ฐการนฺตธาตุ สุฐ อาลสิเยฯ โสเฐติ, โสฐยติฯ สุฐิ โสสเนฯ สุณฺเฐติ, สุณฺฐยติฯ สฐ สิลาฆายํฯ สเฐติ, สฐยติฯ สฐ อสมฺมาภาสเนฯ สเฐติฯ สฐยติ, สโฐฯ เอตฺถ สโฐติ เกราฏิโกฯ สฐยตีติ สโฐ, น สมฺมา ภาสตีติ อตฺโถฯ สฐ เกตเวฯ รูปํ ตาทิสเมวฯ ‘‘สุทสฺสํ วชฺชมญฺเญสํ, อตฺตโน ปน ทุทฺทสํ…เป.… อตฺตโน ปน ฉาเทติ, กลิํว กิตวาสโฐ’’ติฯ เอตฺถ สากุณิโก ‘‘กิตวา’’ติ วุตฺโตฯ ตสฺส อิทํ เกตวํ, ตสฺมิํ เกตเว อยํ ธาตุ วตฺตตีติ อตฺโถฯ กฐิ โสเกฯ กณฺเฐติ, กณฺฐยติฯ ฐการนฺตธาตุรูปานิฯ ฑการนฺตธาตุ ปฏิ ปริหาเสฯ ปณฺเฑติ, ปณฺฑยติฯ อุปฺปณฺเฑติ, อุปฺปณฺฑยติฯ มนุสฺสานํ นํ ภิกฺขุนิํ อุปฺปณฺฑิํสุฯ ลฑิ อุกฺเขเปฯ ลณฺเฑติ, ลณฺฑยติฯ ขฑิ กฑิ เฉเทฯ ขณฺเฑติ, ขณฺฑยติฯ กณฺเฑติ, กณฺฑยติฯ ขณฺโฑ, กณฺโฑฯ |