เวสาเข นรปติ ปุณฺณมายเมวํ;

เทวานํ ปิยวจโน ปคูฬนาโม;

ลํกายํ ปวีตตปีติ อุสฺสวายํ;

อตฺตานํ ชนสุขโท’ภิเสจยี โสติฯ

สุชนปฺปสาทสํเวคตฺถาย กเต มหาวํเส

เทวานํปิยติสฺสาภิเสโกนาม

เอกาทสโม ปริจฺเฉโทฯ

ทฺวาทสม ปริจฺเฉท

นานาเทสปสาโท

[1]

เถโร โมคฺคลิปุตฺโต โส, ชินสาสน โชตโก;

นิฏฺฐาเปตฺวาน สํคีติํ, เปกฺขมาโน อนาคตํฯ

[2]

สาสนสฺส ปติฏฺฐานํ, ปจฺจนฺเตสุ อเวกฺขิย;

เปเสสิ กตฺติเก มาเส, เตเต เถเร ตหิํ ตหิํฯ

[3]

เถรํ กสฺมีรคนฺธารํ, มชฺฌนฺติกมเปสยิ;

อเปสยี มหาเทว-ตฺเถรํ มหิสมณฺฑลํฯ

[4]

วนวาสิํ อเปสยิ, เถรํ รกฺขิตนามกํ;

ตถา’ปรนฺตกํ โยน-ธมฺมรกฺขิตนามกํฯ

[5]

มหารฏฺฐํ มหาธมฺม-รกฺขิตตฺเถร นามกํ;

มหารกฺขิต เถรํ ตํ, โยน โลกมเปสยิฯ

[6]

เปเสสิ มชฺฌิมํ เถรํ, หิมวนฺตปเทสกํ;

สุวณฺณภูมิํ เถเร ทฺเว, โสณมุตฺตร เมว จฯ

[7]

มหามหินฺทตฺเถรํ ตํ, เถร อิฏฺฏิยมุตฺติยํ;

สมฺพลํ ภทฺทสาลญฺจ, สเก สทฺธิวิหาริเกฯ

[8]

ลํกาทีเป มนุญฺญมฺหิ, มนุญฺญํ ชินสาสนํ;

ปติฏฺฐาเปถ ตุมฺเห’ติ, ปญฺจ เถเร อเปสยิฯ

[9]

ตทา กสฺมีรคนฺธาเร, ปกฺกํ สสฺสํ มหิทฺธิโก;

อรวาโล นาคราชา, วสฺสํ กรกสญฺญิตํฯ

[10]

วสฺสา เปตฺวา สมุทฺทสฺมิํ, สพฺพํ ขิปติทารุโณ;

ตตฺร มชฺฌนฺติกตฺเถโร, ขิปฺปํ คนฺตฺวา วิหายสาฯ

[11]

อรวาลทเหวาริ-ปิฏฺเฐ จงฺกมนาทิเก;

อกาสิ ทิสฺวา ตํนาคา, รุฏฺฐารญฺโญ นิเวทยุํฯ

[12]

นาคราชา’ถรุฏฺโฐ โส, วิวิธา ภิสิกา’กริ;

วาตา มหนฺตา วายนฺติ, เมโฆ คชฺชติ วสฺสติฯ

[13]

ผลนฺตฺย’สนิโย วิชฺชุ, นิจฺฉรนฺติ ตโต ตโต;

มหิรุหา ปพฺพตานํ, กูฏานิ ปปตนฺติ จฯ

[14]

วิรูปรูปา นาคา จ, ภิํสาเปนฺติ สมนฺตโต;

สยํ ธุปายติ ชลติ, อกฺโกสนฺโต อเนกธาฯ

[15]

สพฺพํ ตํ อิทฺธิยา เถโร, ปฏิพาหิย ภิํสนํ;

อโวจ นาคราชํ ตํ, ทสฺเสนฺโต พลมุตฺตมํฯ

[16]

สเทว โกปิ เจ โลโก, อาคนฺตฺวา ตาสเยยฺย มํ;

น เม ปฏิพโล อสฺส, ชเนตุํ ภยเภรวํฯ

[17]

สเจ’ปิ ตฺวํ มหิํ สพฺพํ, สสมุทฺทํ สปพฺพตํ;

อุกฺขิปิตฺวา มหานาค, ขิเปยฺยาสิ มโม’ปริฯ

[18]

เนว เม สกฺกุเณยฺยาสิ, ชเนตุํ ภยเภรวํ;

อญฺญทตฺถุ ตเว‘ว’สฺส, วิฆาโต อุรคาธิปฯ

[19]

ตํสุตฺวา นิมฺมทสฺส’สฺส, เถโร ธมฺมมเทสยิ;

ตโต สรณสีเลสุ, นาคราชา ปติฏฺฐหิฯ

[20]

ตเถว จตุราสีติ-สหสฺสานิ ภุชงฺคมา;

หิมวนฺเตว คนฺธพฺพา, ยกฺขา กุมฺภณฺฑกา พหูฯ

[21]

ปณฺฑโก นาม ยกฺโข ตุ, สทฺธิํหาริต ยกฺขิยา;

ปญฺจสเตหิ ปุตฺเตหิ, ผลํ ปาปุณิ อาทิกํฯ

[22]

‘‘มา’’ทานิ โกธํ ชนิยิตฺถ, อิโต อุทฺธํ ยถาปุเร;

สสฆาตญฺจ มา’กตฺถ, สุขกามาหิ ปาณิโนฯ

[23]

กโรถ เมตฺตํ สตฺเตสุ, วสนฺตุ มนุชา สุขํ;

อิติ เตนา’นุสิฏฺฐา เต, ตเถว ปฏิปชฺชิสุํฯ

[24]

ตโต รตนปลฺลงฺเก, เถรํ โส อุรคาธิโป;

นิสีทาปิย อฏฺฐาสิ, พีชมาโน ตทนฺติเกฯ

[25]

ตทา กสฺมีรคนฺธาร-วาสิโน มนุชา’คตา;

นาคราชสฺส ปูชตฺถํ, มนฺตฺวา เถรํ มหิทฺธิกํฯ

[26]

เถรเมวา’ภิ วาเทตฺวา, เอกมนฺตํ นิสีทิสุํ;

เตสํ ธมฺมมเทเสสิ, เถโร อาสิวิโสปมํฯ

[27]

อสีติยา สหสฺสานํ, ธมฺมาภิสมโย อหุ;

สตสหสฺส ปุริสา, ปพฺพชุํ เถรสนฺติเกฯ

[28]

ตโตปฺปภุปติ กสฺมิร-คนฺธารํ เต อิทานิปิ;

อาสุํ กาสาว ปชฺโชตา, วตฺถุตฺตยปรายนาฯ

[29]

คนฺตฺวา มหาเทวตฺเถโร, เทสํ มหิสมณฺฑลํ;

สุตฺตนฺตํ เทวทูตํ โส, กเถสิ ชนมชฺฌโคฯ

[30]

จตฺตาลีส สหสฺสานิ, ธมฺมจกฺขุํ วิโสธยุํ;

จตฺตาลีส สหสฺสานิ, ปพฺพชิํสุ ตทนฺติเกฯ

[31]

คนฺตฺวา’ถ รกฺขิตตฺเถโร, วนวาสิํ นเภ ฐิโต;

สํยุตฺตมนมตคฺคํ, กเถสิ ชนมชฺฌโคฯ

[32]

สฏฺฐิ นรสหสฺสานํ, ธมฺมาภิสมโย อหุ;

สตฺตติํส สหสฺสานิ, ปพฺพชิํสุ ตทนฺติเกฯ

[33]

วิหารานํ ปญฺจสตํ, ตสฺมิํเทเส ปติฏฺฐหิ;

ปติฏฺฐาเปสิ ตตฺเถวํ, เถโร โส ชินสาสนํฯ

[34]

คนฺตฺวา’ปรนฺตกํ เถโร, โยนโก ธมฺมรกฺขิโต;

อคฺคิกฺขนฺโธปมํ สุตฺตํ, กเถตฺวา ชนมชฺฌโคฯ

[35]

สตฺตติํส สหสฺสานิ, ปาเณ ตตฺถ สมาคเต;

ธมฺมามตมปาเยสิ, ธมฺมา ธมฺเมสุ โกวิโทฯ

[36]

ปุริสานญฺจ สหสฺสญฺจ, อิตฺถิโย จ ตโต’ธิกา;

ขตฺติยานํ กุลาเยว, นิกฺขมิตฺวาน ปพฺพชุํฯ

[37]

มหารฏฺฐมิสี คนฺตฺวา, โส มหาธมฺมรกฺขิโต;

มหานารทกสฺสปวฺหํ, ชาตกํ กถยี ตหิํฯ

[38]

มคฺคผลํ ปาปุณิํสุ, จตุราสีติ สหสฺสกา;

เตรสนฺตุ สหสฺสานิ, ปพฺพชิํสุ ตทนฺติเกฯ

[39]

คนฺตฺวาน โยนวิสยํ, โส มหาธมฺมรกฺขิโต อิสิ;

กาฬการาม สุตฺตนฺตํ, กเถสิ ชนมชฺฌโคฯ

[40]

ปาณสต สหสฺสานิ, สหสฺสานิ จ สตฺตติ;

มคฺคผลํ ปาปุณิํสุ, ทส สหสฺสานิ ปพฺพชุํฯ

[41]

คนฺตฺวา จตูหิ เถเรหิ, เทเสสิ มชฺฌิโม อิสิ;

หิมวนฺตปเทสสฺมิํ, ธมฺมจกฺกปวตฺตนํฯ

[42]

มคฺคผลปาปุณิํสุ, อสีติปาณ โกฏิโย;

วิสุํ เต ปญฺจรฏฺฐานิ, ปญฺจเถรา ปสาทยุํฯ

[43]

ปุริสสตสหสฺสานิ, เอเกกสฺเสว สนฺติเก;

ปพฺพชิํสุ ปสาเทน, สมฺมาสมฺพุทฺธ สาสเนฯ

[44]

สทฺธิํ อุตฺตรเถเรน, โสณตฺเถโร มหิทฺธิโก;

สุวณฺณภูมิํ อคมา, ตสฺมิํ ตุ สมเย ปนฯ

[45]

ชาเต ชาเต ราชเคเห, ทารเก รุทฺทรกฺขสี;

สมุทฺทโต นิกฺขมิตฺวา, ภกฺขิตฺวา ปน คจฺฉติฯ

[46]

ตสฺมิํ ขเณ ราชเคเห,

ชาโต โหติ กุมารโก;

เถเร มนุสฺสา ปสฺสิตฺวา,

รกฺขสานํ สหายกาฯ

[47]

อิติ จินฺติย มาเรตุํ, สา ยุวา อุปสงฺกมุํ;

‘‘กิเมตนฺติ’’จ ปุจฺฉิตฺวา, เถรํ เต เอว มาหุเตฯ

[48]

สมณา มยํ หิมวนฺตา, น รกฺขสิ สหายกา;

รกฺขสี สา สปริสา, นิกฺขนฺตา โหติ สาคราฯ

[49]

ตํ ทิสฺวาน มหาราวํ, วิรวิํสุ มหาชนา;

ทิคุเณ รกฺขเส เถโร, มาปยิตฺวา ภยานเกฯ

[50]

ตํ รกฺขสิํ สปริสํ, ปริกฺขิปิ สมนฺตโต;

อิทํ อิเมหิ อุทฺธนฺติ, มนฺตฺวา ภีตา ปลายิสาฯ

[51]

ตสฺส เทสสฺส อารกฺขํ, ฐเปตฺวาน สมนฺตโต;

ตสฺมิํ สมาคเม เถโร, พฺรหฺมชาลมเทสยิฯ

[52]

สรเณสุ จ สีเลสุ, อฏฺฐํสุ พหโว ชนา;

สฏฺฐิยา ตุ สหสฺสานํ, ธมฺมาภิสมโย อหุฯ

[53]

อฑฺฒุฑฺฒานิ สหสฺสานิ, ปพฺพชุํ กุลทารกา;

ปพฺพชิํสุ ทิยฑฺฒนฺตุ, สหสฺสํ กุลธีตโรฯ

[54]

ตโตปฺปภุติ สญฺชาเต, ราชเคเห กุมารเก;

นามํ กริํสุ ราชาโน, โสณุตฺตร สนามเกฯ

[55]

มหาชนสฺสาปิ ชินสฺส กฑฺฒนํ;

วิหาย ปตฺตํ อมตํ สุขมฺปิเต;

กริํสุ โลกสฺส หิตํ ตหิํ ตหิํ;

ภเวยฺย โย โลกหิเต ปมาทวาติฯ

สุชนปฺปสาท สํเวคตฺถาย กเต มหาวํเส

นานาเทสปสาโท นาม ทฺวาทสโม ปริจฺเฉโทฯ

เตรสม ปริจฺเฉท

มหินฺทาคมโน

[1]

มหามหินฺทตฺเถโร โส, ตทา ทฺวาทสวสฺสิโก;

อุปชฺฌาเยน อาณตฺโต, สงฺเฆน จ มหามตีฯ

[2]

ลํกาทีปํ ปสาเทตุํ,

กาลํ เปกฺขํ วิจินฺตยี;

‘‘วุฑฺโฒ มุฏสิโว ราชา,

ราชา โหตุ สุโต’’ อิติฯ

[3]