[117] ‘‘ทฺวินฺนํ , ภิกฺขเว, อาสวา วฑฺฒนฺติฯ กตเมสํ ทฺวินฺนํ? โย จ อวินเย วินยสญฺญี, โย จ วินเย อวินยสญฺญีฯ อิเมสํ โข, ภิกฺขเว, ทฺวินฺนํ อาสวา วฑฺฒนฺตี’’ติฯ

[118] ‘‘ทฺวินฺนํ, ภิกฺขเว, อาสวา น วฑฺฒนฺติฯ กตเมสํ ทฺวินฺนํ? โย จ อวินเย อวินยสญฺญี, โย จ วินเย วินยสญฺญีฯ อิเมสํ โข, ภิกฺขเว, ทฺวินฺนํ อาสวา น วฑฺฒนฺตี’’ติฯ

พาลวคฺโค ปญฺจโมฯ

ทุติโย ปณฺณาสโก สมตฺโตฯ

3. ตติยปณฺณาสกํ

(11) 1. อาสาทุปฺปชหวคฺโค

[119] ‘‘ทฺเวมา , ภิกฺขเว, อาสา ทุปฺปชหาฯ กตมา ทฺเว? ลาภาสา จ ชีวิตาสา จฯ อิมา โข, ภิกฺขเว, ทฺเว อาสา ทุปฺปชหา’’ติฯ

[120] ‘‘ทฺเวเม , ภิกฺขเว, ปุคฺคลา ทุลฺลภา โลกสฺมิํฯ กตเม ทฺเว ? โย จ ปุพฺพการี, โย จ กตญฺญู กตเวทีฯ อิเม โข, ภิกฺขเว, ทฺเว ปุคฺคลา ทุลฺลภา โลกสฺมิ’’นฺติฯ

[121] ‘‘ทฺเวเม, ภิกฺขเว, ปุคฺคลา ทุลฺลภา โลกสฺมิํฯ กตเม ทฺเว? ติตฺโต จ ตปฺเปตา จฯ อิเม โข, ภิกฺขเว, ทฺเว ปุคฺคลา ทุลฺลภา โลกสฺมิ’’นฺติฯ

[122] ‘‘ทฺเวเม, ภิกฺขเว, ปุคฺคลา ทุตฺตปฺปยาฯ กตเม ทฺเว? โย จ ลทฺธํ ลทฺธํ นิกฺขิปติ, โย จ ลทฺธํ ลทฺธํ วิสฺสชฺเชติฯ อิเม โข, ภิกฺขเว, ทฺเว ปุคฺคลา ทุตฺตปฺปยา’’ติฯ

[123] ‘‘ทฺเวเม, ภิกฺขเว, ปุคฺคลา สุตปฺปยาฯ กตเม ทฺเว? โย จ ลทฺธํ ลทฺธํ น นิกฺขิปติ, โย จ ลทฺธํ ลทฺธํ น วิสฺสชฺเชติฯ อิเม โข, ภิกฺขเว, ทฺเว ปุคฺคลา สุตปฺปยา’’ติฯ

[124] ‘‘ทฺเวเม, ภิกฺขเว, ปจฺจยา ราคสฺส อุปฺปาทายฯ กตเม ทฺเว? สุภนิมิตฺตญฺจ อโยนิโส จ มนสิกาโรฯ อิเม โข, ภิกฺขเว, ทฺเว ปจฺจยา ราคสฺส อุปฺปาทายา’’ติฯ

[125] ‘‘ทฺเวเม , ภิกฺขเว, ปจฺจยา โทสสฺส อุปฺปาทายฯ กตเม ทฺเว? ปฏิฆนิมิตฺตญฺจ อโยนิโส จ มนสิกาโรฯ อิเม โข, ภิกฺขเว, ทฺเว ปจฺจยา โทสสฺส อุปฺปาทายา’’ติฯ

[126] ‘‘ทฺเวเม, ภิกฺขเว, ปจฺจยา มิจฺฉาทิฏฺฐิยา อุปฺปาทายฯ กตเม ทฺเว? ปรโต จ โฆโส อโยนิโส จ มนสิกาโรฯ อิเม โข, ภิกฺขเว, ทฺเว ปจฺจยา มิจฺฉาทิฏฺฐิยา อุปฺปาทายา’’ติฯ