ฯ นโม ตสฺส ภควโต อรหโต สมฺมาสมฺพุทฺธสฺสฯ

ขุทฺทกนิกาเย

สุตฺตนิปาตปาฬิ

1. อุรควคฺโค

1. อุรคสุตฺตํ

[1]

โย [โย เว (สฺยา.)] อุปฺปติตํ วิเนติ โกธํ, วิสฏํ สปฺปวิสํว โอสเธหิ [โอสเธภิ (ก.)];

โส ภิกฺขุ ชหาติ โอรปารํ, อุรโค ชิณฺณมิวตฺตจํ [ชิณฺณมิว ตจํ (สี. สฺยา. กํ. ปี.), ชิณฺณมิวา ตจํ (?)] ปุราณํฯ

[2]

โย ราคมุทจฺฉิทา อเสสํ, ภิสปุปฺผํว สโรรุหํ [สเรรุหํ (ก.)] วิคยฺห;

โส ภิกฺขุ ชหาติ โอรปารํ, อุรโค ชิณฺณมิวตฺตจํ, ปุราณํฯ

[3]

โย ตณฺหมุทจฺฉิทา อเสสํ, สริตํ สีฆสรํ วิโสสยิตฺวา;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

[4]

โย มานมุทพฺพธี อเสสํ, นฬเสตุํว สุทุพฺพลํ มโหโฆ;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

[5]

โย นาชฺฌคมา ภเวสุ สารํ, วิจินํ ปุปฺผมิว [ปุปฺผมิว (พหูสุ)] อุทุมฺพเรสุ;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

[6]

ยสฺสนฺตรโต น สนฺติ โกปา, อิติภวาภวตญฺจ [อิติพฺภวาภวตญฺจ (ก.)] วีติวตฺโต;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

[7]

ยสฺส วิตกฺกา วิธูปิตา, อชฺฌตฺตํ สุวิกปฺปิตา อเสสา;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

[8]

โย นาจฺจสารี น ปจฺจสารี, สพฺพํ อจฺจคมา อิมํ ปปญฺจํ;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

[9]

โย นาจฺจสารี น ปจฺจสารี, สพฺพํ วิตถมิทนฺติ ญตฺวา [อุตฺวา (สฺยา. ปี. ก.)] โลเก;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

[10]

โย นาจฺจสารี น ปจฺจสารี, สพฺพํ วิตถมิทนฺติ วีตโลโภ;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

[11]

โย นาจฺจสารี น ปจฺจสารี, สพฺพํ วิตถมิทนฺติ วีตราโค;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

[12]

โย นาจฺจสารี น ปจฺจสารี, สพฺพํ วิตถมิทนฺติ วีตโทโส;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

[13]

โย นาจฺจสารี น ปจฺจสารี, สพฺพํ วิตถมิทนฺติ วีตโมโห;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

[14]

ยสฺสานุสยา น สนฺติ เกจิ, มูลา จ อกุสลา สมูหตาเส;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

[15]

ยสฺส ทรถชา น สนฺติ เกจิ, โอรํ อาคมนาย ปจฺจยาเส;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

[16]

ยสฺส วนถชา น สนฺติ เกจิ, วินิพนฺธาย ภวาย เหตุกปฺปา;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

[17]

โย นีวรเณ ปหาย ปญฺจ, อนิโฆ ติณฺณกถํกโถ วิสลฺโล;

โส ภิกฺขุ ชหาติ โอรปารํ, อุรโค ชิณฺณมิวตฺตจํ ปุราณํฯ

อุรคสุตฺตํ ปฐมํ นิฏฺฐิตํฯ

2. ธนิยสุตฺตํ

[18]

‘‘ปกฺโกทโน ทุทฺธขีโรหมสฺมิ, (อิติ ธนิโย โคโป)

อนุตีเร มหิยา สมานวาโส;

ฉนฺนา กุฏิ อาหิโต คินิ, อถ เจ ปตฺถยสี ปวสฺส เทว’’ฯ

[19]

‘‘อกฺโกธโน วิคตขิโลหมสฺมิ [วิคตขีโลหมสฺมิ (สี. ปี.)], (อิติ ภควา)

อนุตีเร มหิเยกรตฺติวาโส;

วิวฏา กุฏิ นิพฺพุโต คินิ, อถ เจ ปตฺถยสี ปวสฺส เทว’’ฯ

[20]

‘‘อนฺธกมกสา น วิชฺชเร, (อิติ ธนิโย โคโป)

กจฺเฉ รูฬฺหติเณ จรนฺติ คาโว;

วุฏฺฐิมฺปิ สเหยฺยุมาคตํ, อถ เจ ปตฺถยสี ปวสฺส เทว’’ฯ

[21]

‘‘พทฺธาสิ ภิสี สุสงฺขตา, (อิติ ภควา)

ติณฺโณ ปารคโต วิเนยฺย โอฆํ;

อตฺโถ ภิสิยา น วิชฺชติ, อถ เจ ปตฺถยสี ปวสฺส เทว’’ฯ

[22]

‘‘โคปี มม อสฺสวา อโลลา, (อิติ ธนิโย โคโป)

ทีฆรตฺตํ [ทีฆรตฺต (ก.)] สํวาสิยา มนาปา;

ตสฺสา น สุณามิ กิญฺจิ ปาปํ, อถ เจ ปตฺถยสี ปวสฺส เทว’’ฯ

[23]

‘‘จิตฺตํ มม อสฺสวํ วิมุตฺตํ, (อิติ ภควา)

ทีฆรตฺตํ ปริภาวิตํ สุทนฺตํ;

ปาปํ ปน เม น วิชฺชติ, อถ เจ ปตฺถยสี ปวสฺส เทว’’ฯ

[24]

‘‘อตฺตเวตนภโตหมสฺมิ , (อิติ ธนิโย โคโป)

ปุตฺตา จ เม สมานิยา อโรคา;

เตสํ น สุณามิ กิญฺจิ ปาปํ, อถ เจ ปตฺถยสี ปวสฺส เทว’’ฯ

[25]

‘‘นาหํ ภตโกสฺมิ กสฺสจิ, (อิติ ภควา)

นิพฺพิฏฺเฐน จรามิ สพฺพโลเก;

อตฺโถ ภติยา น วิชฺชติ, อถ เจ ปตฺถยสี ปวสฺส เทว’’ฯ

[26]

‘‘อตฺถิ วสา อตฺถิ เธนุปา, (อิติ ธนิโย โคโป)

โคธรณิโย ปเวณิโยปิ อตฺถิ;

อุสโภปิ ควมฺปตีธ อตฺถิ, อถ เจ ปตฺถยสี ปวสฺส เทว’’ฯ

[27]

‘‘นตฺถิ วสา นตฺถิ เธนุปา, (อิติ ภควา)

โคธรณิโย ปเวณิโยปิ นตฺถิ;

อุสโภปิ ควมฺปตีธ นตฺถิ, อถ เจ ปตฺถยสี ปวสฺส เทว’’ฯ

[28]

‘‘ขิลา นิขาตา อสมฺปเวธี, (อิติ ธนิโย โคโป)

ทามา มุญฺชมยา นวา สุสณฺฐานา;

น หิ สกฺขินฺติ เธนุปาปิ เฉตฺตุํ [เฉตุํ (ก.)], อถ เจ ปตฺถยสี ปวสฺส เทว’’ฯ

[29]

‘‘อุสโภริว เฉตฺว [เฉตฺวา (สฺยา. ก.)] พนฺธนานิ, (อิติ ภควา)

นาโค ปูติลตํว ทาลยิตฺวา [ปูติลตํ ปทาลยิตฺวา (สฺยา. ก.)];

นาหํ ปุนุเปสฺสํ [ปุน อุเปสฺสํ (สี. สฺยา. กํ. ปี.), ปุนุเปยฺย (ก.)] คพฺภเสยฺยํ, อถ เจ ปตฺถยสี ปวสฺส เทว’’ฯ

[30]

‘‘นินฺนญฺจ ถลญฺจ ปูรยนฺโต, มหาเมโฆ ปวสฺสิ ตาวเทว;

สุตฺวา เทวสฺส วสฺสโต, อิมมตฺถํ ธนิโย อภาสถฯ

[31]

‘‘ลาภา วต โน อนปฺปกา, เย มยํ ภควนฺตํ อทฺทสาม;

สรณํ ตํ อุเปม จกฺขุม, สตฺถา โน โหหิ ตุวํ มหามุนิฯ

[32]

‘‘โคปี จ อหญฺจ อสฺสวา, พฺรหฺมจริยํ [พฺรหฺมจริย (ก.)] สุคเต จรามเส;

ชาติมรณสฺส ปารคู [ปารคา (สี. สฺยา. กํ. ปี.)], ทุกฺขสฺสนฺตกรา ภวามเส’’ฯ

[33]

‘‘นนฺทติ ปุตฺเตหิ ปุตฺติมา, (อิติ มาโร ปาปิมา)

โคมา [โคมิโก (สี. ปี.), โคปิโก (สฺยา. กํ.), โคปิโย (ก.)] โคหิ ตเถว นนฺทติ;

อุปธี หิ นรสฺส นนฺทนา, น หิ โส นนฺทติ โย นิรูปธิ’’ฯ

[34]

‘‘โสจติ ปุตฺเตหิ ปุตฺติมา, (อิติ ภควา)

โคปิโย โคหิ ตเถว โสจติ;

อุปธี หิ นรสฺส โสจนา, น หิ โส โสจติ โย นิรูปธี’’ติฯ

ธนิยสุตฺตํ ทุติยํ นิฏฺฐิตํฯ

3. ขคฺควิสาณสุตฺตํ

[35]

สพฺเพสุ ภูเตสุ นิธาย ทณฺฑํ, อวิเหฐยํ อญฺญตรมฺปิ เตสํ;

น ปุตฺตมิจฺเฉยฺย กุโต สหายํ, เอโก จเร ขคฺควิสาณกปฺโปฯ

[36]