺวา กุหโก, เภรวํ โส อกิตฺตยิ;
ตสฺส ตํ วจนํ สุตฺวา, พาวรี ทุกฺขิโต อหุฯ
[991]
อุสฺสุสฺสติ อนาหาโร, โสกสลฺลสมปฺปิโต;
อโถปิ เอวํ จิตฺตสฺส, ฌาเน น รมตี มโนฯ
[992]
อุตฺรสฺตํ ทุกฺขิตํ ทิสฺวา, เทวตา อตฺถกามินี;
พาวริํ อุปสงฺกมฺม, อิทํ วจนมพฺรวิฯ
[993]
‘‘น โส มุทฺธํ ปชานาติ, กุหโก โส ธนตฺถิโก;
มุทฺธนิ มุทฺธปาเต วา, ญาณํ ตสฺส น วิชฺชติ’’ฯ
[994]
‘‘โภตี จรหิ ชานาสิ, ตํ เม อกฺขาหิ ปุจฺฉิตา;
มุทฺธํ มุทฺธาธิปาตญฺจ, ตํ สุโณม วโจ ตว’’ฯ
[995]
‘‘อหมฺเปตํ น ชานามิ, ญาณเมตฺถ น วิชฺชติ;
มุทฺธนิ มุทฺธาธิปาเต จ, ชินานํ เหตฺถ [มุทฺธํ มุทฺธาธิปาโต จ, ชินานํ เหต (สี. สฺยา. ปี.)] ทสฺสนํ’’ฯ
[996]
‘‘อถ โก จรหิ ชานาติ, อสฺมิํ ปถวิมณฺฑเล [ปุถวิมณฺฑเล (สี. ปี.)];
มุทฺธํ มุทฺธาธิปาตญฺจ, ตํ เม อกฺขาหิ เทวเต’’ฯ
[997]
‘‘ปุรา กปิลวตฺถุมฺหา, นิกฺขนฺโต โลกนายโก;
อปจฺโจ โอกฺกากราชสฺส, สกฺยปุตฺโต ปภงฺกโรฯ
[998]
‘‘โส หิ พฺราหฺมณ สมฺพุทฺโธ, สพฺพธมฺมาน ปารคู;
สพฺพาภิญฺญาพลปฺปตฺโต, สพฺพธมฺเมสุ จกฺขุมา;
สพฺพกมฺมกฺขยํ ปตฺโต, วิมุตฺโต อุปธิกฺขเยฯ
[999]
‘‘พุทฺโธ โส ภควา โลเก, ธมฺมํ เทเสติ จกฺขุมา;
ตํ ตฺวํ คนฺตฺวาน ปุจฺฉสฺสุ, โส เต ตํ พฺยากริสฺสติ’’ฯ
[1000]
สมฺพุทฺโธติ วโจ สุตฺวา, อุทคฺโค พาวรี อหุ;
โสกสฺส ตนุโก อาสิ, ปีติญฺจ วิปุลํ ลภิฯ
[1001]
โส พาวรี อตฺตมโน อุทคฺโค, ตํ เทวตํ ปุจฺฉติ เวทชาโต;
‘‘กตมมฺหิ คาเม นิคมมฺหิ วา ปน, กตมมฺหิ วา ชนปเท โลกนาโถ;
ยตฺถ คนฺตฺวาน ปสฺเสมุ [คนฺตฺวา นมสฺเสมุ (สี. สฺยา. ปี.)], สมฺพุทฺธํ ทฺวิปทุตฺตมํ’’ [ทฺวิปทุตฺตมํ (สี. สฺยา. ปี.)],ฯ
[1002]
‘‘สาวตฺถิยํ โกสลมนฺทิเร ชิโน, ปหูตปญฺโญ วรภูริเมธโส;
โส สกฺยปุตฺโต วิธุโร อนาสโว, มุทฺธาธิปาตสฺส วิทู นราสโภ’’ฯ
[1003]
ตโต อามนฺตยี สิสฺเส, พฺราหฺมเณ มนฺตปารเค;
‘‘เอถ มาณวา อกฺขิสฺสํ, สุณาถ วจนํ มมฯ
[1004]
‘‘ยสฺเสโส ทุลฺลโภ โลเก, ปาตุภาโว อภิณฺหโส;
สฺวาชฺช โลกมฺหิ อุปฺปนฺโน, สมฺพุทฺโธ อิติ วิสฺสุโต;
ขิปฺปํ คนฺตฺวาน สาวตฺถิํ, ปสฺสวฺโห ทฺวิปทุตฺตมํ’’ฯ
[1005]
‘‘กถํ จรหิ ชาเนมุ, ทิสฺวา พุทฺโธติ พฺราหฺมณ;
อชานตํ โน ปพฺรูหิ, ยถา ชาเนมุ ตํ มยํ’’ฯ
[1006]
‘‘อาคตานิ หิ มนฺเตสุ, มหาปุริสลกฺขณา;
ทฺวตฺติํสานิ จ [ทฺวิตฺติํสา จ (สี. สฺยา. ปี.), ทฺวิตฺติํส ตานิ (?)] พฺยากฺขาตา, สมตฺตา อนุปุพฺพโสฯ
[1007]
‘‘ยสฺเสเต โหนฺติ คตฺเตสุ, มหาปุริสลกฺขณา;
ทฺเวเยว ตสฺส คติโย, ตติยา หิ น วิชฺชติฯ
[1008]
‘‘สเจ อคารํ อาวสติ [อชฺฌาวสติ (ก.)], วิเชยฺย ปถวิํ อิมํ;
อทณฺเฑน อสตฺเถน, ธมฺเมนมนุสาสติฯ
[1009]
‘‘สเจ จ โส ปพฺพชติ, อคารา อนคาริยํ;
วิวฏฺฏจฺฉโท [วิวตฺตฉทฺโท (สี.)] สมฺพุทฺโธ, อรหา ภวติ อนุตฺตโรฯ
[1010]
‘‘ชาติํ โคตฺตญฺจ ลกฺขณํ, มนฺเต สิสฺเส ปุนาปเร;
มุทฺธํ มุทฺธาธิปาตญฺจ, มนสาเยว ปุจฺฉถฯ
[1011]
‘‘อนาวรณทสฺสาวี, ยทิ พุทฺโธ ภวิสฺสติ;
มนสา ปุจฺฉิเต ปญฺเห, วาจาย วิสฺสเชสฺสติ’’ฯ
[1012]
พาวริสฺส วโจ สุตฺวา, สิสฺสา โสฬส พฺราหฺมณา;
อชิโต ติสฺสเมตฺเตยฺโย, ปุณฺณโก อถ เมตฺตคูฯ
[1013]
โธตโก อุปสีโว จ, นนฺโท จ อถ เหมโก;
โตเทยฺยกปฺปา ทุภโย, ชตุกณฺณี จ ปณฺฑิโตฯ
[1014]
ภทฺราวุโธ อุทโย จ, โปสาโล จาปิ พฺราหฺมโณ;
โมฆราชา จ เมธาวี, ปิงฺคิโย จ มหาอิสิฯ
[1015]
ปจฺเจกคณิโน สพฺเพ, สพฺพโลกสฺส วิสฺสุตา;
ฌายี ฌานรตา ธีรา, ปุพฺพวาสนวาสิตาฯ
[1016]
พาวริํ อภิวาเทตฺวา, กตฺวา จ นํ ปทกฺขิณํ;
ชฏาชินธรา สพฺเพ, ปกฺกามุํ อุตฺตรามุขาฯ
[1017]
อฬกสฺส ปติฏฺฐานํ, ปุริมาหิสฺสติํ [ปุริมํ มาหิสฺสติํ (สี. ปี.), ปุรํ มาหิสฺสติํ (สฺยา.)] ตทา;
อุชฺเชนิญฺจาปิ โคนทฺธํ, เวทิสํ วนสวฺหยํฯ
[1018]
โกสมฺพิญฺจาปิ สาเกตํ, สาวตฺถิญฺจ ปุรุตฺตมํ;
เสตพฺยํ กปิลวตฺถุํ, กุสินารญฺจ มนฺทิรํฯ
[1019]
ปาวญฺจ โภคนครํ, เวสาลิํ มาคธํ ปุรํ;
ปาสาณกํ เจติยญฺจ, รมณียํ มโนรมํฯ
[1020]
ตสิโตวุทกํ สีตํ, มหาลาภํว วาณิโช;
ฉายํ ธมฺมาภิตตฺโตว, ตุริตา ปพฺพตมารุหุํฯ
[1021]
ภควา ตมฺหิ สมเย, ภิกฺขุสงฺฆปุรกฺขโต;
ภิกฺขูนํ ธมฺมํ เทเสติ, สีโหว นทตี วเนฯ
[1022]
อชิโต อทฺทส พุทฺธํ, สตรํสิํ [วีตรํสิํว (สฺยา.), สตรํสีว (ก.), ปีตรํสีว (นิทฺเทส)] ว ภาณุมํ;
จนฺทํ ยถา ปนฺนรเส, ปาริปูริํ อุปาคตํฯ
[1023]
อถสฺส คตฺเต ทิสฺวาน, ปริปูรญฺจ พฺยญฺชนํ;
เอกมนฺตํ ฐิโต หฏฺโฐ, มโนปญฺเห อปุจฺฉถฯ
[1024]
‘‘อาทิสฺส ชมฺมนํ [ชปฺปนํ (ก.)] พฺรูหิ, โคตฺตํ พฺรูหิ สลกฺขณํ [พฺรูหิสฺส ลกฺขณํ (นิทฺเทส)];
มนฺเตสุ ปารมิํ พฺรูหิ, กติ วาเจติ พฺราหฺมโณ’’ฯ
[1025]
‘‘วีสํ วสฺสสตํ อายุ, โส จ โคตฺเตน พาวรี;
ตีณิสฺส ลกฺขณา คตฺเต, ติณฺณํ เวทาน ปารคูฯ
[1026]
‘‘ลกฺขเณ อิติหาเส จ, สนิฆณฺฑุสเกฏุเภ;
ปญฺจสตานิ วาเจติ, สธมฺเม ปารมิํ คโต’’ฯ
[1027]
‘‘ลกฺขณานํ ปวิจยํ, พาวริสฺส นรุตฺตม;
กงฺขจฺฉิท [ตณฺหจฺฉิท (พหูสุ)] ปกาเสหิ, มา โน กงฺขายิตํ อหุ’’ฯ
[1028]
‘‘มุขํ ชิวฺหาย ฉาเทติ, อุณฺณสฺส ภมุกนฺตเร;
โกโสหิตํ วตฺถคุยฺหํ, เอวํ ชานาหิ มาณว’’ฯ
[1029]
ปุจฺฉญฺหิ กิญฺจิ อสุณนฺโต, สุตฺวา ปญฺเห วิยากเต;
วิจินฺเตติ ชโน สพฺโพ, เวทชาโต กตญฺชลีฯ
[1030]
‘‘โก นุ เทโว วา พฺรหฺมา วา, อินฺโท วาปิ สุชมฺปติ;
มนสา ปุจฺฉิเต ปญฺเห, กเมตํ ปฏิภาสติฯ
[1031]
‘‘มุทฺธํ มุทฺธาธิปาตญฺจ, พาวรี ปริปุจฺฉติ;
ตํ พฺยากโรหิ ภควา, กงฺขํ วินย โน อิเส’’ฯ
[1032]
‘‘อวิชฺชา มุทฺธาติ ชานาหิ, วิชฺชา มุทฺธาธิปาตินี;
สทฺธาสติสมาธีหิ, ฉนฺทวีริเยน สํยุตา’’ฯ
[1033]
ตโต เวเทน มหตา, สนฺถมฺภิตฺวาน มาณโว;
เอกํสํ อชินํ กตฺวา, ปาเทสุ สิรสา ปติฯ
[1034]
‘‘พาวรี พฺราหฺมโณ โภโต, สห สิสฺเสหิ มาริส;
อุทคฺคจิตฺโต สุมโน, ปาเท วนฺทติ จกฺขุม’’ฯ
[1035]
‘‘สุขิโต พาวรี โหตุ, สห สิสฺเสหิ พฺราหฺมโณ;
ตฺวญฺจาปิ สุขิโต โหหิ, จิรํ ชีวาหิ มาณวฯ
[1036]
‘‘พาวริสฺส จ ตุยฺหํ วา, สพฺเพสํ สพฺพสํสยํ;
กตาวกาสา ปุจฺฉวฺโห, ยํ กิญฺจิ มนสิจฺฉถ’’ฯ
[1037]
สมฺพุทฺเธน กโตกาโส, นิสีทิตฺวาน ปญฺชลี;
อชิโต ปฐมํ ปญฺหํ, ตตฺถ ปุจฺฉิ ตถาคตํฯ
วตฺถุคาถา นิฏฺฐิตาฯ
1. อชิตมาณวปุจฺฉา
[1038]
‘‘เกนสฺสุ นิวุโต โลโก, (อิจฺจายสฺมา อชิโต)
เกนสฺสุ นปฺปกาสติ;
กิสฺสาภิเลปนํ พฺรูสิ, กิํสุ ตสฺส มหพฺภยํ’’ฯ
[1039]
‘‘อวิชฺชาย นิวุโต โลโก, (อชิตาติ ภควา)
เววิจฺฉา ปมาทา นปฺปกาสติ;
ชปฺปาภิเลปนํ พฺรูมิ, ทุกฺขมสฺส มหพฺภยํ’’ฯ
[1040]
‘‘สวนฺติ สพฺพธิ โสตา, (อิจฺจายสฺมา อชิโต)
โสตานํ กิํ นิวารณํ;
โสตานํ สํวรํ พฺรูหิ, เกน โสตา ปิธิยฺยเร’’ [ปิถิยฺยเร (สี. สฺยา. ปี.), ปิถียเร (สี. อฏฺฐ.), ปิธียเร (?)]ฯ
[1041]
‘‘ยานิ โสตานิ โลกสฺมิํ, (อชิตาติ ภควา)
สติ เตสํ นิวารณํ;
โสตานํ สํวรํ พฺรูมิ, ปญฺญาเยเต ปิธิยฺยเร’’ฯ
[1042]
‘‘ปญฺญา เจว สติ ยญฺจ [สตี เจว (สี.), สตี จ (สฺยา.), สตี จาปิ (ปี. นิทฺเทส), สติ จาปิ (นิทฺเทส)], (อิจฺจายสฺมา อชิโต)
นามรูปญฺจ มาริส;
เอตํ เม ปุฏฺโฐ ปพฺรูหิ, กตฺเถตํ อุปรุชฺฌติ’’ฯ
[1043]
‘‘ยเมตํ ปญฺหํ อปุจฺฉิ, อชิต ตํ วทามิ เต;
ยตฺถ นามญฺจ รูปญฺจ, อเสสํ อุปรุชฺฌติ;
วิญฺญาณสฺส นิโรเธน, เอตฺเถตํ อุปรุชฺฌติ’’ฯ
[1044]
‘‘เย จ สงฺขาตธมฺมาเส, เย จ เสขา ปุถู อิธ;
เตสํ เม นิปโก อิริยํ, ปุฏฺโฐ ปพฺรูหิ มาริส’’ฯ
[1045]
‘‘กาเมสุ นาภิคิชฺเฌยฺย, มนสานาวิโล สิยา;
กุสโล สพฺพธมฺมานํ, สโต ภิกฺขุ ปริพฺพเช’’ติฯ
อชิตมาณวปุจฺฉา ปฐมา นิฏฺฐิตาฯ