วิชยาคมนํ
[1]
วงฺเคสุ วงฺคนคเร, วงฺคราชา อหุ ปุเร;
กาลิงฺครญฺโญ ธีตา’สิ, มเหสี ตสฺส ราชิโนฯ
[2]
โส ราชา เทวิยา ตสฺสา, เอกํ อลภิ ธีตรํ;
เนมิตฺตาพฺยากรุํ ตสฺสา, สํวาสํ มคราชินาฯ
[3]
อตีว รูปินิํ อาสิ, อตีว กามคิทฺธินี;
เทเวน เทวิยา’จาปิ, ลชฺชายา’สิ ชคุจฺฉิตาฯ
[4]
เอกากินี สา นิกฺขมฺม, เสรีจารสุขตฺถินี;
สตฺเถน สห อญฺญาตา, อคา มคธคามินาฯ
[5]
ลาฬรฏฺเฐ อฏวิยา, สีโห สตฺถมภิทฺธวิ;
อญฺญตฺถ เสสา ธาวิํสุ, สีหคตทิสนฺตุสาฯ
[6]
คณฺหิตฺวา โคจรํ สีโห, คจฺฉํ ทิสฺวา ตมา’รโต;
รตฺโต อุปาคลาเลนฺโต, ลงฺคุลํ ปตฺตกณฺณโกฯ
[7]
สา ตํ ทิสฺวา สริตฺวาน, เนมิตฺตวจนํ สุตํ;
อภีตา ตสฺส องฺคานิ, รญฺชยนฺติ ปรามสิฯ
[8]
ตสฺสา ผสฺเสนา’ติ รตฺโต, ปิฏฺฐิํ อาโรปิยา’สุตํ;
สีโห สกํ คุหํ เนตฺวา, ตาย สํวาสมาจริฯ
[9]
เตน สํวาสมนฺวาย, กาเลน ยมเก ทุเว;
ปุตฺตญฺจ ธีตรญฺจาติ, ราชธีตา ชเนสิ สาฯ
[10]
ปุตฺตสฺส หตฺถปาทา’สุํ, สีหาการา ตโต อกา;
นาเมน สีหพาหุํ ตํ, ธีตรํ สีหสีวลิํฯ
[11]
ปุตฺโต โสฬสวสฺโส โส, มาตรํ ปุจฺฉิ สํสยํ;
ตุวํ ปิตา จ โน อมฺม, กสฺมา วิสทิสา อิติฯ
[12]
สา สพฺพมพฺรวี ตสฺส, กิํนยามา’ติ โส’พฺรวิ;
คุหํ ถเกติตาโต เต, ปาสาเณนาติ สา’พฺรวิฯ
[13]