4. กุมารปญฺหา
[1] ‘‘เอกํ นาม กิํ’’? ‘‘สพฺเพ สตฺตา อาหารฏฺฐิติกา’’ฯ
[2] ‘‘ทฺเว นาม กิํ’’? ‘‘นามญฺจ รูปญฺจ’’ฯ
[3] ‘‘ตีณิ นาม กิํ’’? ‘‘ติสฺโส เวทนา’’ฯ
[4] ‘‘จตฺตาริ นาม กิํ’’? ‘‘จตฺตาริ อริยสจฺจานิ’’ฯ
[5] ‘‘ปญฺจ นาม กิํ’’? ‘‘ปญฺจุปาทานกฺขนฺธา’’ฯ
[6] ‘‘ฉ นาม กิํ’’? ‘‘ฉ อชฺฌตฺติกานิ อายตนานิ’’ฯ
[7] ‘‘สตฺต นาม กิํ’’? ‘‘สตฺต โพชฺฌงฺคา’’ฯ
[8] ‘‘อฏฺฐ นาม กิํ’’? ‘‘อริโย อฏฺฐงฺคิโก มคฺโค’’ฯ
[9] ‘‘นว นาม กิํ’’? ‘‘นว สตฺตาวาสา’’ฯ
[10] ‘‘ทส นาม กิํ’’? ‘‘ทสหงฺเคหิ สมนฺนาคโต ‘อรหา’ติ วุจฺจตี’’ติฯ
กุมารปญฺหา นิฏฺฐิตาฯ
5. มงฺคลสุตฺตํ
[1] เอวํ เม สุตํ – เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส อาราเมฯ อถ โข อญฺญตรา เทวตา อภิกฺกนฺตาย รตฺติยา อภิกฺกนฺตวณฺณา เกวลกปฺปํ เชตวนํ โอภาเสตฺวา เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ อฏฺฐาสิฯ เอกมนฺตํ ฐิตา โข สา เทวตา ภควนฺตํ คาถาย อชฺฌภาสิ –
[2]
‘‘พหู เทวา มนุสฺสา จ, มงฺคลานิ อจินฺตยุํ;
อากงฺขมานา โสตฺถานํ, พฺรูหิ มงฺคลมุตฺตมํ’’ฯ
[3]
‘‘อเสวนา จ พาลานํ, ปณฺฑิตานญฺจ เสวนา;
ปูชา จ ปูชเนยฺยานํ [ปูชนียานํ (สี. สฺยา. กํ. ปี.)], เอตํ มงฺคลมุตฺตมํฯ
[4]
‘‘ปติรูปเทสวาโส จ, ปุพฺเพ จ กตปุญฺญตา;
อตฺตสมฺมาปณิธิ [อตฺถสมฺมาปณีธี (กตฺถจิ)] จ, เอตํ มงฺคลมุตฺตมํฯ
[5]
‘‘พาหุสจฺจญฺจ สิปฺปญฺจ, วินโย จ สุสิกฺขิโต;
สุภาสิตา จ ยา วาจา, เอตํ มงฺคลมุตฺตมํฯ
[6]
‘‘มาตาปิตุ อุปฏฺฐานํ, ปุตฺตทารสฺส สงฺคโห;
อนากุลา จ กมฺมนฺตา, เอตํ มงฺคลมุตฺตมํฯ
[7]
‘‘ทานญฺจ ธมฺมจริยา จ, ญาตกานญฺจ สงฺคโห;
อนวชฺชานิ กมฺมานิ, เอตํ มงฺคลมุตฺตมํฯ
[8]
‘‘อารตี วิรตี ปาปา, มชฺชปานา จ สํยโม;
อปฺปมาโท จ ธมฺเมสุ, เอตํ มงฺคลมุตฺตมํฯ
[9]
‘‘คารโว จ นิวาโต จ, สนฺตุฏฺฐิ จ กตญฺญุตา;
กาเลน ธมฺมสฺสวนํ [ธมฺมสฺสาวณํ (ก. สี.), ธมฺมสวนํ (ก. สี.)], เอตํ มงฺคลมุตฺตมํฯ
[10]
‘‘ขนฺตี จ โสวจสฺสตา, สมณานญฺจ ทสฺสนํ;
กาเลน ธมฺมสากจฺฉา, เอตํ มงฺคลมุตฺตมํฯ
[11]
‘‘ตโป จ พฺรหฺมจริยญฺจ, อริยสจฺจาน ทสฺสนํ;
นิพฺพานสจฺฉิกิริยา จ, เอตํ มงฺคลมุตฺตมํฯ
[12]
‘‘ผุฏฺฐสฺส โลกธมฺเมหิ, จิตฺตํ ยสฺส น กมฺปติ;
อโสกํ วิรชํ เขมํ, เอตํ มงฺคลมุตฺตมํฯ
[13]
‘‘เอตาทิสานิ กตฺวาน, สพฺพตฺถมปราชิตา;
สพฺพตฺถ โสตฺถิํ คจฺฉนฺติ, ตํ เตสํ มงฺคลมุตฺตม’’นฺติฯ
มงฺคลสุตฺตํ นิฏฺฐิตํฯ
6. รตนสุตฺตํ
[1]
ยานีธ ภูตานิ สมาคตานิ, ภุมฺมานิ [ภูมานิ (ก.)] วา ยานิ ว อนฺตลิกฺเข;
สพฺเพว ภูตา สุมนา ภวนฺตุ, อโถปิ สกฺกจฺจ สุณนฺตุ ภาสิตํฯ
[2]