จุราที เอตฺตกา ทิฏฺฐา, ธาตโว เม ยถาพลํ;
สุตฺเตสฺวญฺเญปิ เปกฺขิตฺวา, คณฺหวฺโห อตฺถยุตฺติโตฯ
จุรปมุขคโณ เม สาสนตฺถํ ปวุตฺโต,
สุปจุรหิตกาโม ตมฺปิ สิกฺเขยฺย ธีโร;
สุปจุรนยปาเฐ สตฺถุโน ตญฺหิ สิกฺขํ,
ปิยุสมิว มนุญฺญํ อตฺถสารํ ลเภถฯ
อิติ นวงฺเค สาฏฺฐกเถ ปิฏกตฺตเย พฺยปฺปถคตีสุ วิญฺญูนํ
โกสลฺลตฺถาย กเต สทฺทนีติปฺปกรเณ
จุราทิคณปริทีปโน อฏฺฐารสโม ปริจฺเฉโทฯ
19. สพฺพคณวินิจฺฉย
อิโต ปรํ ปวกฺขามิ, สพฺพคณวินิจฺฉยํ;
โสตูนํ ปฏุภาวตฺถํ, ปรเม ปิฏกตฺตเยฯ
ปจฺจยาทิวิภาเคหิ, นเยหิ วิวิเธหิ ตํ;
สุขคฺคาหาย โสตูนํ, สุณาถ มม ภาสโตฯ
ตตฺถ ปฐโม ภูวาทิคโณ, ทุติโย รุธาทิคโณ, ตติโย ทิวาทิคโณ, จตุตฺโถ สฺวาทิคุโณ, ปญฺจโม กิยาทิคโณ, ฉฏฺโฐ คหาทิคโณ, สตฺตโม ตนาทิคโณ, อฏฺฐโม จุราทิคโณ, อิมสฺมิํ ภควโต ปาวจเน อฏฺฐวิธา ธาตุคณา ภวนฺติฯ เอเตสุ วิกรณปจฺจยวเสน –
ภูวาทิโต อกาโร จ, สานุสาโร รุธาทิโต;
อกาโร เจวิวณฺโณ จ, เอกาโรการเมว จฯ
ยปจฺจโย ทิวาทิมฺหา, ณุ ณา อุณา สุวาทิโต;
กฺยาทิโต ปน นาเยว, ปฺปณฺหา ปน คหาทิโตฯ