เมนู

อนคฺฆโมปิ มณิเสฏฺโฐ,

เหมํ นิสฺสาย โสภติฯ

ราชกณฺโฑ นิฏฺฐิโตฯ

7. ปกิณฺณกกณฺโฑ

[138]

อิตฺถิมิสฺเส กุโตสีลํ,

มํส ภกฺเข กุโตทยา;

สุรา ปาเน กุโตสจฺจํ,

มหาโลเภ กุโตหิรี;

มหาตนฺเท กุโตสิปฺปํ,

มหา โกเธ กุโตธนํฯ

[139]

สุรา โยโค วิกาโล จ,

สมชฺช จรณาลสํ;

ขิฑฺฑาธุตฺโต ปาปมิตฺโต,

โภคนาสมุขา อิเมฯ

[140]

ทิวา นาทิกฺขา วตฺตพฺพํ,

รตฺโต นาวจเนน จ;

สญฺจเรยฺย ภยา ภีโต,

วเน วนจรี ยถาฯ

[141]

ชีวนฺตาปิ มตาปญฺจ,

พฺยาเสน ปริกิตฺติตา;

ทุกฺขิโต พฺยาธิโตมูฬฺโห,

อิณวา นิตฺยเสวโกฯ

[142]

อนาคตํ ภยํ ทิสฺวา,

ทูรโต ปริวชฺชเย;

อาคตญฺจ ภยํ ทิสฺวา,

อ ภีโต โหติ ปณฺฑิโตฯ

[143]

นิทฺทาลุโก ปมตฺโตจ,

สุขตฺโต โรควาลโส;

มหิจฺโฉ กมฺมาราโมจ,

สตฺเต เต สตฺถวชฺชิตาฯ

[144]

ทุคฺคตํ คจฺฉ เห ลาภ,

ลาภี ลาเภน ปูรติ;

ถเล ปวสฺส ปชฺชุนฺน,

สินฺธุ อาเปน ปูรติ;

นตฺถิทํ กมฺมปฺปธานกํฯ

[145]

น หิ โกจิ กเต กิจฺเจ,

กตฺตารํ สมุเปกฺขเต;

ตสฺมา สพฺพานิ กิจฺจานิ,

สาว เสเสน การเยฯ

[146]

ตูลํ สลฺลหุกํ โลเก,

ตโต จาปลฺล-ชาติโก;

ตโต วุฑฺฒ มโนวาโท,

ปมตฺโต พุทฺธสาสเนฯ

[147]

ปาสาณฉตฺตํ ครุกํ,

ตโต เทวานจิกฺขณํ;

ตโต วุฑฺฒานโมวาโท,

ตโต พุทฺธสฺส สาสนํฯ

[148]

กายสฺส ทกฺขิณ หตฺโถ,

โทโส เอตฺถ กนิฏฺฐโก;

กณฺณ ฆานาน-มกฺขีนํ,

วาโม ตุ ปาท-ปาสโกฯ

[149]

ตมฺพูลสฺส มชฺฌ ปตฺเต,

กุเวโร รกฺขตี สทา;

มูลมฺหิ รกฺขติ ยกฺโข,

อคฺคมฺหิ กาลกณฺณิกา;

ตานิ ภุญฺเชยฺย ฉินฺทิตฺวา,

สิรี เอวํ ปวฑฺฒติฯ

[150]

สมฺปุณฺณรกฺโข พฺรหฺมาว,

อจฺจุรกฺโข จ พิสฺสโณ;

ตสฺมา หิ เต ปูชยนฺตุ,

สทา มาเนนฺติ ตํ นรํฯ

[151]

โคณา หิ สพฺพคิหีนํ,

โปสกา โภคทายกา;

ตสฺมา หิ มาตา ปิตูว,

มานเย สกฺกเรยฺย จฯ

[152]

เยจ ขาทนฺติ โคมํสํ,

มาตุ มํสํว ขาทเร;

มเตสุ เตสุ คิชฺฌานํ,

ทเท โสเต จ วาหเยฯ

[153]

คุรุสิทฺโธ สิปฺปารมฺโภ,

รวิ โสกฺรา จ มชฺฌิโม;

น สิปฺโป พุทฺธจนฺทโร,

โสรี องฺคาจ มรณํฯ

[154]

อฏฺฐมิยํ คุรุํ หนฺติ,

สิสฺสํ หนฺติ จตุทฺทสิํ;

สิปฺปํ หนฺติ ทส สิปฺปํ,

มาตาปิตา จ ปุณฺณมิํฯ

[155]

นาฬิกํ สตฺต นภุญฺเช,

น ลาพุํ นวมํ ตถา;

ทฺวาทส ปฺรินฺนํตฺริมินํ,

ภุญฺเช สิปฺปํ วินสฺสติฯ

[156]

เอกํ จเช กุลอตฺถํ,

คามสฺสตฺถํ กุวํ จเช;

คาม จเช ชนปทตฺถํ,

อตฺตตฺถํ ปถวิํ จเชฯ

[157]

เทสํ โอสฺสชฺช คจฺฉนฺติ,

สีโห สปฺปุริโส คโช;

ตตฺเถว นิธนํ ยนฺติ,

กาโก กาปุริโส มิโคฯ

[158]

ยมฺหิ ปเทเส น มาโน,

น เปมํ น จ พนฺธวา;

น จ วิชฺชาคาโห โกจิ,

น ตตฺถ วสนํ กเรฯ

[159]

จรตฺเยเกน ปาเทน,

ติฏฺฐตฺเยเกน ปณฺฑิโต;

อ นิสมฺม ปรํ ฐานํ,

น ปุพฺพมาลยํ ชเหฯ

[160]

ธน ธญฺญ ปโยเคสุ,

ตถา วิชฺชาคเมสุ จ;

ทูเตสุ อปจาเรสุ,

จชฺชา ลชฺชา ตทา ภเวฯ

[161]

ทฺวิ คุโณ ถีนมาหาโร,

พุทฺธิจาปิ จตุคฺคุโณ;

ฉคฺคุโณ โหติ วายาโม,

กาโมตฺวฏฺฐ-คุโณ ภเวฯ

[162]

ปพฺเพ ปพฺเพ กเมนุจฺฉุ,

วิเสสรสวาคฺคโต;

ตถา สุเมตฺติโก สาธุ,

วิปรีโตว ทุชฺชโนฯ

[163]

กสฺสโก วาณิโช มจฺโจ,

สมโณ สุต สีลวา;

เตสุ วิปุล ชาเตสุ,

รฏฺฐมฺปิ วิปุลํ สิยาฯ

[164]

อสชฺฌาย มลา มนฺตา,

อนุฏฺฐาน มลา ฆรา;

มลํ วณฺณสฺส โกสชฺชํ,

ปมาโท รกฺขโต มลํฯ

[165]

หีนานํ คจฺฉเต วิตฺตํ,

วีรานํ สนฺตกตฺตนํ;

วทนฺติ จ หีนา ชนา,

ปุพฺพ-กมฺมปฺปธานกาฯ

[166]

วทนฺติ เจวํธีรา,

วายมิํสุ สพฺพกมฺเม;

น เจ สิชฺฌติ ตํ กมฺมํ,

อ-ผลํ เอว โก โทโสฯ

[167]

นีจํ กุลํ นิปญฺญํ วา,

นิรูปํ นิพลํ สมํ;

อิมํ กาลํ ฉุตฺตกาลํ,

ธนเมว วิเสสกํฯ

ปกิณฺณกกณฺโฑ นิฏฺฐิโตฯ

ปณฺฑิโต สุชโน กณฺโฑ,

ทุชฺชโน มิตฺต-อิตฺถิ จ;

ราชา ปกิณฺณโก จาติ,

สตฺต-กณฺฑ-วิภูสิตํฯ

วิสุทฺธา จาร-เถเรน,

วิสุทฺธาราม-วาสินา;

สพฺพ-กุลานมตฺถาย,

วิโสธิตํ ปถกฺขเยฯ