หตฺถวนคลฺลวิหาร

วํโส

ฯนโม ตสฺส ภควโต อรหโต สมฺมาสมฺพุทฺธสฺสฯ

[1]

สฺเนหุตฺตราย หทยา มลมลฺลิกาย,

ปชฺชาลิโต มติทสาย ชินปฺปทีโป;

โมหณฺธการมขิลํ มม นีหรนฺโต,

นิจฺจํ วิภาวยตุ จารุ ปทตฺถราสิํฯ

[2]

ลงฺกาภิสิตฺตวสุธาธิปตีสุ ราชา,

โย โพธิสตฺตคุณวา สิริสงฺฆโพธิ;

ตสฺสาติจารุ จริยา รจนามุเขน,

วกฺกามิ หตฺถวนคลฺลวิหาร วํสํฯ

[3]

พฺรหฺมนฺวเยนนุคตตฺถมโนมทสฺสี,

ขฺยาเตน สพฺพยติราชธุรณฺธเรน;

วฺยาปาริโตหมิติภานุคตํ กถญฺจ,

นิสฺสาย ปุพฺพลิขิตํวิธ วายมามิฯ

[4] อรฺณฺถ สุคตาคมสุธาปคานิทฺโธตกุทิฏฺฐิวิสกลงฺกาย ลํกาย ภควโต องฺคีรสสฺสมหานาควนุยฺยาเน สมิติสมาคตยกฺข รกฺขสโลกวิชยาปทานสฺส สิทฺธกฺเขนฺตภูโต สีหฬมหีมณฺฑลมณฺฑนาย มาโน วิวิธรตนากโรปลกฺขมานมหคฺฆมณิ เภโท มณิ เภโท นาม ชนปโทฯ

[5]

ลทฺธาน สตฺถุ วรณงฺกมนญฺญลพฺภ,

มานณฺทินา สุมนกูฏสิลุจฺจเยน;

อุสฺสาปิตา วิชยเกตุมตลฺลิเกว,

สุทฺโธรุวาลุกนที ยมลงฺกโรติฯ

[6]

ลงฺกาย ยกฺขคณนีหรเณ ชินสฺส,

จมฺมาสนุคฺคนหุนาสนผสฺสทาหา;

สํสารรกฺขสวปุพฺภวพุพฺพุลํจ,

ยสฺมิํ วิหาติ มหิยงฺคณ ถูปราชาฯ

[7]