กมฺเม ชนียติ, ชนียนฺติฯ ชายตุฯ ชาเยยฺยฯ อชายิ, อชนิฯ ชายิสฺสติ, ชนิสฺสติฯ อชายิสฺส, อชนิสฺส อิจฺจาทิฯ

ทิวาทิคโณฯ

สฺวาทิคณ

สุ สวเณ, ปุเร วิย วิภตฺตุปฺปตฺติฯ

[512] สฺวาทิโต ณุณาอุณา จฯ

สุอิจฺเจวมาทิโต ธาตุคณโต ณุ ณาอุณาอิจฺเจเต ปจฺจยา โหนฺติ กตฺตริ วิหิเตสุ วิภตฺติปฺปจฺจเยสุฯ ‘‘อญฺเญสุ จา’’ติ เอตฺถ จคฺคหเณน ณุปฺปจฺจยสฺส วุทฺธิฯ ตตฺเถวานุวตฺติตวาคฺคหเณน สฺวาทีนํ ณุณาทีสุ น วุทฺธิฯ

ธมฺมํ สุโณติ, สรโลปาทิ, สุณนฺติฯ สุโณสิ, สุโณถฯ สุโณมิ, สุโณมฯ ณาปจฺจเย สุณาติ, สุณนฺติฯ สุณาสิ, ‘‘กฺวจิ ธาตู’’ติอาทินา รสฺสตฺตํ, สุณสิ, สุณาถ, สุณถฯ สุณามิ, สุณามฯ

กมฺเม ยปฺปจฺจเย ‘‘กฺวจิ ธาตู’’ติอาทินา ทีโฆ, สูยเต, สูยนฺเตฯ สูยติ, สูยนฺติฯ ทฺวิตฺเต รสฺสตฺตํ, สุยฺยติ, สุยฺยนฺติฯ สูยฺยติ, สูยฺยนฺติ วาฯ

สุโณตุ, สุณนฺตุฯ สุโณหิ, สุโณถฯ สุโณมิ, สุโณมฯ สุณาตุ, สุณนฺตุฯ สุณ, สุณาหิ, สุณาถฯ สุณามิ, สุณามฯ

สุณตํ, สุณนฺตํ ฯ สุณสฺสุ, สุณวฺโหฯ สุเณ, สุณามเสฯ กมฺเม สูยตํ, สูยนฺตํฯ สูยตุ, สูยนฺตุฯ

สุเณ, สุเณยฺย, สุเณยฺยุํฯ สุเณยฺยาสิ, สุเณยฺยาถฯ สุเณยฺยามิ, สุเณยฺยามฯ สุเณถ, สุเณรํฯ สุเณโถ, สุเณยฺยาวฺโหฯ สุเณยฺยํ, สุเณยฺยามฺเหฯ สูเยถ, สูเยยฺยฯ

อสุณิ, สุณิ, อสุณิํสุ, สุณิํสุฯ อสุณิ, อสุณิตฺถฯ อสุณิํ, สุณิํ, อสุณิมฺห, สุณิมฺหฯ อสุณิตฺถ, สุณิตฺถฯ ณาปจฺจยโลโป, วุทฺธิ, สสฺส ทฺวิภาโว, สาคโม, อสฺโสสิ, อสฺโสสิํสุ, ปจฺจสฺโสสุํฯ อสฺโสสิ, อสฺโสสิตฺถฯ อสฺโสสิํ, อสฺโสสิมฺห, อสฺโสสิมฺหา วา, อสฺโสสิตฺถฯ อสูยิตฺถ, อสฺสูยิฯ

สรโลปาทิ, สุณิสฺสติ, สุณิสฺสนฺติฯ สุณิสฺสสิ, สุณิสฺสถฯ สุณิสฺสามิ, สุณิสฺสามฯ สุณิสฺสเต, สุณิสฺสนฺเตฯ สุณิสฺสเส, สุณิสฺสวฺเหฯ สุณิสฺสํ, สุณิสฺสามฺเหฯ ณาปจฺจยโลโป, วุทฺธิ, โสสฺสติ, โสสฺสนฺติฯ โสสฺสสิ, โสสฺสถฯ โสสฺสามิ, โสสฺสามฯ โสสฺสเตฯ สูยิสฺสเต, สูยิสฺสติฯ อสุณิสฺสฯ อสูยิสฺส อิจฺจาทิฯ

หิ คติมฺหิ, ปปุพฺโพ ณาปจฺจโย, ปหิณาติ, ปหิณติ วา, ปหิณนฺติฯ ปหิณาตุ, ปหิณนฺตุฯ ปหิเณยฺยฯ ปหิณิ, ทูตํ ปาเหสิฯ ปหิณิสฺสติฯ ปหิณิสฺส อิจฺจาทิฯ

วุ สํวรเณ, อาวุณาติ, อาวุณนฺติ อิจฺจาทิฯ

มิ ปกฺเขเป, ‘‘กฺวจิ ธาตู’’ติอาทินา ณสฺส นตฺตํ, มิโนติ, มินนฺติ อิจฺจาทิฯ

อป ปาปุณเน, ปปุพฺโพ สรโลเป ‘‘ทีฆ’’นฺติ ทีโฆ, อุณาปจฺจโย, สมฺปตฺติํ ปาปุณาติ, ปาปุณนฺติฯ ปาปุณาสิ, ปาปุณาถฯ ปาปุณามิ, ปาปุณามฯ

กมฺเม ปาปียติ, ปาปียนฺติฯ ตถา ปาปุณาตุฯ ปาปียตุฯ ปาปุเณ, ปาปุเณยฺยฯ ปาปีเยยฺยฯ ปาปุณิ, ปาปุณิํสุฯ ปาปียิฯ ปาปุณิสฺสติฯ ปาปียิสฺสติฯ ปาปุณิสฺสฯ ปาปียิสฺส อิจฺจาทิฯ

สก สตฺติมฺหิ, ทฺวิภาโว, สกฺกุณาติ, สกฺกุณนฺติฯ ภาเว ‘‘ปุพฺพรูปญฺจา’’ติ ปุพฺพรูปตฺตํ, สกฺกเต ตยา, สกฺกติ วา, สกฺกุณาตุฯ สกฺกุเณยฺยฯ ‘‘กฺวจิ ธาตู’’ติอาทินา สกนฺตสฺส ขาเทโส อชฺชตนาทิมฺหิ, อสกฺขิ, สกฺขิ, อสกฺขิํสุ, สกฺขิํสุฯ สกฺขิสฺสติ, สกฺขิสฺสนฺติฯ อสกฺขิสฺส, อสกฺขิสฺสํสุ อิจฺจาทิฯ

สฺวาทิคโณฯ

กิยาทิคณ

กี ทพฺพวินิมเย, วิปุพฺโพ ทฺวิตฺตํ, ปุเร วิย วิภตฺตุปฺปตฺติฯ

[513] กิยาทิโต นาฯ

กีอิจฺเจว มาทิโต ธาตุคณโต นาปจฺจโย โหติ กตฺตริฯ นาปรตฺตา น วุทฺธิ, ‘‘กฺวจิ ธาตู’’ติอาทินา กิยาทีนํ นามฺหิ รสฺสตฺตํ, กีโต นาปจฺจยนการสฺส ณตฺตญฺจฯ

ภณฺฑํ วิกฺกิณาติ, วิกฺกิณนฺติฯ วิกฺกียติ, วิกฺกียนฺติฯ วิกฺกิณาตุ, วิกฺกิณนฺตุฯ วิกฺกียตุ, วิกฺกียนฺตุฯ