เทวานํปิยติสฺสาภิเสโก

[1]

ตสฺสจฺจเย ตสฺส สุโต, มุฏสิโว’ติ วิสฺสุโต;

สุวณฺณปาลิยา ปุตฺโต, ปตฺโต รชฺชมนากุลํฯ

[2]

มหาเมฆวนุยฺยานํ, นามนุคคุโณทิตํ;

ผลปุปฺผตรุเปตํ, โส ราชา การยิ สุภํฯ

[3]

อุยฺยานฐานคฺคหเณ, มหาเมโฆ อกาลโช;

ปาวสฺสิเตน อุยฺยานํ, มหาเมฆวนํ อหุฯ

[4]

สฏฺฐิวสฺสานิ มุฏสิโว, ราชา ราชฺชมการยิ;

อนุราเธ ปุรวเร, ลํกา ภุวทเน สุเภฯ

[5]

ตสฺส ปุตฺตา ทสา’เหสุํ, อญฺญมญฺญหิเตสิโน;

ทุเว ธีตา จา’นุกุลา, กุลานุจฺฉวิกา อหูฯ

[6]

เทวานํ ปิยติสฺโสติ, วิสฺสุโต ทุติโย สุโต;

เตสุ ภาตูสุ สพฺเพสุ, ปุญฺญาปญฺญาธิโก อหุฯ

[7]

เทวานํ ปิยติสฺโส โส, ราชา’สิ ปิตุอจฺจเย;

ตสฺสา’ภิเสเกน สมํ, พหูน’จฺฉริยาน’หุํฯ

[8]

ลํกาทีปมฺหิ สกเล, นิธโย รตนานิ จ;

อนฺโตฐิตานิ อุคฺคนฺตฺวา, ปถวีตลมารุหุํฯ

[9]

ลํกาทีปสมีปมฺหิ, ภินฺนนาวาคตานิ จ;

ตตฺรชาตานิ จ ถลํ, รตนานิ สมารุหุํฯ

[10]

ฉาตปพฺพตปาทมฺหิ, ติสฺโส จ เวฬุยฏฺฐิโย;

ชาตารถปโตเทน, สมานา ปริมาณโตฯ

[11]

ตาสุ เอกาลตายฏฺฐิ, รชตา’ภา ตหิํ ลตา;

สุวณฺณาวณฺณารุจิรา, ทิสฺสนฺเตตา มโนรมาฯ

[12]

เอกา กุสุมา ยฏฺฐีตุ, กุสุมานิ ตหิํ ปน;

นานานิ นานาวณฺณานิ, ทิสฺสนฺเต’ติ ผุฏานิ จฯ

[13]

เอกาสกุณยฏฺฐิตุ , ตหิํ ปกฺขิมิคา พหู;

นานา จ นานาวณฺณา จ, สชีวา วิย ทิสฺสเรฯ

[14]

ภยคชรถามลกา, วลยงฺคุลิเวฐกา;

กกุธผลาปากติกา, อิจฺเจตา อฏฺฐชาติโยฯ

[15]

มุตฺตาสมุทา อุคฺคนฺตฺวา, ตีเร วฏฺฏิ วิย ฐิตา;

เทวานํ ปิยติสฺสสฺส, สพฺพํ ปุญฺญวิชมฺภิตํฯ

[16]

อินฺทนีลํ เวฬุริยํ, โลหิตงฺกมณิธิ’เม;

รชตานิ ปเน’ตานิ, มุตฺตา ตา ตาวยฏฺฐิโยฯ

[17]

สตฺตหพฺภนฺตเรเยว, รญฺโญ สนฺติกมาหรุํ;

ตานิ ทิสฺวา ปตีโต โส, ราชา อิติ วิจินฺตยิฯ

[18]

รตนานิ อนคฺฆานิ, ธมฺมาโสโก อิมานิเม;

สหาโย’รหเตนา’ญฺโญ, ตสฺส ทสฺสํ อิมาน’โตฯ

[19]

เทวานํ ปิยติสฺโส จ, ธมฺมาโสโก จ เต อิเม;

ทฺเว อทิฏฺฐสหายาหิ, จิรปฺปภุติ ภูปติฯ

[20]

ภาคิเนยฺยํ มหาริฏฺฐํ, อมจฺจํ ปมุขํ ตโต;

ทิชํ อมจฺจํ คณตํ, ราชา เต จตุโร ชเนฯ

[21]

ทูโต กตฺวาน ปาเหสิ, พโลฆปริวาริเต;

คาหา เปตฺวา อนคฺฆานิ, รตนานิ อิมานิ โสฯ

[22]

มณิชาตี จ ติสฺโส ตา, ติสฺโส จ รถยฏฺฐิโย;

สงฺขญฺจ ทกฺขิณาวตฺตํ, มุตฺตา ชาตี จ อฏฺฐ ตาฯ

[23]

อารุยฺห ชมฺพุโกลมฺหิ, นาวํ สตฺตทิเนน เต;

สุเขน ติตฺถํ ลทฺธาน, สตฺตาเหน ตโต ปุนฯ

[24]

ปาฏลิปุตฺตํ คนฺตฺวาน, ธมฺมาโสกสฺส ราชิโน;

อทํสุ ปณฺณากาเรเต, ทิสฺวา ตานิ ปสีทิ โสฯ

[25]

รตนานิ’ทิสาเนตฺถ, นตฺถิ เม อิติ จินฺติย;

อทา เสนาปติฏฺฐานํ, ตุฏฺโฐ’ริฏฺฐสฺส ภูปติฯ

[26]

โปโรหิจฺจพฺราหฺมณสฺส, ทณฺฑนายตํ ปน;

อทาสิ ตสฺสา’มจฺจสฺส, เสฏฺฐิตฺตํ คณกสฺส ตุฯ

[27]

เตสํ อนปฺปเก โภเค, ทตฺวา วาสฆรานิ จ;

มหามจฺเจหิ มนฺเตนฺโต, ปสฺสิตฺวา ปฏิปาภตํฯ

[28]

วาลพีชนี มุณฺหิสํ, ขคฺคํ ฉตฺตญฺจ ปาทุกํ;

โมฬิํ วตํ สปามงฺคํ, ภิงฺการํ หริจนฺทนํฯ

[29]

อโธวิมํ วตฺถโกฏิํ, มหคฺฆํ หตฺถปุญฺฉนิํ;

นาคา’หฏํ อญฺชนญฺจ, อรุณาภญฺจ มตฺติกํฯ

[30]

อโนตตฺโตทกญฺเจว, คงฺคาสลิลเมว จ;

สงฺขญฺจ นนฺทิยาวฏฺฏํ, วฑฺฒมานํ กุมาริกํฯ

[31]

เหมโภชนกณฺฑญฺจ, สิวิกญฺจ มหารหํ;

หรีฏกํ อามลกํ, มหคฺฆํ อมโตสธํฯ

[32]

สุกาหฏานํ สาลีนํ, สฏฺฐิวาหสตานิ จ;

อภิเสโก ปกรณํ, ปริวารวิเสสิตํฯ

[33]

ทตฺวา กาเล ภหายสฺส, ปณฺณากาเร นริสฺสโร;

ทูเต ปาเหสิสทฺธมฺม-ปณฺณาการมิมมฺปิจฯ

[34]

อหํ พุทฺธญฺจ ธมฺมญฺจ, สงฺฆญฺจ สรณํ คโต;

อุปาสกตฺตํ เทเสสิํ, สกฺยปุตฺตสฺส สาสเนฯ

[35]

ตฺวมฺปิมานิ รตนานิ, อุตฺตมานิ นรุตฺตม;

จิตฺตํ ปสาทยิตฺวาน, สทฺธาย สรณํ วชฯ

[36]

‘‘กโรถ เม สหายสฺส, อภิเสกํ ปุโน’’ อิติ;

วตฺวา สหยา’มจฺเจเต, สกฺกริตฺวา จ เปสยิฯ

[37]

ปญฺจมาเส วสิตฺวาน, เต มจฺจา’ติวสกฺกตา;

เวสาขสุกฺขปกฺขาทิ-ทิเน ทูตา วินิคฺคตาฯ

[38]

ตามลิตฺติยมารุยฺห, นาวํ เตชมฺพุโกลเก;

โอรุยฺห กูปํ ปสฺสิํสุ, ปตฺวา ทฺวาทสิยํ อิธฯ

[39]

อทํสุ ปณฺณากาเร เต, ทูตา ลํกาทีปสฺสเต;

เตสํ มหนฺตํ สกฺการํ, ลํกาปติ อการยิฯ

[40]

เต มคฺคสิรมาสสฺส, อาทิจนฺโททเยชิเน;

อภิสิตฺตญฺจ ลํกินฺทํ, อมจฺจา สามิภตฺติโนฯ

[41]

ธมฺมาโสกสฺส วจนํ, วตฺวา สามิ หิเตรตา;

ปุโนปิ อภิสิญฺจิํสุ, ลํกาหิตสุเขรตํฯ

[42]

เวสาเข นรปติ ปุณฺณมายเมวํ;

เทวานํ ปิยวจโน ปคูฬนาโม;

ลํกายํ ปวีตตปีติ อุสฺสวายํ;

อตฺตานํ ชนสุขโท’ภิเสจยี โสติฯ

สุชนปฺปสาทสํเวคตฺถาย กเต มหาวํเส

เทวานํปิยติสฺสาภิเสโกนาม

เอกาทสโม ปริจฺเฉโทฯ

ทฺวาทสม ปริจฺเฉท

นานาเทสปสาโท

[1]

เถโร โมคฺคลิปุตฺโต โส, ชินสาสน โชตโก;

นิฏฺฐาเปตฺวาน สํคีติํ, เปกฺขมาโน อนาคตํฯ

[2]

สาสนสฺส ปติฏฺฐานํ, ปจฺจนฺเตสุ อเวกฺขิย;

เปเสสิ กตฺติเก มาเส, เตเต เถเร ตหิํ ตหิํฯ

[3]

เถรํ กสฺมีรคนฺธารํ, มชฺฌนฺติกมเปสยิ;

อเปสยี มหาเทว-ตฺเถรํ มหิสมณฺฑลํฯ

[4]

วนวาสิํ อเปสยิ, เถรํ รกฺขิตนามกํ;

ตถา’ปรนฺตกํ โยน-ธมฺมรกฺขิตนามกํฯ

[5]

มหารฏฺฐํ มหาธมฺม-รกฺขิตตฺเถร นามกํ;

มหารกฺขิต เถรํ ตํ, โยน โลกมเปสยิฯ

[6]

เปเสสิ มชฺฌิมํ เถรํ, หิมวนฺตปเทสกํ;

สุวณฺณภูมิํ เถเร ทฺเว, โสณมุตฺตร เมว จฯ

[7]

มหามหินฺทตฺเถรํ ตํ, เถร อิฏฺฏิยมุตฺติยํ;

สมฺพลํ ภทฺทสาลญฺจ, สเก สทฺธิวิหาริเกฯ

[8]