ฯนโม ตสฺส ภควโต อรหโต สมฺมาสมฺพุทฺธสฺสฯ อุตฺตมํ อุตฺตมงฺเคน นมสฺสิตฺวา มเหสิโน; นิพฺพาณมธุทํ ปาทปงฺกชํ สชฺชนาลินํฯ มหาโมหตมํ โลเก ธํเสนฺตํ ธมฺมภากรํ; ปาตุภูตํ มหาเตชํ ธมฺมราโชทยาจเลฯ ชนฺตุจิตฺตสเร ชาตํ ปสาทกุมุทํ สทา; โพเธนฺตํ สงฺฆวนฺทญฺจ สิโลรุกิรณุชฺชลํฯ ตหิํ, ตหิํ สุวิตฺถิณฺณํ ชินสฺส จริตํ หิตํ; ปวกฺขามิ สมาเสน สทา’นุสฺสรณตฺถิโกฯ ปณิตํ ตํ สรนฺตานํ ทุลฺลภมฺปิ สิวํปทํ; อทุลฺลภํ ภเว โภคปฏิลาภมฺหิ กา กถา? ตสฺมา ตํ ภญฺญมานํ เม จิตฺตวุตฺตปทกฺกมํ; สุนฺทรํ มธุรํ สุทฺธํ โสตุโสตรสายนํฯ โสตหตฺถปุฏา สมฺมา คเหตฺวาน นิรนฺตรํ; อชรามรมิ’จฺฉนฺตา สาธโว ปริภุญฺชถฯ กปฺปสตสหสฺสสฺส จตุนฺนํ จา’ปิ มตฺถเก; อสงฺเขยฺยานมา’วาสํ สพฺพทา ปุญฺญกามินํฯ นานารตนสมฺปนฺนํ นานาชนสมากุลํ; วิจิตฺตาปณ สํกิณฺณํ โตรณ คฺฆิก ภูสิตํฯ ยุตฺตํ ทสหิ สทฺเทหิ เทวินฺทปุรสนฺนิภํ; ปุรํ อมรสงฺขาตํ อโหสี รุจิรํ วรํฯ ตหิํ พฺราหฺมนฺวเย ชาโต สพฺพโลกาภิปูชิโต; มหาทโย มหาปญฺโญ อภิรูโป มโนรโมฯ สุเมโธ นาม นาเมน เวทสาครปารคู; กุมาโร’สิ ครูนํ โส อวสาเน ชินํกุโรฯ ราสิวฑฺฒกมจฺเจน ทสฺสิตํ อมิตํ ธนํ; อเนกสตคพฺเภสุ นิจิตํ ตํ อุทิกฺขิยฯ ธนสนฺนิจยํ กตฺวา อโห มยฺหํ ปิตาทโย; คตา มาสกเม’กมฺปิ เนวา’ทาย ทิวํ อิติฯ สํเวคมุ’ปยาโต’วจีมนฺเตสี’ติ คุณากโร; ธนสารํ อิหํ คยฺห คนฺตุํ ยุตฺตนฺติ เม ปนฯ รโหคโต นิสีทิตฺวา สุนฺทเร นิชมนฺทิเร; เทเห โทโส อุทิกฺขนฺโต โอวทนฺโต’ปิ อตฺตโนฯ เภทนํ ตนุโนทุกฺขํ ทุกฺโข ตสฺโส’ทโย’ปิ จ; ชาติธมฺโม ชราธมฺโม วฺยาธิธมฺโม อหํ อิติฯ เอวมา’ทีหิ เทหสฺมิํ ทิสฺวา โทเส อเนกธา; ปุเร เภริํ จราเปตฺวา อาโรเจตฺวาน ราชิโนฯ เภรินาทสุคนฺเธน ยาจกาลิสมาคเต; ทานกิญฺชกฺขโอเฆน สตฺตาหํ ปีนยี ตโตฯ ทานคฺคหิมพินฺทูนํ นิปาเตนา’ปิ ธํสนํ; อยาตํ ตํ วิโลเกตฺวา รตนมฺพุชกานนํฯ รุทโต ญาติสงฺฆสฺส ชลิตานลกานนา; คชินฺโท วิย เคหมฺหา นิกฺขมิตฺวา มโนรมาฯ มหนฺตํ โส มหาวีโร อุปคญฺฉิ หิมาลยํ; หริจนฺทนกปฺปูราครุคนฺเธหิ วาสิตํฯ สุผลฺลจมฺปกาโสกปาฏลีติลเกหิ จ; ปูคปุนฺนาคนาคาทิปาทเปหิ จ มณฺฑิตํฯ สีหวฺยคฺฆตรจฺเฉหิ อิภทีปิกปีหิ จ; ตุรงฺคมาทิเนเกหิ มิเคหิ จ สมากุลํฯ สาฬิการวิหํเสหิ หํสโกญฺจสุเวหิ จ; กโปตกรวีกาทิสกุนฺเตหิ จ กูชิตํฯ ยกฺขรกฺขสคนฺธพฺพเทวทานวเกหิ จ; สิทฺธวิชฺชาธราทีหิ ภูเตหิ จ นิเสวิตํฯ มโนสีลินฺทนีโลรุจารุปพฺพตปนฺติหิ; สชฺฌุเหมาทิเนเกหิ ภูธเรหิ จ ภาสุรํฯ สุวณฺณมณิโสปานเนกติตฺถสเรหิ จ; โสภิตํ ตตฺถ กีฬนฺตเนกเทวงฺคนาหิ จฯ สีตสีกรสญฺฉนฺนนิชฺฌรานํ สเตหิ จ; กิณฺณโรรครงฺเคหิ รมฺเมหิ วิราชิตํฯ สิขณฺฑิสณฺฑนจฺเจหิ ลตานํ มณฺฑเปหิ จ; เสตวาลุกสญฺฉนฺนมาลเกหิ จ มณฺฑิตํฯ สุวณฺณมณิมุตฺตาทิ อเนกรตนากรํ; อิจฺฉนฺตานํ ชนาลีนํ ปุญฺญกิญฺชกฺขมา’ลยํฯ ตม’ชฺโฌคยฺห โส ธีโร สหสฺสกฺเขน มาปิเต; ทิสฺวา อิสิปริกฺขาเร ปณฺณสาลวเร ตหิํฯ อิสิเวสํ คเหตฺวาน วิหรนฺโต สมาหิโต; สตฺตาห’พฺภนฺตเร ปญฺจ อภิญฺญ’ฏฺฐวิธา’ปิ จฯ อุปฺปาเทตฺวา สมาปตฺติสุเขเน’จ ตโปธโน; นภสา ทิวเส’กสฺมิํ คจฺฉนฺโต ชนตํ อิสิฯ โสเธนฺตม’ญฺชสํ ทิสฺวา โอตริตฺวา นภา ตหิํ; อิติ ตํ ชนตํ ปุจฺฉิ กสฺมา โสเธถ อญฺชสํฯ สุเมธ ตฺวํ นชานาสิ ทีปงฺกรตถาคโต; สมฺโพธิมุ’ตฺตมํ ปตฺวา ธมฺมจกฺกม’นุตฺตรํฯ ปวตฺเตตฺวาน โลกสฺส กโรนฺโต ธมฺมสงฺคหํ; รมฺมํ รมฺมปุรํ ปตฺวา วสตี’ห สุทสฺสเนฯ ภิกฺขุสตสหสฺเสหิ จตูหิ วิมเลหิ ตํ; นิมนฺตยิมฺห ทาเนน มยํ โลเกกนายกฯ ตสฺส อาคมนตฺถาย มคฺคํ โสเธม จกฺขุม; อิติ โสตสฺส โส ตสฺส สุขํ เทนฺโต ชโน’พฺรวิํฯ พุทฺโธ’ติ วจนํ สุตฺวา ปีติโย’ทคฺคมานโส; สกภาเวน สณฺฐาตุํ เนวสกฺขิ คุณากโรฯ เตนา’รทฺธญฺชสา ธีโร ยาจิตฺวาน ปเทสกํ; ลภิตฺวา วิสมํ ฐานํ สมํ กาตุํ สมารภิฯ นา’ลงฺกเตเยว ตหิํ ปเทเส, โลเกกนาโถ สนรามเรหิ; สมฺปูชิโต โลกหิโต มเหสิ, วสีหิ สทฺธิํ ปฏิปชฺชิ มคฺคํฯ ฉพฺพณฺณรํสิชาเลหิ ปชฺชลนฺตํ ตถาคตํ; อาคจฺฉนฺตํ ตหิ ทิสฺวา โมทมาโน วิจินฺตยิฯ ยนฺนูนิ’มสฺส ธีรสฺส เสตุํ กตฺวาน กทฺทเม; สกตฺตานํ นิปชฺชเย สสงฺฆสฺส มเหสิโนฯ ทีฆรตฺตาม’ลํ ตํ เม หิตาย จ สุขาย จ; อิจฺเจ’วํ จินฺตยิตฺวาน นิปนฺโน’โส ชินงฺกุโรฯ ปโพเธตฺวาน ทิสฺวาน จารุโลจนปงฺกเช; ปุน’เป’วํ วิจินฺเตสิ นิปนฺโน ธิติมา ตหิํฯ อิจฺเฉยฺยํ เจ’หม’ชฺเช’ว หนฺตฺวา’นนฺตรเณ ภเว; สงฺฆสฺส นวโก หุตฺวา ปวิเสยฺยํ ปุรํ วรํฯ กิม’ญฺญาตกเวเสน กฺเลสนิพฺพาปเณน เม; อยํ พุทฺโธ’ว’หํ พุทฺโธ หุตฺวา โลเก อนุตฺตโรฯ ชนตํ ธมฺมนาวาย ตาเรตฺวาน ภวณฺณวาว; นิพฺพาณปุรมา’เนตฺวา เสยฺยํ เม ปรินิพฺพุตํฯ อิจฺเจ’วํ จินฺตยิตฺวาน นิปนฺโน กทฺทเม ตหิํ; สุวณฺณกทลิกฺขนฺธสนฺนิโภ โส’ติ โสภติฯ ฉพฺพณฺณรํสีหิ วิราชมานํ, ทิสฺวา มนุญฺญํ สุคตตฺตภาวํ; สญฺชาตปีตีหิ อุทคฺคจิตฺโต, สมฺโพธิยา ฉนฺทม’กาสิ ธีโรฯ อาคนฺตฺวาน ตหิํ ฐานํ อิสิํ ปงฺเก นิปนฺนกํ; โลกสฺส เสตุภูโต’ปิ เสตุภูตํ ตม’ตฺตโนฯ ทิสฺวา อุสฺสีสเก ตสฺส ฐตฺวา โลเกกเสตุโน; โลเกกโลจโน ธีโร ทีปงฺกรตถาคโตฯ โคตโม นาม นาเมน สมฺพุทฺโธ’ยํ อนาคเต; ภวิสฺสตีติ วฺยากาสิ สาวเก จ ปุราทิเกฯ อิทํ วตฺวาน กตฺวาน สสงฺโฆ ตํ ปทกฺขิณํ; ปูเชสิ อฏฺฐมุฏฺฐิหิ กุสุเมหิ คุณปฺปิโยฯ อิติ กาตูน ปายาสิ สสงฺโฆ โลกนายโกว; รมฺมกํ นาม นครํ รมฺมารามาลยาลยํ ชินสฺส วจนํ สุตฺวา อุฏฺฐหิตฺวาน ปงฺกโต; มุทิโต เทวสงฺเฆหิ กุสุมาทีหิ ปูชิโตฯ ปลฺลงฺกมา’ภุชิตฺวาน นิสีทิ กุสุมาสเน; มหาตโป มหาปญฺโญ สุเมโธ ทมิตินฺทฺริโยฯ เทวา ทสสหสฺเสสุ จกฺกวาเฬสุ โมทิตา; อภิตฺววิํสุ ตํ ธีรํ นิสินฺนํ กุสุมาสเนฯ นิสินฺโน อุปธาเรสิ ธมฺเม พุทฺธกเร ตทา; กิมุทฺธํ วา อโธ วา’ปิ ทิสาสุ วิทิสาสุ จฯ อิจฺเจ’วํ วิจินนฺโต โส สกลํ ธมฺมธาตุกํ; อทฺทกฺขิ สกสนฺตาเน ปฐมํ ทานปารมิํฯ เอวเม’วํ คเวสนฺโต อุตฺตริํ ปารมี วิทู; สพฺพา ปารมิโย ทิสฺวา อตฺตโน ญาณจกฺขุนาฯ สํสาเร สํสรนฺโต โส พหุํ ทุกฺขํ ติติกฺขิย; คเวสนฺโต’มตํ สนฺโต ปูเรตฺวา ทานปารมิํฯ สตฺตนํ กปฺปรุกฺโข’ว จินฺตามณิ’ว กามโท; อิจฺฉิติจฺฉิตมนฺนาทิํ ททนฺโต ททตํ วโรฯ ตารกาหิ พหุํ กตฺวา นเภ จารุวิโลจเน; อุปฺปาเฏตฺวา ททํ ธีโร ยาจกานํ ปโมทิโตฯ มหิยา ปํสุโต จา’ปิ สมุทฺโททกโต’ธิกํ; ททํ สรีรมํสญฺจ โลหิตมฺปิ จ อตฺตโนฯ โมลินา’ลงฺกเต สีเส’ธิกํ กตฺวา สิเนรุโต; กมฺปยิตฺวา มหิํ เทนฺโต สุเต จา’ปิ สกงฺคตาวฯ สีลเนกฺกมฺมปญฺญาที ปูเรตฺวา สพฺพปารมี; เวสฺสนฺตรตฺตภาเว’ วมฺปตฺวา ตมฺภา จุโต ปนฯ อุปฺปชฺชิตฺวา สุราวาเส สุนฺทเร ตุสิเต ปุเร; วสนฺโต สุจิรํ กาลํ ภุตฺวานา’ตนฺตสมฺปทํฯ กตญฺชลีหิ เทเวหิ ยาจิโต ทิปทุตฺตโม; สมฺโพธาย มหาวีร กาโล ตุยฺหนฺติอาทินาฯ วิโลเกตฺวาน กาลาทิํ ญตฺวา กาลนฺติ โพธิยา; ปฏิญฺญํ เทวสงฺฆสฺส ทตฺวา นนฺทนกานนํฯ |