เมนู

ปญฺญตฺตีติ นานปฺปการโต ปวตฺตินิวารเณน อกุสลานํ ธมฺมานํ ญตฺติ มารณํ ปญฺญตฺติฯ อถ วา ธมฺมํ สุณนฺตานํ ธมฺมเทสนาย จิตฺเต อเนกวิเธน โสมนสฺสุปฺปาทนํฯ อติขิณพุทฺธีนํ อเนกวิเธน ญาณติขิณกรณญฺจ ปญฺญตฺติ นาม, ตถา โสตูนํ จิตฺตโตสเนน จิตฺตนิสาเนน จ ปญฺญาปนํ ปญฺญตฺตีติ ทฏฺฐพฺพํฯ

อิติ ภูวาทิคเณ วคฺคนฺตธาตุรูปานิ

สมตฺตานิฯ

ฏการนฺตธาตุ

อิทานิ ฏวคฺคนฺตธาตุรูปานิ วุจฺจนฺเต –

โสฏุ คพฺเพฯ คพฺพํ ทพฺพนํฯ โสฏติฯ

โยฏุ สมฺพนฺเธฯ โยฏติฯ

เมฏุ มิเลฏุ อุมฺมาเทฯ เมฏติฯ มิเลฏติฯ

กฏ วสฺสาวรเณสุฯ กฏติฯ

สฏ ปริภาสเนฯ สฏติฯ

ลฏ พาลฺเย จฯ ปุพฺพาเปกฺขาย กาโรฯ ลฏติฯ ลาโฏฯ

สฏ รุชาวิสรณคตฺยาวสาเนสุฯ รุชา ปีฬาฯ วิสรณํ วิปฺผรณํฯ คตฺยาวสานํ คติยา อวสานํ โอสานํ อภาวกรณํ, นิสีทนนฺติ วุตฺตํ โหติฯ สฏติฯ สาโฏ วุจฺจติ สาฏโกฯ

วฏ เวธเนฯ วฏติฯ วโฏฯ วาโฏฯ

ขิฏ อุตฺตาสเนฯ เขฏติ, อาเขฏโก, เขโฏ, อุกฺเขฏิโต, สมุกฺเขฏิโตฯ

สิฏ อนาทเรฯ เสฏติฯ

ชฏ ฆฏ สงฺฆาเตฯ ชฏติฯ ชฏา, ชฏิโล, ชฏีฯ อนฺโตชฏา พหิชฏา, ชฏาย ชฏิตา ปชาฯ การิเต ‘‘โส อิมํ วิชฏเย ชฏํฯ อรหตฺตมคฺคกฺขเณ วิชเฏติ นามา’’ติ ปโยโคฯ

ภฏ ภตฺติยํฯ ภฏติฯ ภโฏฯ เวตนํ ภฏโก ยถาฯ

ตฏ อุสฺสเยฯ อุสฺสโย อาโรโห อุพฺเพโธฯ ตฏติฯ ตโฏ, คิริตโฏ, นทีตโฏ, ตฏี, ตฏํฯ

ขฏ กํเสฯ ขฏติฯ ขโฏฯ

นฏ นติยํฯ นฏติฯ นโฏ, นาฏกํฯ

ปิฏ สทฺทสงฺฆาเฏสุฯ เปฏติฯ เปฏโก, ปิฏกํฯ ปิฏกสทฺโท ‘‘มา ปิฏกสมฺปทาเนนา’’ติอาทีสุ ปริยตฺติยํ ทิสฺสติฯ ‘‘อถ ปุริโส อาคจฺเฉยฺย กุทาลปิฏกํ อาทายา’’ติอาทีสุ ยสฺมิํ กิสฺมิญฺจิ ภาชเนฯ

หฏ ทิตฺติยํฯ หฏติฯ หาฏกํ, หฏกํฯ ยํ ชาตรูปํ หฏกนฺติ วุจฺจติฯ

สฏ อวยเวฯ สฏติฯ

ลุฏ วิโลฐเนฯ โลฏติฯ

จิฏ เปสเนฯ เจฏติฯ เจฏโกฯ

วิฏ สทฺเทฯ เวฏติฯ เวฏโกฯ

อฏ ปฏ อิฏ กิฏ กฏ คติยํฯ อฏติฯ ปฏติฯ เอฏติฯ เกฏติฯ กฏติฯ ปโฏ อิจฺเจว นามิกปทํ ทิฏฺฐํฯ

ปฏติ ชิณฺณภาวํ คจฺฉตีติ ปโฏฯ ปโฏติ วตฺถํฯ วตฺถสฺส หิ อเนกานิ นามานิ –

ปโฏ โจโฬ สาฏโก จ, วาโส วสนมํสุกํ;

ทุสฺสมจฺฉาทนํ วตฺถํ, เจลํ วสนิ อมฺพรํฯ

มุฏ ปมทฺทเนฯ โมฏติฯ

จุฏ อปฺปีภาเวฯ โจฏติฯ

วฏิ วิภาชเนฯ วฏติฯ วณฺโฏฯ

รุฏิ ลุฏิ เถยฺเยฯ รุณฺฏติฯ ลุณฺฏติฯ รุณฺฏโกฯ ลุณฺฏโกฯ

ผุฏ วิสรเณ โผฏติฯ โผโฏฯ

เจฏ เจฏายํฯ เจฏติฯ เจฏโกฯ

ฆุฏ ปริวตฺตเนฯ โฆฏติฯ

รุฏ ลุฏ ปฏิฆาเตฯ โรฏติฯ โลฏติฯ

ฆฏ เจตายํฯ ฆฏติฯ ฆโฏฯ ฆโฏ วุจฺจติ กุมฺโภฯ อิมานิ ตทภิธานานิ –

ฆโฏ กุมฺโภ ฆฏี กุมฺภี, ตุณฺฑิกิโร ตุ อุกฺขลี;

มหนฺตภาชนํ จาฏิ, อติขุทฺทํ กุฏฺฏํ ภเว;

จฏ ภฏ ปริภาสเน เทฏ จฯ จฏติฯ ภฏติฯ เทฏติฯ

กุฏ โกฏิลฺเลฯ กุฏติฯ ปฏิกุฏติฯ

ปุฏ สํกิเลสเนฯ ปุฏติฯ

จุฏ ฉุฏ กุฏ เฉทเนฯ จุฏติฯ ฉุฏติฯ กุฏติฯ

ผุฏ วิกสเนฯ ผุฏติฯ

มุฏ อคฺคิสทฺทปกฺเขปมทฺทเนสุฯ มุฏติฯ

ตุฏ กลหกมฺมนิฯ ตุฏติฯ

ฆุฏ ปฏิฆาเตฯ ฆุฏติฯ โฆฏโกฯ

ฏการนฺตธาตุรูปานิฯ

ฐการนฺตธาตุ

ฐา คตินิวตฺติยํฯ คตินิวตฺติ อุปฺปชฺชมานสฺส คมนสฺสุปจฺเฉโทฯ ฐาติ, ฐนฺติฯ ติฏฺฐติฯ ปติฏฺฐาติฯ อธิฏฺฐาติฯ อธิฏฺเฐติฯ สณฺฐาติฯ สณฺฐหติฯ อธิฏฺฐหติฯ อุปฏฺฐหติฯ ฐาตุฯ ติฏฺฐตุฯ ติฏฺเฐยฺยฯ อฏฺฐ, อฏฺฐุฯ อฏฺฐา, อฏฺฐู, อฏฺฐาสิ, อฏฺฐํสุฯ ยาวสฺส กาโย ฐสฺสติฯ ติฏฺฐิสฺสติฯ อุปสฺสุติ ติฏฺฐิสฺสถฯ อฏฺฐิสฺสา, อฏฺฐิสฺสํสุฯ อติฏฺฐิสฺสา, อติฏฺฐิสฺสํสุฯ ฐาตุํ, อุปฏฺฐาตุํฯ อุปฏฺฐหิตุํฯ อธิฏฺฐาตุํฯ อธิฏฺฐหิตุํฯ ฐตฺวา, อธิฏฺฐิตฺวาฯ อุปฏฺฐหิตฺวา, อธิฏฺฐหิตฺวาฯ ฐานํ, ฐิติ, สณฺฐิติ, อวฏฺฐิติฯ สณฺฐานํ, ปฏฺฐานํฯ อุปฏฺฐาโก, ฐิโตฯ ปพฺพตฏฺโฐ ภูมฏฺโฐฯ อุปฏฺฐหํ อิจฺจาทีนิฯ

ตตฺถ ฐานสทฺโท อิสฺสริยฐิติขณการเณสุ ทิสฺสติฯ ‘‘กิํ ปนายสฺมา เทวานมินฺโท กมฺมํ กตฺวา อิมํ ฐานํ ปตฺโต’’ติอาทีสุ หิ อิสฺสริเย ทิสฺสติฯ ‘‘ฐานกุสโล โหติ อกฺขณเวธี’’ติอาทีสุ ฐิติยํฯ ‘‘ฐานโสเปตํ ตถาคตํ ปฏิภาตี’’ติอาทีสุ ขเณฯ ‘‘ฐานญฺจ ฐานโส ญตฺวา อฏฺฐานญฺจ อฏฺฐานโส’’ติอาทีสุ การเณฯ การณญฺหิ ยสฺมา ตตฺถ ผลํ ติฏฺฐติ ตทายตฺตวุตฺติภาเวน, ตสฺมา ฐานนฺติ วุจฺจติฯ

อิสฺสริเย ฐิติยญฺจ, ขณสฺมิมฺปิ จ การเณ;

จตูสฺวตฺเถสุ เอเตสุ, ฐานสทฺโท ปวตฺตตีติฯ

เฐ สทฺทสงฺกาเตสุฯ ฐียติฯ

เฐ เวฐเนฯ ฐายติฯ