เมนู

ฯ นโม ตสฺส ภควโต อรหโต สมฺมาสมฺพุทฺธสฺสฯ

ขุทฺทกนิกาเย

ขุทฺทกปาฐปาฬิ

1. สรณตฺตยํ

พุทฺธํ สรณํ คจฺฉามิ;

ธมฺมํ สรณํ คจฺฉามิ;

สงฺฆํ สรณํ คจฺฉามิฯ

ทุติยมฺปิ พุทฺธํ สรณํ คจฺฉามิ;

ทุติยมฺปิ ธมฺมํ สรณํ คจฺฉามิ;

ทุติยมฺปิ สงฺฆํ สรณํ คจฺฉามิฯ

ตติยมฺปิ พุทฺธํ สรณํ คจฺฉามิ;

ตติยมฺปิ ธมฺมํ สรณํ คจฺฉามิ;

ตติยมฺปิ สงฺฆํ สรณํ คจฺฉามิฯ

สรณตฺตยํ [สรณคมนํ นิฏฺฐิตํ (สฺยา.)] นิฏฺฐิตํฯ

2. ทสสิกฺขาปทํ

[1] ปาณาติปาตา เวรมณี-สิกฺขาปทํ [เวรมณีสิกฺขาปทํ (สี. สฺยา.)] สมาทิยามิฯ

[2] อทินฺนาทานา เวรมณี-สิกฺขาปทํ สมาทิยามิฯ

[3] อพฺรหฺมจริยา เวรมณี-สิกฺขาปทํ สมาทิยามิฯ

[4] มุสาวาทา เวรมณี-สิกฺขาปทํ สมาทิยามิฯ

[5] สุราเมรยมชฺชปมาทฏฺฐานา เวรมณี-สิกฺขาปทํ สมาทิยามิ

[6] วิกาลโภชนา เวรมณี-สิกฺขาปทํ สมาทิยามิฯ

[7] นจฺจ-คีต-วาทิต-วิสูกทสฺสนา เวรมณี-สิกฺขาปทํ สมาทิยามิฯ

[8] มาลา-คนฺธ-วิเลปน-ธารณ-มณฺฑน-วิภูสนฏฺฐานา เวรมณี-สิกฺขาปทํ สมาทิยามิฯ

[9] อุจฺจาสยน-มหาสยนา เวรมณี-สิกฺขาปทํ สมาทิยามิฯ

[10] ชาตรูป-รชตปฏิคฺคหณา เวรมณี-สิกฺขาปทํ สมาทิยามิฯ

ทสสิกฺขาปทํ [ทสสิกฺขาปทํ นิฏฺฐิตํ (สฺยา.)] นิฏฺฐิตํฯ

3. ทฺวตฺติํสากาโร

อตฺถิ อิมสฺมิํ กาเย –

เกสา โลมา นขา ทนฺตา ตโจ,

มํสํ นฺหารุ [นหารุ (สี. ปี.), นหารู (สฺยา. กํ.)] อฏฺฐิ [อฏฺฐี (สฺยา. กํ)] อฏฺฐิมิญฺชํ วกฺกํ,

หทยํ ยกนํ กิโลมกํ ปิหกํ ปปฺผาสํ,

อนฺตํ อนฺตคุณํ อุทริยํ กรีสํ มตฺถลุงฺคํ [( ) สพฺพตฺถ นตฺถิ, อฏฺฐกถา จ ทฺวตฺติํสสงฺขฺยา จ มนสิ กาตพฺพา],

ปิตฺตํ เสมฺหํ ปุพฺโพ โลหิตํ เสโท เมโท,

อสฺสุ วสา เขโฬ สิงฺฆาณิกา ลสิกา มุตฺตนฺติ [มุตฺตํ, มตฺถเก มตฺถลุงฺคนฺติ (สฺยา.)]

ทฺวตฺติํสากาโร นิฏฺฐิโตฯ