เอวํ คามกโภชกา วิย ภุสํเตโช วิหีนา สทา;
อจฺจนฺตํ พฺยสนาติ สตฺตหทยา ราชาภิมานุชฺฌิตาฯ
[74]
นิจฺจํ อตฺตปรตฺถสิทฺธิวิธุราสงฺคา วิหีนาสยา;
สพฺเพ เต วิหริํสุ ภูมิปตโย จาริตฺตมคฺคาติคาฯ
สุชนปฺปสาทสํเวคตฺถาย กเต มหาวํเส
จตุราชจริยนิทฺเทโส นาม
เอกูนสฏฺฐิโม ปริจฺเฉโทฯ
สฏฺฐิม ปริจฺเฉท
กุมาโรทโย
[1]
โรหเณ นิวสิตฺถา’ว, ชยพาหุมหีปติ;
มิตฺตาวฺหา ราชินี เจว, ตทา กาลมกํสุ เตฯ
[2]
สิรีวลฺลภชายา’ถ, ชเนสิ สุคลา ทุเว;
มาณภรณกํ ปุตฺตํ, ปุตฺติํ ลีลาวติมฺปิ จฯ
[3]
มาณาภรณภูปาล-เทวี’ปิ รตนาวลี;
มิตฺตํ ปภาวติญฺจาปิ, อลภี ธีตโร ทุเวฯ
[4]
ปสฺสนฺตสฺส อุโภ ตาโย, ธีตโร วีรพาหุโน;
ตทา มหาทิปาทสฺส, เอวํ อาสิ วิตกฺกิตํฯ
[5]
โลกาภิสมฺมเต สพฺพ-ภูปาลนฺวยมุทฺธนิ;
วิสุทฺเธ โสมวํสมฺหิ, อภิชาตา มยํ ปนฯ
[6]
ปิหนียตราการา, สพฺพสตฺติสมุนฺนตา;
นานาวิชฺชาสุ นิปุณา, หตฺถิอสฺสาทิสุกฺขมาฯ
[7]
ตถา เปกากินา เว’เต, ตโย วิกฺกมพาหุนา;
ปราชยํ ปริภวํ, ปาปิตา พหุโส รเณฯ
[8]
สูนุโน สุสมตฺถสฺส, วิโสเธตุ มิมํ มลํ;
น ทิสฺสเต ปาตุภาโว, อโห โน อปฺปปุญฺญตาฯ
[9]