ฯนโม ตสฺส ภควโต อรหโต สมฺมาสมฺพุทฺธสฺสฯ ลํกิสฺสโร ชยตุ วารณราชคามี โภคินฺทโภค รุจิรายต ปีณ พาหุ, สาธุปจารนิรโต คุณสนฺนิวาโส ธมฺเม ฐิโต วีคตโกธมทาวเลโป; โย สพฺพโลกมหิโต กรุณาธิวาโส โมกฺขากโร รวิกุลมฺพร ปุณฺณ จนฺโท, เญยฺโยทธิํ สุวิปุลํ สกลํ วิพุทฺโธ โลกุตฺตมํ นมถ ตํ สิรสา มุนินฺทํ; โสปานมาลมมลํ ติทสาลยสฺส สํสาร สาครสมุตฺตรณาย เสตุํ, สพฺพาคตีภย วิวชฺชิต เขม มคฺคํ ธมฺมํ นมสฺสถ สทา มุนินา ปณีตํ; เทยฺยํ ตทปฺปมปิ ยตฺถ ปสนฺน จิตฺตา ทตฺวา นรา ผลมุฬารตรํ ลภนฺเต, ตํ สพฺพทา ทสพเลนปิ สุปฺปสตฺถํ สงฺฆํ นมสฺสถ สทามิตปุญฺญเขตฺตํ; เตโช พเลน มหตา รตนตฺตยสฺส โลกตฺตยํ สมธิคจฺฉติ เยน โมกฺขํ, รกฺขา น จตฺถิ จ สมา รตนตฺตยสฺส ตสฺมา สทา ภชถ ตํ รตนตฺตยํ โภ; ลํกิสฺสโร ปรหิเตกรโต นิราโส รตฺติมฺปิ ชาครรโต กรุณาธิวาโส, โลกํ วิโพธยติ โลกหิตาย กามํ ธมฺมํ สมาจรถ ชาคริยานุยุตฺตา; สตฺโตปการ นิรตา กุสเล สหายา โภ ทุลฺลภา ภุวิ นรา วิหตปฺปมาทา, ลํกาธิปํ คุณธนํ กุสเล สหายํ อาคมฺม สํจรถ ธมฺมมลํ ปมาทํ; ธมฺโม ติโลก สรโณ ปรโม รสานํ ธมฺโม มหคฺฆรตโน รตเนสุ โลเก, ธมฺโม ภเว ติภวทุกฺข วินาสเหตุ ธมฺมํ สมาจรถ ชาคริยานุยุตฺตา; นิทฺทํ วิโนทยถ ภาวยถปฺปเมยฺยํ ทุกฺขํ อนิจฺจมฺปิ เจห อนตฺตตญฺจ, เทเห รติํ ชหถ ช ชชฺชรภาชนาโภ ธมฺมํ สมาจรถ ชาคริยานุยุตฺตา; โอกาส มชฺช มม นตฺถิ สุเว กริสฺสํ ธมฺมํ อิตีหลสตา กุสลปฺปโยเค, นา’ลํ ติยทฺธสุ ตถา ภุวนตฺตเย จ กามํ น จตฺถิ มนุโช มรณา ปมุตฺโต; ขิตฺโต ยถา นภสิ เกนจิเทว เลฑฺฑุ ภูมิํ สมาปตฺติ ภารตยา ขเณน, ชาตตฺตเมว ขลุ การณเมกมตฺร โลกํ สทา นนุ ธุวํ มรณาย คนฺตุํ; กามํ นรสฺส ปตโต คิริมุทฺธนาโต มชฺเฌ น กิญฺจิ ภยนิสฺสรณาย เหตุ, กามํ วชนฺติ มรณํ ติภเวสุ สตฺตา โภเค รติํ ปชหถาปิ จ ชีวิเต จ; กามํ ปตนฺติ มหิยา ขลุ วสฺสธารา วิชฺชุลฺลตา วิตตเมฆ มุขา ปมุตฺตา, เอวํ นรา มรณภีม ปปาตมชฺเฌ กามํ ปตนฺติ นหิ โกจิ ภเวสุ นิจฺโจ; เวลาตเฏ ปฏุตโรรุ ตรํคมาลา นาสํ วชนฺติ สตตํ สลิลาลยสฺส, นาสํ ตถา สมุปยนฺติ นรามรานํ ปาณานิ ทารุณตเร มรโณทธิมฺหิ; รุทฺโธปิ โส รถวรสฺสคชาธิเปหิ โยเธหิ จาปิ สพเลหิ จ สายุเธหิ, โลกํ วิวํจิย สทา มรณูสโภ โส กามํ นิหนฺติ ภุวนตฺตย สาลิ ทณฺฑํ; โภ มารุเตน มหตา วิหโต ปทีโป ขิปฺปํ วินาส มุขเมติ มหปฺปโภปิ, โลเก ตถา มรณจณฺฑ สมีรเณน ขิปฺปํ วินสฺสติ นรายุมหา ปทีโป; รามชฺชุนปฺปภูติ ภูปติ ปุํควา จ สูรา ปุเร รณมุเข วิชิตาริ สงฺฆา, เตปีห จณฺฑ มรโณฆ นิมุคฺคเทหา นาสํ คตา ชคติ เก มรณา ปมุตฺตา? ลกฺขี จ สาครปฏา สธราธรา จ สมฺปตฺติโย จ วิวิธา อปิ รูปโสภา, สพฺพา จ ตา อปิ จ มิตฺตสุตา จ ทารา เก จาปิ กํ อนุคตา มรณํ วชนฺตํ? |