เมนู

ตํ รกฺขสิํ สปริสํ, ปริกฺขิปิ สมนฺตโต;

อิทํ อิเมหิ อุทฺธนฺติ, มนฺตฺวา ภีตา ปลายิสาฯ

[51]

ตสฺส เทสสฺส อารกฺขํ, ฐเปตฺวาน สมนฺตโต;

ตสฺมิํ สมาคเม เถโร, พฺรหฺมชาลมเทสยิฯ

[52]

สรเณสุ จ สีเลสุ, อฏฺฐํสุ พหโว ชนา;

สฏฺฐิยา ตุ สหสฺสานํ, ธมฺมาภิสมโย อหุฯ

[53]

อฑฺฒุฑฺฒานิ สหสฺสานิ, ปพฺพชุํ กุลทารกา;

ปพฺพชิํสุ ทิยฑฺฒนฺตุ, สหสฺสํ กุลธีตโรฯ

[54]

ตโตปฺปภุติ สญฺชาเต, ราชเคเห กุมารเก;

นามํ กริํสุ ราชาโน, โสณุตฺตร สนามเกฯ

[55]

มหาชนสฺสาปิ ชินสฺส กฑฺฒนํ;

วิหาย ปตฺตํ อมตํ สุขมฺปิเต;

กริํสุ โลกสฺส หิตํ ตหิํ ตหิํ;

ภเวยฺย โย โลกหิเต ปมาทวาติฯ

สุชนปฺปสาท สํเวคตฺถาย กเต มหาวํเส

นานาเทสปสาโท นาม ทฺวาทสโม ปริจฺเฉโทฯ

เตรสม ปริจฺเฉท

มหินฺทาคมโน

[1]

มหามหินฺทตฺเถโร โส, ตทา ทฺวาทสวสฺสิโก;

อุปชฺฌาเยน อาณตฺโต, สงฺเฆน จ มหามตีฯ

[2]

ลํกาทีปํ ปสาเทตุํ,

กาลํ เปกฺขํ วิจินฺตยี;

‘‘วุฑฺโฒ มุฏสิโว ราชา,

ราชา โหตุ สุโต’’ อิติฯ

[3]

ตทนฺตเร ญาติคณํ, ทฏฺฐุํ กตฺวาน มานสํ;

อุปชฺฌายญฺจ สงฺฆญฺจ, วนฺทิตฺวา ปุจฺฉ ภูปติํฯ

[4]

อาทาย จตุโร เถเร, สงฺฆมิตฺตาย อตฺรชํ;

สุมนํ สามเณรญฺจ, ฉฬาภิญฺญํ มหิทฺธิกํฯ

[5]

ญาตีนํ สงฺคหํ กาตุํ, อคมา ทกฺขิณาคิริํ;

ตโต ตตฺถ จรนฺตสฺส, ฉมฺมาสา สมติกฺกมุํฯ

[6]

กเมน เวทิสคิริํ, นครํ มาตุเทวิยา;

สมฺปตฺวา มตรํ ปสฺสิ, เทวี ทิสฺวา ปิยํ สุตํฯ

[7]

โภชยิตฺวา สปริสํ, อตฺตนาเยว การิตํ;

วิหารํ เจติยคิริํ, เถรํ อาโรปยี สุภํฯ

[8]

อวนฺติรฏฺฐํ ภุญฺชนฺโต, ปิตรา ทินฺนมตฺตโน;

โส อโสก กุมาโร หิ, อุชฺเชนีคมนา ปุราฯ

[9]

เวทิเส นคเร วาสํ, อุปคนฺตฺวา ตหิํ สุภํ;

เทวินฺนาม ลภิตฺวาน, กุมาริํ เสฏฺฐิธีตรํฯ

[10]

สํวาสํ ตาย กปฺเปสิ, คพฺภํ คณฺหิย เตน สา;

อุชฺเชนิยํ กุมารํ ตํ, มหินฺทํ ชนยี สุภํฯ

[11]

วสฺสทฺวยมติกฺกมฺม, สงฺฆมิตฺตญฺจ ธีตรํ;

ตสฺมิํ กาเล วสติ สา, เวทิเส นคเร ตหิํฯ

[12]

เถโร ตตฺถ นิสีทิตฺวา, กาลญฺญู อิติ จินฺตยิ;

ปิตรา เม สมาณตฺตํ, อภิเสก มหุสฺสวํฯ

[13]

เทวานํปิยติสฺโส โส, มหาราชา’นุโภตุ จ;

วตฺถุตฺตยคุเณ จาปิ, สุตฺวา ชานาตุ ทูหโตฯ

[14]

อาโรหตุ มิสฺสนคํ, เชฏฺฐมาสสฺสุ’โปสเถ;

ตทเหว คมิสฺสาม, ลํกาทีปวรํ มยํฯ

[15]

มหินฺโท อุปสงฺกมฺม, มหินฺทตฺเถร มุตฺตมํ;

ยาหิ ลํกํ ปสาเทตุํ, สมฺพุทฺเธนา’สิ พฺยากโตฯ

[16]

มยมฺปิ ตตฺถุปตฺถมฺภา, ภวิสฺสามา’ติ อพฺรวิ;

เทวิยา ภคินี ธีตุ-ปุตฺโต ภณฺฑุก นามโกฯ

[17]

เถเรน เทวิยา ธมฺมํ, สุตฺวา เทสิตเมว ตุ;

อนาคามิผลํ ปตฺวา, วสิ เถรสฺส สนฺติเกฯ

[18]

ตตฺถ มาสํ วสิตฺวาน, เชฏฺฐมาสสฺสุ’ โปสเถ;

เถโร จตูหิ เถเรหิ, สุมเนนา’ถ ภณฺฑุนาฯ

[19]

สทฺธิํ เตน คหฏฺเฐน, น รโต ญาติเหตุนา;

ตสฺมา วิหารา อากาสํ, อุคฺคนฺตฺวา โส มหิทฺธิโกฯ

[20]

ขเณเนว อิธาคมฺม, รมฺเม มิสฺสก ปพฺพเต;

อฏฺฐาสิ วิลุกูฏมฺหิ, รุจิรมฺพตฺถเล วเรฯ

[21]

ลํกาปสาท คุเณน วิยากโต โส;

ลํกาหิตาย มุนินา สยิเตน อนฺเต;

ลํกาย สตฺถุสทิโส หิตเหตุ ตสฺสา;

ลํกามรูหิ มหิโต’ภินิสีทิ ตตฺตาติฯ

สุชนปฺปสาทสํเวคตฺถาย กเต มหาวํเส

มหินฺทาคมโน นาม

เตรสโม ปริจฺเฉโทฯ

จุทฺทสม ปริจฺเฉท

นครปฺปเวสโน

[1]

เทวานํปิยติสฺโส โส, ราชา สลิลกีฬิตํ;

ทตฺวา นครวาสีนํ, มิควํ กีฬิตุํ อคาฯ

[2]

จตฺตาลีสสหสฺเสหิ, นเรหิ ปริวาริโต;

ธาวนฺโต ปทสาเยว, อคมา มิสฺสกํ นคํฯ

[3]

เถเร ทสฺเสตุมิจฺฉนฺโต, เทโว ตสฺมิํ มหีธเร;

คุมฺภํภกฺขยมาโน’ว, อฏฺฐา โคกณฺณรูปวาฯ

[4]

ราชา ทิสฺวา ‘‘ปมตฺตํ ตํ, น ยุตฺตํ วิชฺฌิตุํ’’ อิติ;

ชิยา สทฺทมกาธาปิ, โคกณฺโณ ปพฺพตนฺตรํฯ

[5]