เอวํ คามกโภชกา วิย ภุสํเตโช วิหีนา สทา;
อจฺจนฺตํ พฺยสนาติ สตฺตหทยา ราชาภิมานุชฺฌิตาฯ
[74]
นิจฺจํ อตฺตปรตฺถสิทฺธิวิธุราสงฺคา วิหีนาสยา;
สพฺเพ เต วิหริํสุ ภูมิปตโย จาริตฺตมคฺคาติคาฯ
สุชนปฺปสาทสํเวคตฺถาย กเต มหาวํเส
จตุราชจริยนิทฺเทโส นาม
เอกูนสฏฺฐิโม ปริจฺเฉโทฯ
สฏฺฐิม ปริจฺเฉท
กุมาโรทโย
[1]
โรหเณ นิวสิตฺถา’ว, ชยพาหุมหีปติ;
มิตฺตาวฺหา ราชินี เจว, ตทา กาลมกํสุ เตฯ
[2]
สิรีวลฺลภชายา’ถ, ชเนสิ สุคลา ทุเว;
มาณภรณกํ ปุตฺตํ, ปุตฺติํ ลีลาวติมฺปิ จฯ
[3]
มาณาภรณภูปาล-เทวี’ปิ รตนาวลี;
มิตฺตํ ปภาวติญฺจาปิ, อลภี ธีตโร ทุเวฯ
[4]
ปสฺสนฺตสฺส อุโภ ตาโย, ธีตโร วีรพาหุโน;
ตทา มหาทิปาทสฺส, เอวํ อาสิ วิตกฺกิตํฯ
[5]
โลกาภิสมฺมเต สพฺพ-ภูปาลนฺวยมุทฺธนิ;
วิสุทฺเธ โสมวํสมฺหิ, อภิชาตา มยํ ปนฯ
[6]
ปิหนียตราการา, สพฺพสตฺติสมุนฺนตา;
นานาวิชฺชาสุ นิปุณา, หตฺถิอสฺสาทิสุกฺขมาฯ
[7]
ตถา เปกากินา เว’เต, ตโย วิกฺกมพาหุนา;
ปราชยํ ปริภวํ, ปาปิตา พหุโส รเณฯ
[8]
สูนุโน สุสมตฺถสฺส, วิโสเธตุ มิมํ มลํ;
น ทิสฺสเต ปาตุภาโว, อโห โน อปฺปปุญฺญตาฯ
[9]
ชนวาทกิลิฏฺเฐน , ราชตฺเตนาปิ กิํ มม;
อิทานิ วิสยาสงฺคํ, หิตฺวา กลฺยาณกมฺมสุฯ
[10]
อปฺปมตฺตสฺส สตตํ, เนตพฺพา วาสรา’อิติ;
นิยฺยาเตตฺวา อมจฺจานํ, สพฺพํ รชฺชวิจารณํฯ
[11]
ตหิํ สตฺต’ฏฺฐมาสญฺหิ, วสํ รตฺติยเมกทา;
เทวราชฆเรเสยฺยํ, กปฺเปสิ สีลสํยโตฯ
[12]
ตโต ปจฺจูสกาลมฺหิ, เทวปุตฺตํ มหิทฺธิกํ;
วิจิตฺตวตฺถาภรณํ, คนฺธมาลาวิภูสิตํฯ
[13]
อุฬารตรรูเปน, เทโหภาเสน อตฺตโน;
โอภาเสนฺตํ อเสสา’สา, สูริยญฺจ น ภุคฺคตํฯ
[14]
วทนฺตํ สุปิเน เอวํ, อทกฺขิ ทรณีปติ;
ปสีทสฺสุ มหาภาค, ปิโตภว มหิปติฯ
[15]
ธญฺญลกฺขณสมฺปนฺโน, อิจฺฉิตตฺถสฺสสาธโก;
วินีโต โลกกุหร-พฺยาปิเตโช ปรกฺกโมฯ
[16]
อาณพลยโสกิตฺติ-ภาสุโร สคฺคุณากโร;
โลกสาสนสํวุทฺธิ-กโร ปุตฺตวโร ตวฯ
[17]
ลพฺภีสฺสเต มหาราช, น จิรสฺเสว สมฺปติ;
ปุตฺตทาราธิวุตฺถํ ตํ, ปุรํ ขิปฺปํ ปยาหีติฯ
[18]
ปพุชฺฌิตฺวาน สญฺชาต-ปีติเวโคถ รตฺติยา;
วิภาตาย ตโตโปงฺข-คามํ คญฺฉินรุตฺตโมฯ
[19]
ยถา ทิฏฺฐปฺปการนฺตํ, กเถสิ สุปินํ สุภํ;
มเหสี ปมุขานํ โส, อมจฺจานํ มหีปติฯ
[20]
สทฺธิํ มเหสิยา ตตฺถ, ปตฺเถนฺโต ปุตฺตมุตฺตมํ;
จินฺโตนฺโต ทานสีลาทิํ, สุภํ นานปฺปการกํฯ
[21]
อเถกทิวสํกาเล, ปจฺจูเส สุปิเน ปน;
สพฺพลกฺขณสมฺปนฺนํ, สพฺพเสตํ มโนหรํฯ
[22]
ทนฺตีโปตวรํ ทนฺตํ, กณฺเณ คณิยเปมโต;
ปวิสนฺตมิวตฺตานํ, เสยฺยาคพฺภํ มเหสิยาฯ
[23]
สมฺปสฺสิย ปพุชฺฌิตฺวา, อุฏฺฐาย สยนาวรา;
สญฺชาตปีติปาโมชฺช-เวคปีณิตมานโสฯ
[24]
ตายํ เวลายเมทาสุ-เสยฺยาคพฺภํ มเหสิยา;
ปวิสฺสสุปินํ ตสฺสา, ยถาทิฏฺฐํ ปกาสยีฯ
[25]
อหมฺปิ ตาทิสํ หตฺถิ-โปตกํ สยนํ มม;
ปทกฺขิณํ กริตฺวาน, ฐิตํ โสณฺเฑ สมาทิยฯ
[26]
อากฑฺฒิตฺวาน สยนํ, สมาโรปิย เปมโต;
อาลิงฺคิํ สุปินมฺหีติ, เทวี จาปิ ตมพฺรวีฯ
[27]
อุโภ เต อญฺญมญฺญสฺส, ทิฏฺฐเมวํ ปกาสิย;
อุฏฺฐาเปสุํ ปหฏฺฐาว, วีตนิทฺทารุณํ ตทาฯ
[28]
ตโต ปาโต อุปฏฺฐาตุ, มุปยาตํ ปุโรหิตํ;
เนมิตฺตเก จ ปุจฺฉิํสุ, สุนิตฺวา เต ปโมทิตาฯ
[29]
น จิรสฺเสว ปุตฺตสฺส, ธญฺญลกฺขณสาลิโน;
อุปฺปตฺติยา อวสฺสํ’ว, ภวํตพฺพนฺติ กิตฺตยุํฯ
[30]
ตํ สุณิตฺวา อมจฺจา จ, ตถา นครวาสิโน;
อวินฺทิํสุ ชนินฺโท จ, สพฺเพปีติ มหุสฺสวํฯ
[31]
ตโต ปฏฺฐาย โสตฺถานํ, ปตฺถยํ ปตฺถิโวภุสํ;
ภิกฺขุสงฺเฆน พหุโส, ภณาเปสิ ปริตฺตกํฯ
[32]
มณิมุตฺตาทิกํ จิตฺตํ, มหคฺฆมนุวาสรํ;
ปริจฺจชิ ทานมุเข, ยาจกานมเนกโสฯ
[33]
ปุโรหิตาทิวิปฺเปหิ, เวทเวทงฺควิญฺญูหิ;
วตฺตาเปสิ จ โหมาทิ-วิธานํ โสตฺถิ สมฺมตํฯ
[34]
สุวินฏฺเฐ วิหาเร จ, ธาตุคพฺเภ จ วาปิโย;
ชิณฺณา จ ปฏิสงฺขตฺตุํ, โยชยี ราชกปฺปิเกฯ
[35]
ทินํ นยนฺเต กลฺยาณ-กมฺเมเน’วํ นริสฺสเร;
น จิรํ สณฺฐหิ คพฺภ-วโร กุจฺฉิมฺหิ เทวิยาฯ
[36]
ตโตวคมฺม ตํ หฏฺฐ-ปหฏฺโฐ โส นริสฺสโร;
มหนฺตํ เทวิยา คพฺภ-ปริหารมทาปยิฯ
[37]
ปริปกฺกคพฺภา เทวี, กเมน ชนยีสุกํ;
สมเย ภทฺทนกฺขตฺต-มุหุตฺเตนภิลกฺขิเตฯ
[38]
สุปฺปสนฺนา อเสสา จ, ทิสาโย ตํขเณ อหุ;
สมีรเณ จ วาสิํสุ, สุคนฺธิมุทุสีตลาฯ
[39]
ทนฺตีนํ โกญฺจนาเทน, หยานํ เหสิเตน จ;
ราชงฺคณํ ตทาชาตํ, มหาโกลาหลา กูลํฯ
[40]
อจฺเฉราติสเย เอวํ, ปาตุภูเต อเนกธา;
ทิสฺวา ตํ วิมฺหยปฺปตฺโต, มาณภรณภูปติฯ
[41]
สุตฺวา นิชสฺส ปุตฺตสฺส, ตทา สญฺชาตสาสนํ;
อมเตนาภิสิตฺโตว, ปีติปุณฺณมโนรโถฯ
[42]
โมจาเปตฺวา ตทา การา-ฆเร พทฺเธ พหูชเน;
ทานํ อุฬารํ สมณ-พฺราหฺมณานํ ปทาปยิฯ
[43]
อมจฺจปมุขา จาปิ, ชนาปุรนิวาสิโน;
กทลีโตรณาทีหิ, ราชธานี มเนกธาฯ
[44]
อลงฺกริตฺวา สกลํ, สุมณฺฑิตปสาธิตา;
ฉณํ มหนฺตํ วตฺเตสุํ, กติปาหํ มโนรมํฯ
[45]
เวเท วุตฺตวิธาเนน, ชาตกมฺมาทิกํ วิธิํ;
สพฺพํ สมาปยิตฺวาน, กุมารสฺสา’วนีปติฯ
[46]
ปุโรหิตาทโย วิปฺเป, ตโต ลกฺขณปาฐเก;
อาณาเปตฺวาน สกฺการ-สมฺมานวิธิปุพฺพกํฯ
[47]
นิโยเชสิ กุมารสฺส, ลกฺขณานํ ปฏิคฺคเห;
สาธกํ สกลํ ตสฺส, ยตฺถปาทาทิลกฺขณํฯ
[48]
อุปธาริย มหามจฺจ-คณมชฺฌคตสฺส เต;
ราชิโน เทวิยา จาปิ, ปกาเสสุํ ปโมทิตาฯ
[49]
ลงฺกาทีปํ ฐเปตฺวาน, ชมฺพุทีปตลมฺปิ จ;
เอกจฺฉตฺตงฺกิตํ กตฺวา-นุโภตฺตุํ นิปุโณ อิติฯ
[50]
เต สนฺตปฺปิย โภเคหิ, ภิยฺโย ปุจฺฉิตฺถ สาทรํ;
สนฺทิสฺสมานํ ยํกิญฺจิ, อริฏฺฐํ อตฺถิ นตฺถี’ติฯ
[51]
ทีฆายุโก กุมาโร’ยํ, กิญฺจิ ปญฺญายเต วต;
ชนการิฏฺฐโยโค’ติ, เต มหีปติโน’พฺรวุํฯ
[52]
ตสฺสาริชนสมฺมทฺทิ-ปตาปภุชโย คโต;
โส ปรกฺกมพาหู’ติ, อนฺวตฺถนามมคฺคหีฯ
[53]
กณฺณเว ธมหญฺเจว, อนฺนุปาสนมงฺคลํ;
การาปิย วิธานญฺญู, ยถาวิธิมเสสโตฯ
[54]
รญฺโญ วิกฺกมพาหุสฺส, สปุตฺตุปฺปตฺติสาสนํ;
วตฺตุํ สทูเต เปเสสิ, ปุลตฺถินครํ ตทาฯ
[55]
เตหิโส ภาคิเนยฺยสฺส, มหาภาคตฺตนมฺปิ จ;
ชนการิฏฺฐโยคญฺจ, สุตฺวา วิกฺกมพาหุโสฯ
[56]
ธญฺญํ วิชยราชาทิ-ราชมาลาย นายกํ;
มณิํว ภาสุรํ มยฺหํ, ภาคิเนยฺยํ ชเนสิโสฯ
[57]
หานิ ยากาจิสตตํ, ยถา ตสฺส น เหสฺสติ;
ตถา มมนฺติเกเยว, กุมาโร เอตฺถ วฑฺฒตํฯ
[58]
อลทฺธํ ลภิตุํ ลาภํ, ลทฺธญฺจ ปริรกฺขิตุํ;
สพฺพถา น สมตฺโถยํ, ปุตฺโต คชพาหุ มมฯ
[59]
สูรภาวาทิยุตฺโต’ปิ, มหินฺทวฺหปโรสุโต;
นิหีโน มาตุโคตฺเตน, น รชฺชสฺส รโห มมฯ
[60]
ฐิตสฺส วิกฺกชาเตน, เนกโส สญฺจิเตน เม;
รชฺชสฺส ภาคิเนยฺโย’ว, กามํ ภาคี ภวิสฺสติฯ
[61]
อิติเปเสสิ ทูเต โส, อาเนตุํ ตํ กุมารกํ;
กุมารา ภรณํ ทตฺวา, เสสํ สารญฺจุปายนํฯ
[62]
สพฺพํ ทูตมุขา สุตฺวา, วีรพาหุ มหีปติ;
ตสฺเสตํ วจนํ ยุตฺตํ, วุตฺตํ เมหิต พุทฺธิยาฯ
[63]
ตถาปิ จ นิชาริฏฺฐ-ปฏิการตฺถมีทิสํ;
โอรสํ ปุตฺตรตนํ, เปเสตุํ นา’นุรูปกํฯ
[64]
กิญฺจ ตตฺถ กุมารมฺหิ, นีเต วิกฺกม พาหุโน;
ปกฺโข ลทฺธมหาวาห-พโล วิย หุตาสโนฯ
[65]
อจฺจุนฺนเตน มหตา, เตชสา สญฺชลิสฺสติ;
หานิเรว วตมฺหากํ, มหตี เหสฺสเต ภุสํฯ
[66]
อิติ หตฺเถ คตานํ โส, ทูตานํ ถนยํ สกํ;
อเปเสตฺวา วิสชฺเชสิ, ปสาทิย มเนน โสฯ
[67]
สปุตฺตทาเรหิ สมคฺควาสํ,
นราทินาโถ นิวสํ ตหิํโส;
ติพฺเพน ผุฏฺโฐ มหตาคเทน,
รชฺเชน สทฺธิํ วิชหิตฺถ เทสํฯ
สุชนปฺปสาทสํเว คตฺถาย กเต มหาวํเส
กุมาโรทโย นาม
สฏฺฐิโม ปริจฺเฉโทฯ
เอกสฏฺฐิม ปริจฺเฉท
สงฺขตฺถลิปุราภิคมโน
[1]
สุตฺวา ทฺเว ภาตโร อญฺเญ, เชฏฺฐสฺโส ปรติํสทา;
ขิปฺปํ สรฏฺฐา อาคมฺม, กาเรสุํ อนฺติมํ วิธิํฯ
[2]
อถ กิตฺติสิริเมโฆ, รฏฺฐํ เชฏฺฐสฺส ภาตุโน;
อตฺตาธีนํ กริตฺวาน, อามนฺติย กณิฏฺฐกํฯ
[3]
ทตฺวา รฏฺฐทฺวยํ อญฺญํ, วตฺถุํ ตตฺเถว อาทิสิ;
โส’ปิ เชฏฺฐสฺส ภาตุสฺส, วจนํ สมฺปฏิจฺฉิยฯ
[4]
สมาทาย กุมารญฺจ, เทวิญฺจ รตนาวลิํ;
ธีตโร ทฺเว จ คนฺตาน, มหา นามหุลํ ปุรํฯ
[5]
สมคฺคา นิวสํ ตตฺถ, กุมารสฺส สิขามหํ;
กาเรตฺวา ปริหาเรน, วฑฺเฒสิ มหตา สทาฯ
[6]
ตโต โส เทวิยา เชฏฺฐํ-ธีตรํ มิตฺตนามิกํ;
ทาตุกาโม สปุตฺตสฺส, สหามจฺเจหิ มนฺตยิฯ
[7]
กาลิงฺคนฺวยสมฺภูตา, ปาเยนขลุ ภูมิปา;
สามิภาวํ คตา อสฺมิํ, ลงฺกาทีปมฺหี ภูยโสฯ
[8]
กาลิงฺคโคตฺต สมฺภูต, คชพาหุสฺส ทาตเว;
คูฬรูเปน เทวี’ยํ, ยทิ เปเสยฺย ธีตรํฯ
[9]